00:00:00 IGIHE NETWORK KN KINYARWANDA EN ENGLISH FR FRANCAIS

Bayarya bayatamo amarira! Agahinda kihishe inyuma y’inseko ya zimwe mu nkumi zishakira agatubutse i Dubai

Yanditswe na Mukahirwa Diane
Kuya 18 Mutarama 2023 saa 08:27
Yasuwe :

Ese mvuge iki? Ndeke iki? Nkore iki? Ko ibyo amatwi yanjye yumvise atari iby’i Rwanda! Hari inkuru wumva amabere akikora utonsa, ugatekereza ko ushobora kuba uri kurota ariko ugategereza ko ukanguka ugaheba.

Umunyarwanda ni we wise umwana we Nsekambabaye! Nibyo koko hari benshi barangwa n’inseko icyeye kandi imbere mu mutima ari ibisebe bijojoba amaraso.

Muri Kanama 2021, nibwo ku mbuga nkoranyambaga hirya no hino ku Isi hasakaye amashusho y’umwe mu bakobwa bamamaye ku Isi yose kuri TikTok nka ebrahim_ka, avuga iyicarubozo yahuriye na ryo i Dubai ubwo yajyaga kuhashakira amafaranga binyuze mu bagabo.

Ubu ni bwo hahise hatangira inkundura y’icyiswe ‘Dubai Porta Potty’ abakobwa bagaragaza ibikorwa by’agahinda bakorerwa bagiye gushaka abagabo muri uyu mujyi ukomeye mu bucuruzi.

Abakobwa batanze ubuhamya barimo abo muri Ghana, Cameroun n’ahandi, bakagaragaza uko bagiye basambanyishwa n’imbwa, indogobe, kurishwa umwanda wo mu musarani n’ibindi bikorwa bya kinyamaswa bakoreshwa n’Abarabu baba babishyuye akayabo.

Izi ni inkuru zumvishwe na benshi ariko Abanyarwanda ntibyigeze bidushishikaza cyane kuko nta watekerezaga ko hari Umunyarwandakazi bishobora kubaho.

Ibyo benshi bibwira si ko bimeze kuko iri rimbukiro abakobwa bo hirya no hino bari kujyamo ryageze no muri bamwe mu Banyarwandakazi ariko nta wushobora gutinyuka kubigarukaho.

Aha nimvuga Abanyarwandakazi ntimuntere amabuye, si bose mvuze yewe ubanza atari na benshi, ariko ku rundi ruhande n’iyo yaba umwe aba yamaze gutukisha abandi bose.

Hashize imyaka itageze ku icumi ku mbuga nkoranyambaga hatangiye inkundura y’abakobwa bashyira amafoto hanze bari mu Mijyi ikomeye cyane Dubai baryohewe n’ubuzima ubona ko buhenze cyane.

Benshi mu bakurikiranira hafi aba bakobwa bemeza ko iyo urebye ubuzima buhenze baba barimo i Dubai, bwashoborwa na bake mu batuye i Kigali dore ko benshi muri bo usanga nta kazi kazwi bakora katuma binezeza muri ubwo buryo.

Aha niho bahera bavuga ko umubare mwinshi w’abajyayo baba bagiye kwicuruza ku bagabo b’Abarabu n’abandi banyamahanga baba barahiriwe n’ubuzima babaha akayabo k’amafaranga ariko bakayarya bayatamo amarira.

Intimba n’agahinda Umunyarwandakazi yahuriye na byo i Dubai

Nk’uko nabivuze haruguru hari inkuru wumva ukagira ngo uri kurota kuko ntabwo uba wumva uko ibyo bintu byashobotse, kandi uri kuyibwirirwa na nyirayo.

Umubyeyi ni izina ryahinduwe ry’umwe mu bakobwa bamamaye ku mbuga nkoranyambaga, benshi baramuzi kuko akurikirwa n’ibihumbi ku rubuga rwa Instagram.

Iyo unyuze kuri uru rubuga nawe wakwifuza kubaho nk’uko abayeho kuko hariho amafoto ari mu mijyi myiza ikomeye, ari kunywa inzoga zihenze yambaye imyambaro ikorwa n’inganda zikomeye ubona ko ubuzima bwamubanye Fanta.

Mu mezi make ashize nagize amahirwe yo kuganira n’uyu mukobwa, nari mfite amatsiko menshi yo kumenya icyo akora gituma ahora atembera kandi akabaho ubuzima buryoshye.

Byatangiye tugirana ikiganiro agerageza kunyumvisha uburyo gutembera bidahenda, ku mafaranga ufite ushobora kubigeraho ariko nkomeza kumusobanuza byinshi, agerageza kumbwira inkuru zitumvikana neza.

Icyo gihe sinanyuzwe mbona ko hari byinshi inseko ye nziza ihishe kuko nakomezaga kuvuga kuri Dubai, akansubiza ibintu ubona atemeranya n’umutima we akavuga ibyiza byaho ariko amarira azenga mu maso.

Twaratandukanye ariko nkomeza kumutekerezaho cyane nibaza impamvu asobanura iby’ubuzima bwiza abayemo ariko isura ye yatashywe n’agahinda. Nakubise umutima ku nkuru za ‘Dubai Porta Potty’ nari maze igihe numva ibikoba birankuka.

Byanyanze mu nda nkomeza kumukurikirana cyane ku mbuga ze no mu buzima busanzwe uko yitwara, mbona ko hari byinshi bihishe inyuma y’ubuzima bwiza yerekana.

Umutima wanjye wakomeje kunyibutsa za nkuru abandi bakobwa bavuze z’ibyo bahurira nabyo i Dubai ko na we yaba yarahuye nabyo.

Rimwe namusabye ko twahura tukaganira ambwira ko byaba byiza mu masaha y’igitondo kuko ku mugoroba aba yagiye kubonana n’umuganga we kandi ko adakunda kuba mu Rwanda byagorana kubonana.

Amakenga yarushijeho kuba menshi nibaza indwara arwaye ituma ahora abonana n’umuganga buri mugoroba, nakomeje kumuba hafi aza kumbwira ko aba yagiye kubonana n’umuganga ufasha abantu bafite ibibazo byo mu mutwe.

Nabigize urwenya kugira ngo atumva ko ndi kumukurikirana, nti warasaze se? nk’uko bisanzwe mu nseko ye y’imbereka yaransubije ati “Hoya sha ahubwo ni agatoroma gato nagize ariko bizashira vuba. Nta birenze.”

Nahise numva ko ibyo umutima wanjye wambwiye utigeze umbeshya, ahubwo nshyira imbaraga mu kumenya icyamubayeho cyatumye agira ihungabana. Ibi nabihuzaga n’imico namubonanaga ihindagurika.

Mu busanzwe ni umukobwa utuje ukunda kuganira kandi ukunda abantu gusa haba igihe ahinduka mu buryo butunguranye akarangwa n’umushiha ndetse akavuga ko abantu arizo nyamaswa za mbere mbi.

Ibi byose byatumye ndushaho kumukurikirana tukajya tuganira byinshi ndetse nkamubwira bimwe mubyo atekereza ko ntakabaye mubwira kugira ngo amfate nk’umwizerwa mu buzima bwe.

Twaje kuba inshuti z’akadasohoka ku buryo nta banga ryari hagati yacu. Rimwe twigeze kuganira birambuye kuko nari nzi icyo nshaka kumwumvaho naganishaga ibiganiro aho yambwira ibyo amatwi yanjye ashaka.

Rimwe namubwiye ko mba nifuza kujya Dubai nanjye nkabaho nk’ubuzima babaho.

Adatinze nk’umuntu twari tumaze kuba inshuti, mu ijwi rituje yarambwiye ati “Burya ibishashagirana byose si zahabu.”

Uyu mwanya nawukoresheje neza mubwira ko mba mbona afite byinshi ahishe kandi ko umutima we uremereye. Niko guturika ararira ati “Byinshi bindimo ni umwanda ntashobora kubona uko navuga.”

Nakomeje kwinginga ni uko ambwira inkuru y’uko byamugendeye kandi atari we wenyine uri muri uku kuzimu ahubwo ko Abanyarwandakazi benshi baharimbukiye.

Yagize ati “Havumwe umunsi nagiye ku mbuga nkoranyambaga kuko nta handi nari kuzahurira na bariya baburagasani, bambeshye ibyiza bakanyangiriza ubuzima ubu nkaba ntuye mu Isi y’umwijima.”

Mwa bantu mwe uyu wakabaye wari umwanya mwiza wo kumva ibyo nahoze nshaka ariko natangiye kwicuza impamvu nabyishoyemo.

Bimwe mu byo amatwi yanjye yumvise uwo munsi byanteye ubwoba bukomeye ntazi igihe buzashirira.

