Bya bihe! Ibitero abaraperi bagabye ku baririmba R&B bakabita "abapede"

Yanditswe na Muvunyi Arsène
Kuya 18 Kanama 2019 saa 01:19
Yasuwe :
0 0

Umwaka wa 2008 ufatwa nk’intangiriro y’igisekuru gishya cyaje muri muzika nyarwanda cyadukanye n’injyana za R&B na Hip Hop zikunzwe n’urubyiruko.

Ni ibihe bitazibagirana kuri benshi ubu bizihiza imyaka 10 muri muzika, batangiye ari abana biga mu mashuri yisumbuye, amikoro ari make, ikoranabuhanga ritarasakara none ubu bamaze kugera kuri byinshi.

Mu ntangiriro z’iki gisekuru mu njyana ya R&B harimo nka Tom Close, The Ben, Meddy, King James, n’ubu bagifite igikundiro muri benshi.

Muri Hip Hop harimo itsinda rya Tough Gang ryari riyoboye, rikaba ryarimo P FLA waje kuryirukanwamo, Bull Dogg, Fireman na Green P. harimo kandi ba Pacson, Diplomate, Bac T, K8 Kavuyo n’abandi.

Muri ibi bihe abaraperi bakoraga indirimbo zirimo amagambo akomeye, bavuga ku buzima bushaririye bwo ku muhanda ndetse bakundaga kuyita injyana y’umujinya.

Byari nk’ikizira muri icyo gihe kumva umuraperi wakoze indirimbo ataka umukobwa cyangwa atanga ubutumwa bwo kwishimisha.

Ku ruhande rw’abakora R&B indirimbo zabo hafi ya zose zabaga zirimo amagambo ataka abakobwa, baririmba mu tujwi tworoheje turimo n’uturingushyo [ibyo bitaga guhogoza] bakarangwa no kwiyitaho cyane mu buryo bugaragara.

Abahanzi bakoraga injyana y’umujinya bitaga “abapede” abakoraga R&B , imvugo ikoreshwa ku bantu baryamana bahuje ibitsina ahanini biturutse ku myitwarire yabo.

Byasaga nko kwerura urwango bafitiye abakoraga iyi njyana itari ihuye n’iyabo.

Mu yitwa Jalousie, Bull Dogg hari aho aririmba ari “Nshyushye kurenze ibikenewe, mu byiyumviro bya gisore nsange uri ipede ngutotore”; akongera ati “hari itungo ryo mu rugo nzi ryabuze uwo rigwaho nzarirangira icyokezo […] nturi G uri ipede” aho ni mu yitwa Ibikundanye birajyana.

Mu yitwa Raporo ho avuga ati “Aho kuba umucakara w’umugore utakwizera uzanywe itabi rikaze. Oroha nze nkwereke uko abadepe basa, bashye, nzanywe no kubambika ubusa.”

Bull Dogg ni umwe mu baraperi bibasiye abahanzi b’injyana ya R&B ndetse abigarukaho mu ndirimbo nyinshi cyane yagiye akora nka “Jalousie”, “Raporo”, “Ibikundanye Birajyana” n’izindi.

Yabwiye IGIHE ko babikoraga mu buryo bwo guserereza abakora injyana ya R&B ariko bidasobanuye ko baryamanaga n’abo bahuje ibitsina.

Ati “ Ni nko gusererezanya bisanzwe ariko ntabwo byarebaga abaryamana bahuje ibitsina, twabaga dushaka kurushanwa n’abantu baririmba injyana ya R&B kandi babaga ari inshuti zacu.”

Avuga ko icyatumaga bita bagenzi babo abapede ari uburyo bitwaraga nk’abakobwa haba mu miririmbire no mu buzima busanzwe.

Ati “Twavugaga ibintu byo kwirya, imiririmbire yabo n’amajwi n’ukuntu babaga bigira nk’abakobwa, ni nacyo umuntu yabaga agenderaho”.

Green P nawe waririmbaga mu itsinda rya Tough Gang avuga ko impamvu bitaga abahanzi b’injyana ya R&B abapede byaterwaga n’uko imyitwarire yabo yabaga ijya kumera nk’iy’abakobwa.

Ati “ Hari ukuntu twari abahungu 100% ukabona hari abandi bagenzi bacu b’abahungu nka 60%, imyitwarire yabo irimo igikobwa cyinshi cyane. Wabonaga ari abahungu birya, bisiga ibirungu mu maso, biriza, wa muntu ushobora kubwira uti tugende twakererewe ukabona amaze isaha yose ari mu ndorerwamo.”

Jay C umwe mu baraperi bagendanaga cyane n’itsinda rya Tough Gang, avuga ko icyatumye badakomeza kwita bagenzi babo abapede, ari uko bagiye bunga ubumwe mu buryo butandukanye n’imyumvire igahinduka.

Ati “Uko twagendaga duhuza, dukorana indirimbo byarangiye tubaye inshuti bagahindura imyumvire natwe tukayumva, ugasanga ba bantu twitaga abapede nabo batwiyunzeho tumeze kimwe, bisa nk’aho bitandukanye na mbere.”

Raporo imwe mu ndirimbo ya Bull Dogg avugamo abapede

Abaraperi ntibemeraga imyitwarire y'abaririmbyi b'injyana ya R&B
Imyambarire y'abahanzi ba R&B yatumaga abaraperi batabiyumvamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza