00:00:00 IGIHE NETWORK KN KINYARWANDA EN ENGLISH FR FRANCAIS

Benshi bamwise umugome: Uko Kwizera ashushanya amafoto adasanzwe y’ibyamamare

Yanditswe na Mahoro Vainqueur
Kuya 22 Ukwakira 2022 saa 11:03
Yasuwe :

Niba ubasha kugera ku mbuga nkoranyambaga, ntibwakira utabonye amafoto y’ibyamamare ubona ko ashushanyije mu buryo bamwe bita bubi, gusa bimaze gufatwa nk’uburyo bwo kwidagadura bugamije gusetsa.

Uramutse uri utanga amanota ku bantu bazi gushushanya, uwakoze aya mafoto ntiwamuha n’atanu ku icumi. Bashingira ku buryo yashushanyije ibyamamare nka Anita Pendo, Shaddyboo n’abandi.

Ayo mafoto y’ibyamamare ashushanywa n’umusore w’imyaka 23 witwa Kwizera Innocent Fabrice, gusa ukiyabona ugira ngo yashushanyizwe n’umwana muto uri kwiga gushushanya.

Uyu musore wo mu karere ka Rubavu yaganiriye na IGIHE atubwira icyamuteye gushushanya muri ubu buryo twakita bwo gutebya kandi budasanzwe.

Yagize ati “Nk’umwana wese natangiye gushushanya kera nkiri muto, ifoto ya mbere nakoze yari iy’inshuti yanjye, atatu ya mbere nakoze yari aya bantu b’inshuti zanjye nyakora ngamije kubasetsa gusa.”

Ibi byatangiye abikorera inshuti ze agamije gutebya yaje kubishyira ku mbuga nkoranyambaga birangira hari abatangiye kumusaba ko nabo yabashushanya.

Ati “Nigeze kubona umuntu washushanyije undi nabi cyane mbishyira kuri Whatsapp, nuko umuntu arambwira ati nanjye nshushanya ndebe ko ubishoboye, ndabikora nanjye mbikora nabi... bikomeza gutyo mbona abantu barabyishimiye!”.

Uyu musore wiga ‘Computer Science’ muri ULK ishami rya Gisenyi avuga ko mu by’ukuri nta buhanga afite mu gushushanya kuko atigeze abyiga.

Aya mafoto yamamaye cyane ku mbuga nkoranyamaba, Kwizera ayakora iyo yumva yabuze icyo akora yabuze icyo ahugiraho.

Agira ati “Ntabwo gushushanya nabyize, mbikora bisanzwe iyo nicaye nabuze nk’ikintu nkora cyangwa icyo naba mpugiyeho.”

Aya mafoto amaze iminsi acicikana ku mbuga nkoranyambaga ukiyabona bwa mbere ugira ngo uwayashushanyije yayakoranye ubugome cyangwa agamije guharabika umuntu.

Igitangaje ni uko bene yo ari bo bafata iya mbere bakayashyira ku mbuga nkoranyambaga zabo ubona ko baba batunguwe nayo.

Uyu musore avuga ko nubwo amafoto ye agaragara nk’akoze mu buryo busebanya nta muntu uramwibasira cyangwa ngo amwihanangirize amubwira ko yamwibasiriye,

Agira ati “Nahisemo kubikora muri ubu buryo bw’urwenya, ntabwo byateza ikibazo kuko iyo umuntu abonye namushushanyije arishima cyane, ubu hari na benshi bajya babinsaba. Abo nashushanyije bose barabyishimiye.”

Uyu musore nyuma yo kubona ko ibi bishimishije abantu yahisemo kubikora ashaka gushimisha abantu nawe atisize kuko iyo abikora aba yisetsa.

Ati “Nahisemo kubikora gutya kugira ngo nshimishe abantu, nanjye ku giti cyanjye kuko iyo ndi gushushanya mba nasetse cyane buriya ntiwareba.”

Ibyo gushushanya ibyamamare yabitangiye nyuma y’uko hari ifoto yari ashize kuri Twitter, nyuma mu gice gitangirwamo ubutumwa abamukurikira bamusaba gushushanya uwo bashaka.

Agira ati “Akenshi abantu bajya bandika ngo dushushanyirize kanaka… ariko ubu hari igihe ntekereza uwo nshaka.”

Ubundi ubugeni ni bimwe mu bintu ushobora gukora bikakwinjiriza menshi gusa Kwizera ntabwo aratangira kubikuramo amafaranga yaba n’ibigo bikora ibitabo by’inkuru zishushanyije ntibiramwegera ngo bakorane.

Ifoto ya Shaddyboo ni uko yashushanyijwe
Anita Pendo ni uku bamushushanyije
Ni uku yashushanyije Kasuku uzwi nka Jay Squeezer
Kwizera ahamya ko atigeze yiga gushushanya akaba abikora agamije gushimisha abantu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .