Iki gitaramo cyatangiye ahagana saa munani, ntabwo kigeze gihabwa agahenge n’imvura yari yiyemeje kwirirwa igwa mu Mujyi wa Nyamata aho cyari cyabereye.

Umuhanzi Ruti Joel ni we wabimburiye abandi bahanzi ku rubyiniro, mu gihe kingana hafi n’isaha ari ku rubyiniro, uyu musore yashimishije abakunzi be.

Nyuma yo kuva ku rubyiniro, imvura nyinshi yahise yisuka abantu bajya kugama icyakora mu minota mike yatangiye kugenza make abantu basubira mu myanya yabo batangira gushaka uko bakongera kwidagadura.

Bushali ni we muhanzi wahise ajya ku rubyiniro. Uyu muraperi ukunzwe, yataramiye abakunzi be mu tujojoba duke twari tukigwa, icyakora kubera kwikanga ko yakongera kugwa abahanzi bari basabwe kugabanya iminota bamara ku rubyiniro.

Bushali wamaze ku rubyiniro iminota igera kuri 20, akivaho yahaye umwanya Danny Nanone.

Uyu muraperi uri mu bamaze kwemeza ko akunzwe n’abatari bake, iminota 20 yari yahawe ngo ashimishe abakunzi be ntabwo yabashije kuyimara kuko imvura yamusanze ku rubyiniro mu gihe yiteguraga gusoza.

Nyuma yo kubona ko imvura itaguye ari nyinshi, abateguye iki gitaramo bahisemo ko gikomeza baha umwanya Kenny Sol na we ashimisha abakunzi be nubwo akavura katamuvaga ku bitugu.

Kenny Sol wari kumwe n’inkumi isanzwe imufasha ku rubyiniro, yahaye umwanya Bwiza na we asusurutsa abakunzi be mu gihe cy’iminota 20.

Bwiza akiva ku rubyiniro, Bianca na MC Buryohe bari bayoboye iki gitaramo bahise bahamagara Chriss Eazy wagombaga gukurikira kugira ngo asusurutse abakunzi be.

Uyu muhanzi utorohewe n’imvura yari yamaze kuba nyinshi, ntabwo yigeze acika intege ahubwo yahaye ibyishimo abakunzi be mu minota itari myinshi yari yahawe.

Umuhanzi wagombaga gusoza igitaramo ni Bruce Melodie ariko mu gihe yiteguraga kujya ku rubyiniro, umuyaga wari wamaze kwiyongera ku buryo yaba we n’ubuyobozi bwa EAP butegura ibi bitaramo bahise bafata icyemezo cyo guhagarikira aho igitaramo.

Icyakora Bruce Melodie yasabye ko yahabwa iminota itanu akishora mu mvura, mu ijwi rye yegera abakunzi be abaririmbira uduce duto duto twa zimwe mu ndirimbo ze ahita ava ku rubyiniro arataha.

Nyuma y’iki gitaramo, Bruce Melodie yavuze ko bafashe icyemezo cy’uko ataririmba mu nyungu z’abafana.

Ati “Hari hari kugwa imvura irimo umuyaga mwinshi, tubonye bishobora gutera impanuka twafashe icyemezo cy’uko ntaririmba kuko icya mbere ni ubuzima bw’abantu.”

Mushyoma Joseph wamamaye nka Bubu, Umuyobozi wa EAP isanzwe itegura ibi bitaramo yabwiye abanyamakuru ko bahagaritse iki gitaramo kubera umuyaga mwinshi babonaga ko ushobora gutera impanuka.

Ati “Nyuma yo kubona ko imvura irimo umuyaga mwinshi washoboraga gutera n’impanuka, twahisemo guhagarika igitaramo kuko icya mbere ni ubuzima bw’abantu kuruta ikindi icyo ari cyo cyose.”

Bubu yahamije ko ibitaramo bya MTN Iwacu Muzika by’umwaka utaha bizaba mu mpeshyi ya 2025 bazakora ibishoboka byose bikagera i Nyamata mu rwego rwo kuvamo ideni abakunzi b’umuziki bari bitabiriye icy’uyu munsi.

Abafite ubumuga bitabira ibi bitaramo bahabwa ubufasha

Umubyeyi ufite ubumuga ubwo yari ageze hari hagiye kubera igitaramo cya MTN Iwacu Muzika Festival

Icyanga cya Primus ugikerensa yajya akibaza abanyamahanga bagisomera mu rw'imisozi igihumbi

Abanyonzi amagare bari bayaparitse bari kwirira ikirori

Imitaka ya MTN yagobotse abatari bake

Imvura yatangiranye n'igitaramo iba ari nayo igisoza

Umugore wa Junior Giti yari yazanye n'abana kwihera ijisho iby'iki gitaramo

Danny Vumbi yari yitabiriye iki gitaramo ari kumwe n'umugore we

Abanyamujyi bari babukereye

Imvura yanyuzagamo igakanga abantu ariko ikongera ikagenza make

Nubwo imvura yabanje kubajujubya, abakunzi b'umuziki ntibigeze barambirwa

MC Buryohe na Bianca nibo bari bayoboye iki gitaramo

DJ Trick, MC Buryohe na Bianca basusurukije abakunzi b'umuziki bari bakoraniye i Nyamata

Ruti Joel wabanje ku rubyiniro yari kumwe n'itsinda ry'Ibihame by'Imana

Ruti Joel yataramiye anashimisha abakunzi be muri iki gitaramo

Ruti Joel aba anyuzamo agasusurutsa abakunzi be anababyinira

Nyuma y'akanya imvura ikangaranyije abakunzi b'umuziki, Bushali niwe wari utahiwe

Bushali yahaye ibyishimo abakunzi be i Nyamata

Nubwo yari yahawe iminota mike, Bushali yakoresheje imbaraga nyinshi ngo ashimishe abakunzi be

Bushali yavuye ku rubyiniro abakunzi be batabishaka

Nubwo ikirere cyari cyarakaye, Danny Nanone nawe yatanze ibyishimo ku bakunzi be

Imvura yasanze ku rubyiniro Danny Nanone

Danny Nanone ntabwo yakanzwe n'imvura yari yabiciye i Nyamata

Nubwo imvura yari yarikoroje abakunzi b'umuziki i Nyamata ntibigeze bashaka gutenguha abahanzi babo

Gushimisha abakunzi be bari bishwe n'imbeho byamusabye gukoresha imbaraga nyinshi

Kenny Sol yafatanye ifoto n'abakunzi be

Bwiza n'ababyinnyi be batanze ibyishimo i Nyamata

Bwiza, umwana wataramiraga mu rugo yeretswe urukundo bikomeye

Bwiza yabwiye abakunzi b'umuziki we bari i Nyamata ko atazigera yibagirwa ibihe bagiranye

Chriss Eazy niwe wagombaga kubanziriza Bruce Melodie

Kuva ageze ku rubyiniro kugeza aruvuyeho imvura yari imuri ku bitugu

Chriss Eazy ntabwo yakanzwe n'iyi mvura itari nkeya

Bruce Melodie nubwo yari amaze kubona ko atakiririmbye yanze kuva i Nyamata ataganirije abakunzi be

Bruce Melodie yaririmbiye abakunzi be nta byuma birimo, nubwo invura yari imuri ku bitugu ntabwo yigeze acika intege

Bruce Melodie yavuze ko bahagaritse iki gitaramo birinda impanuka yashoboraga kubatera ibyago

Bruce Melodie yijeje abakunzi be b'i Nyamata ikindi gitaramo gikomeye

Amafoto: Kwizera Remy Moses