Igitaramo ‘ i Bweranganzo’ cya korali Christus Reignat gitegerejwe kubera mu Mujyi wa Kigali ku wa 3 Ugushyingo 2024 muri Lemigo Hotel.

Ubwo twabasuraga mu myitozo ya nyuma aho iyi korali isanzwe ikorera, babwiye IGIHE ko bari gushyira akadomo ku myitozo ya nyuma bari bamazemo igihe.

Mbarushimana Jean Paul umuyobozi w’iyi korali yijeje abakunzi b’umuziki wab kuzaryoherwa n’iki gitaramo kigiye kuba ku nshuro ya kabiri.

Ati “Abantu babonye igitaramo cyacu cy’ubushize bumve ko dukoze ubu ngubu tugiye gukora icyisumbuyeho kuko umuntu agenda ava mu bwiza ajya mu bundi nta gusubira inyuma. Dufite indirimbo nyinshi zirimo izo kuramya no guhimbaza Imana tukazanatarama mu ndirimbo zo kwimakaza umuco w’amahoro mu ndimi zitandukanye.”

Uyu mugabo yavuze ko iki gitaramo bizeye ko kizashimisha buri wese uzacyitabira yaba abana n’abakuru, anizeza abakunzi b’umuhanzi Rugamba Sipiriyani kuzataramana muri nyinshi mu zakunzwe kurushaho bashyize mu manota.

Uretse ibi yakomojeho, Mbarushimana yavuze ko undi mwihariko w’iki gitaramo ari uko amafaranga azavamo azafasha abana baturuka mu miryango itishoboye biga mu ishuri ribanza rya St Famille nubwo bataramenya umubare w’abazafashwa.

Chorale Christus Regnat imaze kuba ubukombe mu makorali ya Kiliziya Gatolika. Ni korali igizwe n’abaririmbyi bari mu byiciro bitandukanye by’imyaka, aho usangamo urubyiruko rw’abasore n’inkumi, abagore n’abagabo, amajigija n’ibikwerere ndetse n’abari hejuru ho gato mu myaka.

Iyi korali yashinzwe mu 2006, ivukira kuri Centre Christus i Remera mu Mujyi wa Kigali.

Kuva mu 2008, ibarizwa kuri Paruwasi Regina Pacis i Remera. Ubu ifite imizingo itandatu y’indirimbo zabo mu buryo bw’amajwi, imaze gukora ibitaramo bikomeye bitanu.

Ubuyobozi bwa Christus Reignat bwasabye abantu kugura amatike hakiri kare kuko imyanya isigaye ari mbarwa

Uretse indirimbo zo kuramya no guhimbaza Imana, Korali Christus Reignat baririmba izindi zirimo izo kwimakaza umuco w'amahoro

Imyitozo ya Christus Reignat yitabiriwe n'abaririmbyi bose bazitabira igitaramo cyabo

Abaririmbyi bari kwitoza indirimbo za nyuma cyane ko igitaramo gisigaje iminsi mbarwa

Amafoto: Ingabire Nicole