Bruce Melodie yasohoye indirimbo ’Fresh’ yakuyemo amajwi ya Asinah

Yanditswe na Nsengiyumva Emmy
Kuya 13 Ukuboza 2019 saa 02:23
Yasuwe :
0 0

Mu minsi ishize nibwo Asinah yari yariye karungu avuga ko yamenye ko Bruce Melodie yamusibye mu ndirimbo bakoranye, none koko iyo ndirimbo yiswe ’Fresh’ yasohohotse itarimo uyu muhanzikazi.

Mu minsi ishize, abinyujije ku mbuga nkoranyambaga Asinah n’umujinya mwinshi yihanangirije Bruce Melodie amubwira ko azabona ububi bwe bitewe n’indirimbo bakoranye agiye gusohora yarasibyemo igitero cye.

Aba bahanzi batangiye kurebana ay’ingwe nyuma y’iminsi havugwa ubushuti bwo ku rwego rwo hejuru hagati yabo.

Bajyanye muri Tanzania aho byavugwaga ko Asinah yari aherekeje Bruce Melodie kumusemurira, mu gihe undi yari agiye gufata amashusho y’indirimbo.

Icyakora kuko bari bafiteyo imishinga y’indirimbo itandukanye ndetse na gahunda zinyuranye, Bruce Melodie ngo yibese Asinah afata amashusho indirimbo bakoranye barinda bava muri Tanzania uyu muhanzikazi atamenye ibyamubayeho.

Asinah yamenye ko bamukuye mu ndirimbo abibwiwe n’umu-Producer ukomoka mu gihugu cya Nigeria witwa Runtinz Badder, ari nawe wari wayikoze. Yasabaga imbabazi uyu muhanzikazi kubera kumuhemukira, icyakora agaragaza ko byatewe na Bruce Melodie, we nta mutima mubi yabikoranye.

Asinah abinyujije ku rukuta rwe rwa Instagram yamenyesheje Bruce Melodie ko naramuka amuvanye mu ndirimbo bakoranye azabona aho abera akaga.

Aha yagize ati “Icyitonderwa… Wowe Bruce Melody niwibeshya ugakuramo amajwi yanjye mu ndirimbo dufitanye uzabona ikibi kiri muri njye.”

Mu kiganiro na IGIHE, Asinah ahamya ko kumukura muri iyi ndirimbo ari igihombo gikomeye kuko yari yayikunze bitewe n’uburyo ari nziza.

Uyu muhanzikazi avuga ko muri iyi ndirimbo yari yishyuye igice cy’amafaranga yayigiyeho, bityo ahamya ko mu gihe Bruce Melodie yakomeza kumukuramo yamwishyura nibura 1 200 000 Frw.

Iyi ndirimbo Bruce Melodie yakuyemo Asinah yamaze gusohoka iri kumwe n’amashusho yayo, mu buryo bw’amajwi yakozwe na Runtinz Badder wo muri Nigeria mu gihe amashusho yayo yo yafashwe akanatunganywa na Kenny uzwi muri Tanzania kubera abahanzi b’ibyamamare bagiye bakorana.

Iby’iyi ndirimbo ya Bruce Melodie na Asinah bije bikurikira inkuru z’uyu muhanzikazi na Riderman, aho byavugwaga ko bakoranye indirimbo icyakora birangira batabyemeranyaho, Riderman ahakana ibyo gukorana nawe undi nawe ahamya ko ubwo hari impamvu ziri gutuma amwihakana.

Reba indirimbo "Fresh" ya Bruce Melodie yakuwemo amajwi ya Asinah

Reba ikiganiro twagiranye na Asinah nyuma y’uko amenye ko yakuwe mu ndirimbo ya Bruce Melodie

Bruce Melodie na Asinah ubwo bakoranaga iyi ndirimbo muri studio

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza