Chorale Christus Regnat yakoranye indirimbo ya St Valentin na Yverry na Andy Bumuntu

Yanditswe na Uwiduhaye Theos
Kuya 12 Gashyantare 2020 saa 05:41
Yasuwe :
0 0

Korali Christus Regnat ikorera ivugabutumwa muri Kiliziya Gatolika, Paruwasi ya Regina Pacis, iherereye i Remera mu Mujyi wa Kigali, yakoze indirimbo y’umunsi w’abakundanye yahuriyemo na Yverry ndetse na Andy Bumuntu bamenyerewe mu ndirimbo z’urukundo.

Iyi ndirimbo bise ‘Mama Shenge’ yagiye hanze ku gicamunsi cyo kuri uyu wa Gatatu tariki 12 Gashyantare 2020. Ni indirimbo ivuga ku rukundo.

Bizimana Jeremie usanzwe ari umuhimbyi, umwarimu w’indirimbo ndetse akanamamaza ibikorwa by’iyi korali yabwiye IGIHE bahimbye iyi ndirimbo bagamije gushimisha abazizihiza umunsi w’abakundana uteganyijwe kuri uyu wa Gatanu tariki 14 Gashyantare 2020.

Ati “Kubera ko Kiliziya Gatorika yizihiza umunsi wa Saint Valentin, ivuga ku rukundo rw’uwo mutagatifu waharaniraga ko abantu bakundana bakabana neza niyo mpamvu natwe twatekereje iyi ndirimbo. N’ubusanzwe kandi uretse kuba turirimba mu kiliziya tujya turirimba no mu bukwe tukizihirwa.”

Yavuze ko batekereje gukorana na Yverry na Andy Bumuntu kuko baririmba neza kandi bashobora guhuza nabo. Iyi ndirimbo ni na we wayihimbye.

Yverry niwe uririmba inyikirizo ati “Mama Shenge, nzajya nguhunda imivugo, nungemo iteka n’uduhozo, utete untetere n’ejo, n’ejo bundi ugezeyo, shenge we mwiza wanjye […]”

Naho Andy Bumuntu we yumvikana agira ati “Nurira ukanga guhora, kandi ngukunda ihogoza, nzakujyana ku kagezi kamwe gasuma kakumporeze. Shenge we, mwiza wanjye […]”

Mu rwego rero rwo kwizihiza umunsi mukuru wa Saint Valentin Kiliziya Gatorika ishyiraho uburyo butandukanye bwo kuwizihiza, hari ahakorwa amasengesho y’iminsi 9 yo kuwitegura yitwa, “Noveni”.

Christus isanzwe izwi cyane mu bitaramo bishimisha benshi mu bihe bitandukanye, mu mwaka ushize yakoze igitaramo yahuriyemo n’Umufaransa w’ikirangirire mu njyana y’umuziki w’umwimerere (Classique), Jean Claude Gianadda, cyanyuze benshi.

Iki gitaramo cyabereye muri Kigali Conference and Exhibition Village [Camp Kigali]mu ijoro ryo ku wa Gatandatu, tariki ya 5 Ukwakira 2019.

Korali Christus Regnat yashinzwe mu 2006, ivukira kuri Centre Christus i Remera mu Mujyi wa Kigali. Kuva mu 2008, ibarizwa kuri Paruwasi Regina Pacis i Remera. Ubu ifite imizingo itandatu y’indirimbo zabo mu buryo bw’amajwi, imaze gukora ibitaramo bikomeye bitanu.

Christus yakoranye indirimbo n'abahanzi baririmba indirimbo zisanzwe Yverry na Andy Bumuntu
Rugamba Yverry na Andy Bumuntu mu ifatwa ry'amashusho y'indirimbo bakoranye na Chorale Christus Regnat

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .