00:00:00 IGIHE NETWORK KN KINYARWANDA EN ENGLISH FR FRANCAIS

Hashyizweho ibihembo bidasanzwe ku banyeshuri bazitabira igitaramo cya The Ben

Yanditswe na Nsengiyumva Emmy
Kuya 22 July 2022 saa 11:17
Yasuwe :

Ubuyobozi bwa Est Gold yateguye igitaramo cya ‘Rwanda Rebirth Celebration’ cyatumiwemo The Ben, bwahishuye ko amafaranga azakivamo bazatangamo mituweli 150 n’abanyamahirwe batanu batsindire amafaranga y’ishuri y’umwaka utaha wose.

Ibi byagarutsweho na Rwigema Gedeon uhagarariye itsinda riri gutegura iki gitaramo, uyu akaba yavuze ko mu rwego rwo kwizihiza kuba u Rwanda rwarongeye rukavuka nabo biyemeje ko amafaranga azakivamo azagira uruhare mu mibereho y’Abanyarwanda.

Mu kiganiro cyihariye yagiranye na IGIHE, Rwigema yagize ati “Twatekereje ko amafaranga azava mu gitaramo cya ‘Rwnada Rebirth Celebration’, hari ayo twasubiza mu Muryango Nyarwanda. Tuzatanga mituweli 150 ku batishoboye ndetse abanyamahirwe batanu bazatsindire amafaranga y’ishuri.”

Rwigema avuga ku banyamahirwe bazatsindira amafaranga y’ishuri, yashimangiye ko umunyeshuri wese uzaba waguze itike, izahita imwinjiza mu banyamahirwe bashobora gutsindira amafaranga y’ishuri umwaka wose. Abanyeshuri ba kaminuza nabo bari mu bemerewe kuzishyurirwa baramutse batsinze.

Ikindi yavuze ni uko mu gutanga amafaranga y’ishuri atazashingira ku kigo umunyeshuri azaba yigaho, ati “Abanyamahirwe bazatsinda nibo bazatubwira aho bigaga tujye kubishyurira umwaka wose. Ntabwo tuzaba tureba ngo ni ikigo gihenze cyangwa iki.”

Amatike yo kwinjira mu gitaramo ‘Rwanda Rebirth Celebration’ cyatumiwemo The Ben, yatangiye gucuruzwa aho abari kuyagura mbere bari kuyabona ku bihumbi 10 Frw mu myanya isanzwe n’ibihumbi 20 Frw mu myanya y’icyubahiro.

Abazagurira amatike ku muryango bazaba bayagura ibihumbi 15 Frw mu myanya isanzwe n’ibihumbi 35 Frw mu myanya y’icyubahiro.

Abanyeshuri bahawe umwihariko muri iki gitaramo kuko basabwa kwishyura ibihumbi 5 Frw naho ameza yo muri VIP akazaba agura ibihumbi 50 Frw.

Uretse The Ben, iki gitaramo kizaririmbamo abanda bahanzi nka Bwiza, Kenny Sol na Chris Eazy bari mu bashya ariko banagezweho mu muziki, Marina na Bushali.

Iki gitaramo kitezweho kuzuza Canal Olympia ijyamo abantu ibihumbi 15, kizayoborwa na Anita Pendo afatanyije na MC Tino kikazanacurangamo DJ Toxxyk afatanyije n’itsinda ry’abakobwa bashya muri uyu mwuga ariko bagezweho ari bo; DJ Higa na DJ Rusam.

Nyura hano ubashe kugura amatike yo kwinjira muri iki gitaramo


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .