Iki gikorwa cyabereye mu Karere ka Bugesera kuri Hoteli yitwa ‘Tuza Inn’, aho Abanyarwanda n’abanyamahanga bakunda imodoka bari babukereye bagiye kwihera ijisho.

Ni igikorwa cyari kigizwe n’ibice bitatu, birimo kumurika imodoka na moto zifite umwihariko, kurushanwa kugaragaza udushya mu kuzitwara ndetse n’icy’umuziki, aho ababyitabiriye bagombaga kugorobereza mu gitaramo cyari cyatumiwemo DJ Marnaud na Tag Team bo muri Afurika y’Epfo.

Mu modoka zamuritswe higanjemo izifite umwihariko wo kuba zikozwe mu buryo budasanzwe cyangwa izo usanga zimaze igihe kirekire mu muhanda ariko zikibasha kugenda.

Uretse kumurika imodoka na moto, abahanga mu kuzitwara nabo bahawe rugari bagaragaza ubuhanga bwabo ibyasize itsinda ryitwa Subaru Team ryo muri Uganda ryeretse benshi mu bibeshyaga ko bazi imodoka ko bagifite byinshi byo kwiga.

Ubwo abatwaraga imodoka na moto mu buryo budasanzwe bari bamaze kugaragaza ubuhanga bwabo, ahagana Saa Mbiri, Muyango Claudine wayoboye ibi birori yahamagaye abantu ngo begere urubyiniro hakurikireho umuhango wo gushimira abitwaye neza ari nako hakurikiraho gahunda ya muzika.

Tag Team bari bahageze kare bamaze no gusuzuma ibyuma byabo, abantu batangiye kwegerana ngo bacinye akadiho, hahise haduka amakuru y‘uko inzego z’Ubuyobozi zitegetse ko umuziki uzima.

Ahagana Saa Tatu n’igice z’ijoro, abateguye ibirori basabwe kwimura urubyiniro bakarujyana hafi n’amacumbi abari bafashe ibyumba bagombaga kuraramo, ndetse ninako babigerageje gusa benshi mu bari bitabiriye ibi birori bahise bitahira cyane ko bwari bwamaze no kwira.

Tag Team na DJ Marnaud byarangiye badasusurukije abakunzi b’umuziki nubwo baje kujyanwa mu kabyiniro kitwa Inferno gasanzwe ari akabari bateguye iki gitaramo baba ariho basusurukiriza abakunzi babo.

Hari hateguwe ibihembo byo gushimira abitwaye neza

Nta cyaka cyarangwaga ahabereye ibi birori

Wari umugoroba wo gusabana ku bitabiriye ibi birori

Abahanga mu gutwara imodoka basize isomo

Uretse izo mu mahanga batwaye n'imodoka z'i Kigali

Iyi modoka ni imwe mu zagaragaje gukomera cyane

Umuhanga mu gutwara moto nawe agaragaza ibyo yize

Bakataga imodoka bagera aho bagakingura imiryango

Moto zirushanwa ku mbaraga...

Wagira ngo hari ivumbi kandi ari umwotsi uva muri moto

Nubwo yavunitse, kwihangana byanze ashyira imbago kuri moto agaragaza ubuhanga bwe

Si imodoka nshya gusa zatwawe...

Iyi 'gikeri' bakataga umuryango ufunguye yakozwe mu 1973. Ni imwe mu zikuze zari muri iki kibuga

Miss Muyango niwe wari uyoboye ibi birori nubwo byarangiye igitaramo cya muzika kiburijwemo

Umushoramari Basil umaze kubaka izina mu Mujyi wa Kigali yamuritse imodoka ye yo mu bwoko bwa Chevrolet

Uyu yayikuye muri Zambia aza kuyimurikira i Kigali

Iyi Gikeri nubwo ari iya kera ariko iracyagenda neza

Batwara moto umwotsi ugacumba

Moto zari zazanywe kumurikwa muri ibi birori

Si imodoka nto gusa zatwawe mu buryo bwihariye

Abakunzi b'imodoka bahageze kare cyane ko iki gikorwa cyatangiye ku manywa

Amafoto: Kasiro Claude