Umubyeyi yamfunguriye umutima ambwira amabanga asanzwe aziranyeho n’abakobwa bajyana i Dubai n’umuganga umuvura kuko ibyo yahuye nabyo byamuteye indwara y’agahinda gakabije.

Umucanga w'i Dubai uri mu ikurura benshi bakurana inzozi zo kuzatembera muri uyu mujyi

Mu 2017 nibwo Umubyeyi yigaga muri Kaminuza i Kigali aza kwandikirwa n’umusore w’umunyarwanda wabaga muri Kenya, amubwira ko ari umukobwa mwiza ukwiye ibyiza.

Bakomeje kuganira aza kumwibira ibanga ry’uko ashobora kubona amafaranga menshi mu gihe gito kandi atavunitse, yamubwiye ko azamuhuza n’umukire w’i Dubai akagenda bakishimana bakaryamana akamuha amafaranga.

Umubyeyi avuga ko yabanje kwanga ariko aza kubyemera bitewe n’uburyo yamwerekaga ubuzima abandi bakobwa yarangiye akazi nk’ako babayemo.

Yaje kumuhuza n’umugabo amwemerera ibihumbi 30$ ubwo ni hafi miliyoni 30Frw.

Umubyeyi yagize ati “Bambwiye miliyoni 30 kandi ngo ashobora kuzamuka ndavuga nti aya sinayitesha reka njyeyo rimwe nzagaruka mpite nkora ubucuruzi nta kibazo.”

Nubwo yabyemeye yumva ari irembo ry’ubukire bwe ariko yahahuriye n’uruva gusenya kugeza ubwo yifuje kwiyambura ubuzima.

Umubyeyi avuga ko yumvikanye byose afata rutemikirere yerekezayo kuko yari yamaze guhabwa ibimbi 10$ n’amatike y’indege. Uyu mukobwa avuga ko yagezeyo ibintu ari byiza gusa bihinduka vuba.

Ati “Nagezeyo ari nijoro haza umuntu kumfata w’umwirabura angeza hamwe kuri wa mwarabu nagombaga kujyaho, aranyakira nta kibazo anyereka aho kuryama mbona ari nta kibazo.”

Yakomeje ati “Mu rukerera yansanze mu cyumba ansaba gufata ibintu byanjye tukajya ahandi ndabikora tugenda mu modoka ku buryo ntabashaga kubona hanze ntazi n’aho najyaga.”

Uyu mukobwa avuga ko aho ariho ibintu byahindukiye atangira kwibaza icyatumye ajya aho hantu.

Ati “Twageze ahandi mu yindi nzu yari irimo abagabo babiri, bazana inzoga n’ibindi biyobyabwenge na shisha mbabwira ko nywa inzoga ariko nta bindi ndi bufate, wa mugabo ambwira ko ngomba kubinywa kugira ngo nze kuryoshya imibonano nuko arabinywesha.”

“Natangiye kubona ko ibintu bitari buze kunyorohana ubwo aho twari twagiye nta internet yari ihari ngo mbashe kuba nanatabaza, ubwoba butangira kuntaha ariko nta kindi nari gukora.”

Umubyeyi yakomeje kumbwira inkuru y’iyicarubozwo yakorewe mu minsi itanu yahamaze.

Ati “Hashize akanya meze nk’uwasinze ba bagabo bamenaho amazi akonje cyane ngarura ubwenge, bose bakuramo amapantalo uko ari batatu bambwira ko ngomba konka ibitsina byabo kugeza mbahaye ibyishimo, nabanje kwanga ariko batangira kunkubita ndabikora hafi amasaha abiri.”

Yakomeje ati “Naratatse mbura uwantabara, ndarira bigeraho ndahora, gusa ibyo nigiraga byari imiteto kuko ntacyo nari nakabonye. Umwe twazanye yambwiye kujya kuryama kuko ngo undi munsi nari mfite akazi gakomeye.”

Biragoye ko uyu mukobwa yari kuryama ngo asinzire akurikije ibyari bimaze kumubaho, yatangiye kwibaza uko biri bugende nuko yava aho hantu gusa asanga nta nzira.

Ku munsi ukurikiye wa mugabo bumvikanye yaje kumukura mu cyumba yari arimo kugira ngo ajye kumutembereza amujyana ahantu hatandukanye aramufotora amutegeka gushyira ya mafoto hanze agaragaza ko aryohewe n’ubuzima kandi yari amuhagaze hejuru ku buryo nta muntu yari kwandikira amwaka telefoni arangije.

Umubyeyi yavuze ko umunsi mubi yahuye na wo mu buzima watumye ahahamuka ari umunsi aryamana n’imbwa ibintu atari yarigeze atekereza.

Ati “Nari namaze kubona ko no gupfa nshobora kuza gupfa! Byarangiye nihebye, bazanye umugabo w’umukire cyane avuga ko amafaranga nemerewe ayakuba kabiri ariko nkamushimisha.”

“Uwo mugabo ashimishwa no kureba amashusho y’urukuzosoni atandukanye niko kuvuga ko ari bunezezwe no kubona ndimo ndyamana n’imbwa ye akunda cyane. Bampambiriye imigozi batera imbwa imiti bazana umugabo ufite imbaraga akajya ayinshumuriza.”

Ibi bintu byanteye ubwoba mbaza Umubyeyi niba ibyo bintu byarabaye koko ambwira ko byabayeho kandi inshuro zirenze imwe kuko iki ari ikintu aba bagabo bakunda cyane.

Iyo nza kumubaza uko yiyumvaga nari kuba ngiye kumushinyagurira kuko namwe murabyumva ni agahinda.

Umubyeyi yavuze ko Abarabu benshi birata ku buryo badashobora kuryamana n’abirabura ahubwo babakoreraho ibikorwa byo kwishimisha gusa.

Ibi byararangiye bamuhundagazaho amafaranga baramutembereza bamutegera indege agaruka i Kigali.

Akigera inaha yari afite hafi ibihumbi 50$ hafi miliyoni 50Frw aguramo imodoka nziza yimukira ahantu heza ndetse agahora asohoka kugira ngo yiyibagize bimwe yahuye nabyo, ari nako akomeza kuryamana n’abagabo bamuha amafaranga ariko agamije kwiyibagiza ibyo yabonye.

Amatwi arimo urupfu ntiyumva

Ukurikije ibyo wumvise uyu yakabaye ari umukobwa wagarutse i Kigali agakizwa, ubu tukaba tumuzi atanga ubuhamya, abuza abantu kwirukira ibishashagirana, nyamara siko byagenze.

Umubyeyi wari wamaze kuba igiharamagara yaje gukomeza kuvugana na wa mwarabu wamukoreye ibya mfura mbi amubwira ko biriya byabaye kuko bwari ubwa mbere ariko bakorana akajya amushakira abagabo baryamana bisanzwe.

Uyu mukobwa yarabyanze gusa ubwo ibihe bya #Gumamurugo byarangiraga mu 2020 yari afite ubukene bwinshi, yibaza uko agiye gusubira mu buzima busanzwe.

Umubyeyi yavuze ko yasubiye i Dubai ariko ubu ari bwo abona ko yari yarasaze kuko na we atazi uburyo yahageze, ariko ibyo yabonye byamuhungabanyije ku buryo atacyifata nk’umuntu.

Yagize ati “Twagiye turi abakobwa batatu, tukajya dushaka abagabo hariya tukaryamana gusa naje gukorerwa igisa n’igambanirwa bagenzi banjye baransiga, bituma ndyamana n’abagabo batatu icyarimwe baranyangiza ku buryo n’amafaranga nakuyeyo menshi nayivujemo.”

Uyu mukobwa yagarutse mu Rwanda ariko ubuzima bwe bwarangiritse abanza kwivuriza imyanya y’ibanga yangiritse muri Kenya, ndetse atangira kujya ahahamuka umuryango we umufasha kubona abavuzi b’indwara zo mu mutwe.

Ibibazo bye byarenze benshi mu baganga b’ino aha ubu yagiye gushakira ubuvuzi mu bihugu by’i Burayi.

Iyi nkuru yarangiye numva narakaye mubwira ko agomba kurega abo bantu afatanyije n’abandi banyarwandakazi azi bajyayo, icyakora yahise aturika aranseka ambwira ko bidashoboka kuko ibyo bakora byose baba babyemeye hari n’abasinya amasezerano ahubwo ko barangazwa n’amafaranga bahabwa, ikindi ko uwo mwaryamanye cyangwa uwakujyanye udashobora kongera kumubona.

Uretse kuba umujyi w'ubucuruzi,Dubai ni n'umujyi w'ubukerarugendo icyakora ikaberamo ibibi byinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .