Ibi uyu muhanzi yabigarutseho ku wa Gatandatu tariki 21 Nzeri 2024 mu kiganiro yagiranye n’itangazamakuru nyuma yo gutaramira mu Karere ka Ngoma.

Ubwo yari amaze gutaramira i Ngoma, Bruce Melodie abajijwe uko yabonye abakunzi be bamwakiriye avuga ko ku bwe atatinda ku migendekere y’igitaramo, ahubwo yibanda ku iterambere yabonye mu turere amaze iminsi ataramiramo.

Ati “Ntabwo ndi butinde ku gitaramo cyane kuko cyagenze neza […] ahubwo njye ikintu nabonye. Ubundi najyaga nza nambaye ‘lunettes’, ubu si ko naje, naje ndeba. Imihanda ya Ngoma ukuntu abantu bari ku murongo n’uburyo twakoranye imyitozo ngororamubiri, Ngoma na Nyagatare imbere cyane.”

Ibi Bruce Melodie yabigarutseho nyuma y’uko mu mijyi ya Ngoma na Nyagatare hagaragara imihanda ikiri mishya yuzuye kandi isa neza, ibikora ku mitima ya benshi bagenderera utu turere.

Uyu muhanzi yaboneyeho umwanya wo gutumira abakunzi b’umuziki we mu Mijyi ibitaramo bya ‘MTN Iwacu Muzika Festival’ bitegereje kwerekezamo ahereye ku bo mu Karere ka Bugesera gatahiwe ku wa 28 Nzeri 2024.

Bruce Melodie mu muhanda w'i Nyagatare muri siporo rusange

Ukigera mu Mujyi wa Nyagatare uhabwa ikaze n'umuhanda mwiza ujyanye n'igihe

Mu minsi ishize Bruce Melodie yataramiye i Nyagatare

I Ngoma abahanzi bakoranye siporo rusange n'abakunzi b'umuziki, umwanya mwiza kuri Bruce Melodie wo gutembera mu muhanda mushya wujujwe muri uyu Mujyi

I Ngoma hujujwe umuhanda mushya waryoheje isura y'umujyi

Bruce Melodie yanyuzwe n'umuhanda w'i Ngoma