Kutagira ubwoba kwe kwari gufite ishingiro kuko ibyabaye ku mugoroba wo kuri iki Cyumweru tariki ya 05 Gicurasi 2024 ni amateka atazasibangana ku mitiya y’abitabiriye iki gitaramo ndetse n’uwa Chryso Ndasingwa nyiri zina.

Uyu munsi nibwo yakoze igitaramo cye cya mbere ari nacyo yanamurikiyemo album ya mbere mu rugendo rwe rw’umuziki wo kuramya no guhimbaza Imana.

Imigendekere yacyo yagaragaje ko uyu muhanzi afite umubare utari muto w’abamukunda biganjemo urubyiruko.

Asaph Music International yo muri Zion Temple Gatenga, niyo yinjije abantu mu gitaramo mu ndirimbo zinyuranye zo guhimbaza Imana zirimo iyo bahimbye yitwa Kumama.

True Promises, niyo yakurikiyeho nayo ikurikirwa na Chryso Ndasingwa ku rubyiniro, wahise ahera ku ndirimbo yise ‘Niwe’ ikazamura amarangamutima ya benshi bari aho, igitaramo cyaranzwe n’ibihe bidasanzwe kirakomeza.

Ubwitabire bwari hejuru

Kimwe nk’ibindi bitaramo amasaha yo gutangiriraho yageze abantu basa nkaho ari ntabo, benshi batangira kwibaza uko biri bugende, ariko ahagana 18:00 ubwo hacurangwaga zimwe mu ndirimbo zo guhimbaza Imana abantu bari bamaze kwiyongera.

Ntiwavuga ngo BK Arena yakubise iruzura, ariko imyanya itaririmo abantu washoboraga kuyibarisha intoki. Yaba abari bari muri iyi nyubako y’imyidagaduro n’abakurikiranga iki gitaramo mu bundi buryo bose baguye mu kantu kuko ni ibindi bitari byitezwe kuri bamwe.

Uko amasaha yarushagaho kwigira imbere ni nako abantu babaga benshi ari nako bagenda binjizwa mu mwuka n’abahanzi banyuranye.

Uwimana Aime yahawe ishimwe

Nyuma ya Papi Clever na Dorcas, Aime Uwimana, yahise yakirwa ku rubyiniro nk’umunyabigwi aho zimwe mu ndirimbo yaririmbiye abankunzi be baje kwifatanya na Chryso harimo iyitwa ‘Urakwiriye gushimwa’.

Asoje kuririmba Chryso Ndasingwa yamushyikirije igikombe cy’ishimwe nk’umwe mu batanze umusanzu ukomeye wo guteza imbere indirimbo zihimbaza, zikanaramya Imana kandi akaba amaze igihe abikora.

Ni igikorwa cyatunguranye ndetse n’amarangamutima menshi asanga Uwimana Aime, agaragaza ko ari igikorwa cyimunyuze.

Chryso yaririmbiwe

Uyu muhanzi wakoze amateka agiye kumara igihe aganirwaho, yizihije isabukuru y’amavuko ku wa Gatanu tariki ya 03 Gicurasi 2024, ariko ubwo yari asoje indirimbo ye yanyuma ifunga iki gitaramo yatunguwe araririmbirwa nawe biramurenga.

Ni igikorwa cyajyanye no gushyiraho uburyo bwo kwifatanya nawe mu kwizihizwa umunsi we w’amavuko.

Dr Nsabi yahawe umwanya ku rubyiniro

Nsabimana Eric, uzwi nka Dogiteri Nsabii ku mbuga nkoranyambaga no mu myidagaduro yahamagajwe ku rubyiniro ubwo iki gitaramo cyaburaga iminota mike ngo kirangire.

Ku ya 21 Mata 2024, nibwo uyu musore yakoze impanuka ubwo imodoka yari arimo ari kumwe na mugenzi we ukina filime Imanizabayo Prosper [Bijiyobija] yagonganye na Daihatsu agakubita umutwe ku ntebe agakomereka bikomeye mu isura no ku mutwe.

Icyo gihe baraye mu bitaro bya Nemba mu Karere ka Gakenke bitabwaho n’abaganga.

Akigera ku rubyiniro yateye hallelujah ubugira gatatu maze akomoza kuri iyi mpanuka yarokotse, apfukama hasi atangira gushima Imana ko yamurinze.

Hafi saa tanu z’ijoro nibwo Chryso Ndasingwa yatanze agakeregeshwa, agaruka ku rubyiniro aho yahise aririmba indirimbo yise ‘Wahozeho’ yari itegerejwe n’abantu batari bake nyuma akurikizaho ‘Ni nziza’ abaje kwifatanya nawe bagaragaza ko bagifite inyota yo kuramya no guhimbaza Imana.

Igitaramo cy’amateka cya Chryso Ndasingwa cyo kumurika album ‘Wahozeho’ cyashizweho akadomo ahagana saa tanu n’iminota 35 z’ijoro.

Abitabiriye iki gitaramo banyuzagamo bagacinya n'akadiho

Cyari igitaramo gikora ku marangamutima y'abacyitabiriye

Josh Ishimwe ni umwe mu bahanzi bari biyambajwe na Chryso Ndasingwa

Aime Uwimana yishimiwe bikomeye muri iki gitaramo

Apôtre Masasu Joshua ni we wagejeje ubutumwa bwiza ku bitabiriye igitaramo cya Chryso Ndasingwa

Asaph Music International niyo yabimburiye abandi ku rubyiniro

Byari ibyishimo ku bakunzi b'umuziki wo kuramya no guhimbaza Imana batashye banyuzwe n'iki gitaramo

Cyari igitaramo cyo kuramya no guhimbaza Imana

Chryso Ndasingwa ubwo yari ahingutse ku rubyiniro ni uku yari yizihiwe

Byari ibyishimo bikomeye ku bitabiriye iki gitaramo

Chryso Ndasingwa yageze aho aza guhindura imyambaro asubira ku rubyiniro ari mushya

Chryso Ndasingwa yashimiye abantu bose bitabiriye igitaramo cye

Chryso Ndasingwa yanyuzagamo agacurangira abakunzi be

Dorcas usanzwe aririmbana n'umugabo we Papi Clever yasusurukije abakunzi be

Ibihumbi bitari bike by'abakunzi b'umuziki bitabiriye igitaramo cya Chryso Ndasingwa

Ababyeyi bari bitwaje abana mu gitaramo cya Chryso Ndasingwa

Dogiteri Nsabii yahawe umwanya ashima Imana yamurindiye mu mpanuka aherutse gukora

Papi Clever na Dorcas bishimiwe bikomeye

True Promises bashimishije abakunzi babo mu gitaramo cya Chryso Ndasingwa

Tracy ni we wari uyoboye iki gitaramo nk'umushyushyarugamba

Umubyeyi wa Chryso Ndasingwa yishimira imirimo y'umuhungu we

BK Arena yongeye kuzura

Amafoto: Habyarimana Raoul