00:00:00 IGIHE NETWORK KN KINYARWANDA EN ENGLISH FR FRANCAIS

Batatu batsinze muri ArtRwanda-Ubuhanzi icyiciro cya mbere, bitabajwe mu Kanama Nkemurampaka

Yanditswe na Uwiduhaye Theos
Kuya 10 June 2022 saa 01:35
Yasuwe :

Mugabe Adélard, Umutoni Grace na Mugisha Benoît bose banyuze mu cyiciro cya mbere cya ArtRwanda-Ubuhanzi, bashyizwe mu kanama nkemurampaka k’icyiciro cya Kabiri cy’iri rushanwa rigamije gushakisha impano.

Ni icyiciro cya kabiri cyatangiriye mu Karere ka Rubavu mu Burengerazuba bw’u Rwanda kuri uyu wa Gatanu, tariki 10 Kamena 2022. Abanyempano 69 bahuriye kuri Centre Culturel Vision Jeunesse Nouvelle.

Abagize Akanama Nkemurampaka barimo Cyurinyana Vestine, Mugisha Benoît, Mugabe Adélard, Uwimana Seleman, Nzabagenderaneza Théoneste na Umutoni Grace.

Mugisha Benoît ni umuhanga mu gufata amashusho n’amafoto, umwuga amazemo imyaka 12.Uyu munyempano w’imyaka 32 yashinze ikigo yise Dream Art Ltd ndetse kiri mu byamufashije kwinjira neza mu Cyiciro cya Mbere cya ArtRwanda- Ubuhanzi.

Kuri ubu ni Umuyobozi wa Reba Visuals Ltd ndetse ari mu bayobozi w’amashusho muri Filime y’Uruhererekane ‘Ejo ni Heza’.

Mugabe Adélard w’imyaka 24 ni umubyinnyi wabigize umwuga. Uyu musore akoresha imbyino mu kubara inkuru zitandukanye. Yagaragaye mu bitaramo bitandukanye birimo Iwacu Muzika ndetse yanabyinnye muri BAL.

Nzabagenderaneza Théoneste w’imyaka 33, ni umwarimu muri Ecole d’Arts de Nyundo aho yigisha ibijyanye n’Ubugeni. Akora ibijyanye n’ubugeni mberajisho [Scripture] akaba abimazemo imyaka umunani.

Umunyamideli, Umutoni Grace na we uri mu bagize akanama nkemurampaka wanyuze muri ArtRwanda-Ubuhanzi. Avuga ko ari ikiraro cyamugejeje ku nzozi ze ndetse anavuga ko yifuza kwagura ibikorwa bye bikagera hose muri Afurika.

Ati “ArtRwanda- Ubuhanzi ni abatoza n’icyizere. Ntibakureka ngo uteshuke ku ntego wihaye. Ntibaturetse ngo twirwaneho, bakomeje kubana natwe batugira inama. Ubu dukora imyenda ya Made in Rwanda, tugurisha cyane i Rubavu no muri RDC. Kuko dukora ibintu byiza tubigemura muri Kigali. Nterwa ishema n’imbaraga no kuba ubumenyi bwanjye narabukoresheje.”

Umutoni Grace ni Umunyamideli wanyuze muri ArtRwanda-Ubuhanzi mu Cyiciro cya Mbere. Afite inzu y’imideli ikora iyo yise ‘Toni Grace’. Imyambaro akora ayigurisha mu Rwanda no mu bihugu bitandukanye byiganjemo ibyo muri Afurika y’Iburasirazuba.

Uwimana Seleman we atunganya filime. Yakoze iy’uruhererekane yitwa ‘Urusobe’. Yakinnye filime zitandukanye zirimo z’izo ku rwego mpuzamahanga. Yize gukora sinema muri Kwetu Film Institute na Yole Africa muri Repubulika Iharanira Demokarasi ya Congo.

Cyurinyana Vestine ni we ukuriye Akanama Nkemurampaka. Ni Umuyobozi w’Abahanzi mu Karere ka Rubavu. Yiyumva cyane mu muziki n’imbyino gakondo. Mu gusigasira umuco, yashinze Itorero yise ‘Nyampinga Ihumure Drama Nyundo’.

Irushanwa rya ArtRwanda-Ubuhanzi rigamije gushakisha no gushyigikira impano z’abakora Ubugeni, Indirimbo n’Imbyino, Imideli, Ikinamico n’Urwenya, Gufotora na Sinema, Ubusizi n’Ubuvanganzo. Ababarizwa muri ibi byiciro banyuze imbere y’Akanama Nkemurampaka berekana impano zabo.

Mugisha Benoît ni umuhanga mu gufata amashusho n’amafoto, umwuga amazemo imyaka 12. Uyu na we yanyuze muri ArtRwanda-Ubuhanzi mu Cyiciro cya Mbere
Mugabe Adélard w’imyaka 24 ni umubyinnyi wabigize umwuga. Abimazemo imyaka 10 abikora na we yamenyekanye anyuze muri ArtRwanda-Ubuhanzi
Umunyamideli Umutoni Grace na we uri mu bagize Akanama Nkemurampaka. Yazamuriye izina muri ArtRwanda-Ubuhanzi avuga ko ari ikiraro cyamugejeje ku nzozi ze ndetse anavuga ko yifuza kwagura ibikorwa bye
Cyurinyana Vestine ni we wari ukuriye Akanama Nkemurampaka i Rubavu
Uwimana Seleman na we uri mu Kanama Nkemurampaka atunganya amafilime. Yakoze iy’uruhererekane yitwa ‘Urusobe’. Yakinnye filime zitandukanye zirimo z’izo ku rwego mpuzamahanga
Nzabagenderaneza Théoneste w’imyaka 33, ni umwarimu muri Ecole d’Arts de Nyundo aho yigisha ibijyanye n’Ubugeni. Akora ibijyanye n’ubugeni mberajisho [Scripture], abimazemo imyaka umunani
Mugabe Adélard, Umutoni Grace na Mugisha Benoît bose banyuze mu cyiciro cya mbere cya ArtRwanda-Ubuhanzi (babanza uhereye ibumoso) bahawe rugari mu kanama nkemurampaka

Amafoto: Darcy Igirubuntu


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .