Bahavu Jeannette yavuze ku gihombo gikomeye yatewe no gusubika ubukwe kubera Covid-19

Yanditswe na Nsengiyumva Emmy
Kuya 27 Mutarama 2021 saa 08:01
Yasuwe :
0 0

Usanase Bahavu Jeannette umaze kubaka izina muri sinema nyarwanda by’umwihariko akaba akunzwe cyane muri filime ‘Impanga series’, yavuze igihombo gikomeye yatewe no gusubika ubukwe bwe ku munota wa nyuma bitewe n’ingamba zo gukumira ikwirakwira ry’icyorezo cya Covid-19.

Bahavu Jeannette, icyorezo cya Covid-19 cyongeye gukaza umurego amaze iminsi mike asezeranye mu murenge n’umugabo we Ndayirukiye Fleury uzwi nka ‘Legend’.

Nyuma yo gusezerana imbere y’amategeko, byari byitezwe ko azakurikizaho imihango yo gusaba no gukwa hanyuma bagasezerana imbere y’Imana byose byari biteganyijwe mu Ukuboza 2020.

Nk’uko byari byatangajwe bikanasohoka ku mpapuro ziteguza ubukwe bw’aba bombi, tariki 17 na 20 Ukuboza 2020 nibwo hari hategerejwe ibirori byakomwe mu nkokora n’ingamba zo kwirinda ikwirakwira rya Covid-19.

Bahavu Jeannette avuga ko yagize igihombo gikomeye yatewe n’isubikwa ry’ubukwe bwe, igihombo cye akibara mu buryo bubiri.

Ubwa mbere avuga ko yahombyemo ni umwanya, ati “Ubukwe buri wese arabizi ukuntu buvuna kubutegura, hari igihe cyageze duhagarika ibindi byose twakoraga kugira ngo imbaraga zose zijye mu myiteguro.”

Bahavu avuga kandi ko bahombye mu buryo bw’amafaranga (nubwo yirinze gutangaza umubare wayo). Aha yavuze ko nk’abantu bahagarikiwe ubukwe habura igihe gito ngo bube byibuza 80% y’ibyo bari kwishyura bari barabirangije.

Ati “Ibintu byose byari gukenera amafaranga twari twarabyishyuye, ntabwo twizeye neza niba abo twayahaye bazadukorera bataduciye andi. Icyo ni igihombo.”

Yavuze ko nubwo wenda abo bari barishyuye bashobora kuzongera kubakorera batabaciye andi mafaranga, ariko kuba byibuza batari no kuyakoresha ngo abe yunguka nabyo basanga ari igihombo.

Uyu mukobwa yavuze ko bishobora kugorana ko umuntu afata icyemezo cyo kongera gutegura ubundi bukwe nyuma y’iki gihombo.

Ati “Ibi byemezo hari benshi bishobora kuzatuma bishyingira, urebye nkatwe twari twamaze gusezerana imbere y’amategeko, hari abahita biyemeza kubana aho kongera gutakaza amafaranga n’ikindi gihe.”

Ingamba zo kwirinda Covid-19 zamusubikiye ubukwe yazikozemo filime

Kuva hashyirwaho gahunda ya #GumaMuRugo mu rwego rwo gukumira ikwirakwira rya COVID-19, Bahavu yatangiye gukora indi filime yitwa ‘Impanga Lockdown’ igaruka ku buzima bw’urubyiruko mu bihe bya Guma mu rugo.

Ni igitekerezo Bahavu avuga ko yagize mu rwego rwo gukomeza gususurutsa abakunzi ba filime ze nyuma y’uko hashyizweho ingamba zo kuguma mu rugo zatumye agorwa no kongera guhuza abakinnyi ngo afate amashusho ya filime yari asanzwe akina yitwa "Impanga series".

Impanga Lockdown ni filime ikubiyemo ubutumwa bw’abakobwa babiri b’impanga ibihe bya #Gumamurugo byasanze bari bonyine.

Harimo Keza ukunda ubuzima buryoshye uba atorohewe no kuguma mu rugo mu gihe Kami bavukana we aba agerageza kumusobanurira no kumufasha kwakira ubushya batangiye.

Yavuze ko nyuma yo kubona ibihe byo kuguma mu rugo byongeye gushyirwaho muri Kigali, aribwo yafashe icyemezo cyo gutangira gutunganya iyi filime mu rwego rwo kumara irungu abakunzi be bari mu ngo.

Kugeza ubu Bahavu avuga ko afite filime azerekana mu gihe cyingana n’ukwezi, icyakora ahamya ko mu gihe ingamba zo kuguma mu rugo zakomeza, yagerageza kureba uko yafata andi mashusho ku buryo abakunzi be batagira irungu.

Usanase Bahavu Jeannette ubwo yasezeranaga imbere y'amategeko
Ubukwe bwigijwe inyuma kubera icyorezo cya Covid-19
Bahavu avuga ko we n'umugabo we biteguye kuzasubukura ubukwe icyorezo cya Covid-19 nikigenza make

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .