Nyuma y’iminsi IGIHE itangaje inkuru y’uko Ruger na Victony bagiye gutaramira i Kigali, Intore Entertainment ifatanyije na BK Arena bemeje ko ari impamo, icyakora hatangazwa Ruger gusa.

Ku rundi ruhande ariko, IGIHE yamenye amakuru ko na Victony ibiganiro bye byarangiye igisigaye ari uko umunsi ugera na we bagatangira kumwamamaza.

Victony, ni umunya-Nigeria uvanga kurapa no kuririmba. Uyu musore wavutse ku wa 5 Mutarama 2001, akomoka mu gace Orsu muri Leta ya Imo.

Yamamaye mu ndirimbo nka Soweto, Kolomental, Stubborn yakoranye na Asake n’izindi nyinshi.

Ruger (izina yahawe na D’Prince wavumbuye impano ye) ni umusore uhagaze bwuma mu muziki cyane ko ari mu bagezweho muri Nigeria no muri Afurika muri rusange.

Ruger yazamutse cyane mu muziki nyuma yo gusinyana amasezerano y’imikoranire na D’Prince binyuze muri sosiyete ye ifasha abahanzi yitwa ’Jonzing World Record’.

Nyuma y'imyaka ibiri, Ruger agiye kongera gutaramira i Kigali

Ubwo aheruka i Kigali, Ruger yatashye abakunzi b'umuziki badashize ipfa