Umuhanzi Bushali wari ucumbikiwe ahazwi nko kwa Kabuga yarekuwe

Yanditswe na Nsengiyumva Emmy
Kuya 17 Ukuboza 2020 saa 12:54
Yasuwe :
0 0

Umuhanzi Hagenimana Jean Paul uzwi nka Bushali wari umaze amezi arenga abiri acumbikiwe mu kigo kinyurwamo by’igihe gito (Transit Center) cya Gikondo ahazwi nko kwa Kabuga, yarekuwe.

Amakuru yizewe agera ku IGIHE ahamya ko Bushali wakekwagaho gukoresha ibiyobyabwenge yarekuwe ku mugoroba wo kuri uyu wa 16 Ukuboza 2020.

Uyu waduhaye amakuru yavuze ko uyu muhanzi asohotse yarahinduye imitekerereze, ku buryo yaba mu mibereho ye cyangwa imikorere hari byinshi abasanzwe bamuzi bazabona nk’impinduka.

Mu Ugushyingo 2020 hari hasohotse amakuru y’uko uyu muraperi yari yashyizwe ku rutonde rw’abashoboraga kujyanwa Iwawa mu kigo ngororamuco, ariko mu buryo butunguranye ntabwo yigeze ajyayo.

Bushali yafatanywe n’abandi bantu bari gukoresha ibiyobyabwenge, gusa ngo bitewe nuko atabifatanywe imbonankubone, byatumye ajyanwa mu kigo ngororamuco aho kumujyana mu rukiko.

Si ubwa mbere Bushali yari avuzwe mu gukoresha ibiyobyabwenge. Mu mpera za 2019 yatawe muri yombi ndetse ajyanwa mu nkiko akurikiranyweho kubikoresha. Icyakora aza kurekurwa n’urukiko.

Twagerageje kuvugisha ubuyobozi bw’iki kigo ngo tubone amakuru arambuye ku ifatwa ry’uyu muhanzi ndetse n’abo bafatanywe ariko ntibyadukundiye.

Ikigo Kinyurwamo by’Igihe Gito (Transit Center) cy’Umujyi wa Kigali giherereye mu Karere ka Kicukiro, Umurenge wa Gikondo.

Iki kigo cyakira abagaragaweho imyitwarire ibangamiye ituze ry’abaturage harimo abafatiwe mu bikorwa by’uburaya, ubuzererezi, gukoresha ibiyobyabwenge, n’ubucuruzi bwo mu muhanda.

Bushali wari urengeje amezi abiri acumbikiwe mu kigo kinyurwamo by’igihe gito cy’Umujyi wa Kigali yarekuwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .