00:00:00 IGIHE NETWORK KN KINYARWANDA EN ENGLISH FR FRANCAIS

Baba bapfa umugore? Icyihishe inyuma y’urwango nk’urw’injangwe n’imbeba hagati ya 50 Cent na P.Diddy

Yanditswe na Uwiduhaye Theos
Kuya 1 June 2024 saa 06:24
Yasuwe :

Mu ndirimbo “Mo Money Mo Problems’’ ya The Notorious B.I.G. Mase na "Puff Daddy" Combs cyangwa se P Diddy, aba bahanzi bagaragaza ko uko umuntu agenda agira amafaranga menshi ariko ibibazo bikomeza kuba uruhuri aho kugabanyuka.

N’ubwo ari indirimbo yagiye hanze mu 1997 kuri album ya nyuma ya The Notorious B.I.G. yise “Life After Death’’ yashyizwe hanze amaze iminsi 16 yishwe arashwe, bamwe bongeye kuyihanga amaso no kuyitekerezaho nyuma yaho P. Diddy yashyizweho igitutu ashinjwa ibyaha byiganjemo ibyo guhohotera abagore.

Bagaragaza ko nyuma yo kuza ku rutonde rw’abaraperi bakize ku isi muri 2022; ibibazo byamwirundumuriyeho mu buryo butavugwaho rumwe.

Kuva mu mwaka ushize Sean “Diddy” Combs[P.Diddy] ameze nk’uwicariye inkono ishyushye biturutse ku birego bitandukanye by’ihohotera byazamuwe n’abagore n’abagabo barangajwe imbere na Cassie Ventura bakundanye nyuma bakaza gutandukana.

Ni inkuru yasamiwe hejuru n’abanzi b’uyu muraperi wamamaye cyane ku Isi ndetse akaza kuza mu ba mbere batunze agatubutse, mu banzi ba hafi babyiniye ku rukoma ku isonga haje mugenzi we w’umuraperi Curtis James Jackson wamamaye nka 50 Cent.

Uyu muraperi guhera umwaka ushize yatangiye kwibasira mugenzi we mu buryo bweruye ndetse akagaragaza ko ari mu ruhande rw’abari kumuha inkwenene. Ni ibintu byagiye bigaragarira mu butumwa butandukanye bwa 50 Cent bwo guhera umwaka ushize.

Mu butumwa bwerekana ko aba bombi kuva kera batajya imbizi, urebeye ku buheruka bwa 50 Cent ku mbuga nkoranyambaga uhita ubona ko bombi bafitanye amasinde atoroshye.

Nko mu minsi ishize 50 Cent yanditse ku mbuga nkoranyambaga agaragaza ko yamaze kugurisha umushinga wa filime mbarankuru na Netflix igaruka ku birego bishinjwa P.Diddy. Iyi filime bayise “Diddy Do It?”.

Utereye amaso ku rukuta rwa Twiter rw’uyu muraperi wamamaye mu ndirimbo zirimo iyitwa ‘In Da Club’ yamamaye cyane, hariho ubutumwa bunnyega P.Diddy nyuma yaho Cassie avuga ku mashusho aheruka gushyirwa hanze na CNN yo mu 2016 uyu muraperi ari guhondagura uyu mukobwa bakundanye.

Mu butumwa bwa Cassie agaragaza ko yabayeho mu bihe by’umwijima biturutse ku ihohoterwa ndetse bikaba bikimukurikirana cyane ko akiri mu rugendo rwo gukira ibikomere byamuteye. Bwaje nyuma yaho P.Diddy asabye imbabazi ku bw’amashusho ye amukubitira muri hotel.

Ubu butumwa bwa Cassie, 50 Cent yabwifashishije yongera gukora mu jisho P.Diddy arandika ati “Ntegerezanyije amatsiko indirimbo nshya ya Cassie.”

Urwangano si urw’ubu…

Mu 2006, 50 Cent yashyize hanze indirimbo yise “The Bomb’’ aho yumvikanaga yibasira uyu muraperi mugenzi we P.Diddy. Iyi ndirimbo yumvikanamo urusaku rw’amasasu ndetse 50 Cent akumvikana ashinja uyu muraperi ko azi uwishe The Notorious B.I.G. wabarizwaga muri label ya P.Diddy izwi nka Bad Boy Records.

Th Notorious B.I.G yishwe mu 1997 ubwo we n’abo bakoranaga, barimo P.Diddy bari bari gutembera; ariko ntabwo bari mu modoka imwe ubwo Notorious yicwaga. Kugeza ubu nta n’umwe wigeze ahamwa n’icyaha cyo kwica uyu musore.

Muri iyi ndirimbo kandi 50 Cent agaragaza ko P.Diddy azi abishe Tupac Shakur mu 1996. Mu 2016 mu kiganiro yagiranye na “The Breakfast Club’’ yahakanye ibi byose avuga ko nta hantu na hamwe yigeze ahurira n’abishe aba baraperi bombi. Agaragaza ko ibyo 50 Cent yamuvuzeho ari ‘amahomvu’.

Uretse iyi ndirimbo 50 Cent yagiye yumvikana mu bindi bihe bitandukanye yibasira P.Diddy. Bamwe batekerezaga ari ukwamamaza ibihangano by’aba bahanzi cyangwa gushaka gukomeza guhangwa amaso; cyane ko bose bamamazaga ibinyobwa bya Vodka aho 50 Cent yamamazaga Effen Vodka mu gihe P.Diddy yamamazaga Ciroc.

P.Diddy yahakanye ‘beef’ ye na 50 Cent

Muri 2018 muri “The Breakfast Club” P.Diddy yabajijwe niba hari ‘beef’ afitanye na 50 Cent abihakana yivuye inyuma. Ati “Ntabwo mfitanye ‘beef’ na 50 Cent. Arankunda. Mwese ntabwo mubona ko ankunda? Mutekereza ko ari urwango? Iyo abikoze biba bisekeje kuri njye. Ntabwo mbyegereza umutima[...] ntabwo nigeze muvuga nabi, murabizi, uwo si njye.’’

Umuhungu wa P.Diddy witwa Christian Combs cyangwa se King Combs w’imyaka 26, aheruka gushyira hanze indirimbo yise “Pick a Side’’ aho asubiza 50 Cent umaze igihe yibasira se.

Uyu muhungu wa Diddy n’umuvandimwe we Justin muri Werurwe uyu mwaka bambitswe amapingu ubwo urugo rwa se, rwasakwaga. Gusa, nta n’umwe muri bo wigeze afungwa.

King Combs yavuze ko se arengana, arangije ati “Ibyo bihuha byose[...]rekera kubeshya.’’

Nyuma yaho 50 Cent yanditse ubutumwa arabusiba, avuga ko atewe impungenge n’ubuzima bwe. Ati “Ndabinginze ntimunkomeretse.’’

Hari abakeka ko urwango hagati y’aba bahanzi rwenyegejwe n’umukobwa witwa Daphne Joy, bashobora kuba barapfuye!

Mu rwangano ruri hagati ya 50 Cent na P.Diddy hari abakeka ko umugore witwa Daphne Joy yaba ari umwe mu benyegeje inkubiri yo guterana amagambo. Uyu mukobwa w’imyaka 37 usanzwe ari umunyamideli yanagiye agaragara muri filime zitandukanye.

Uretse ibyo ni n’umwe mu bakoresha urubuga rwa OnlyFans ruzwiho gukoreshwa n’abakobwa bacuruza amashusho n’amafoto by’urukozasoni. Daphne Joy yakundanye na 50 Cent hagati ya 2011 na 2012. Banafitanye umwana babyaranye bise Sire Jackson, wavutse muri Nzeri 2012 mbere y’uko batandukana.

Ntabwo bizwi neza niba Daphne Joy yarakundanye na P.Diddy gusa bagiye bagaragara bari kumwe mu myaka yahise. Muri Nzeri 2022 uyu mukobwa yashyize hanze amashusho ari kureba uyu muraperi ari kuririmba muri iHeartRadio Music Festival.

Mu Ugushyingo 2022 uyu mukobwa yifurije isabukuru nziza P.Diddy yise ‘umuntu we w’ingenzi’. Joy muri uyu mwaka yumvikanye mu kirego uwitwa Rodney Jones yaregagamo P.Diddy, aho uyu mukobwa yumvikanye ashyirwa mu majwi y’abakobwa batatu nawe arimo yise ‘indaya’.

Daphne Joy yarabihakanye ahubwo ashinja 50 Cent ihohotera rishingiye ku gitsina, no kwihunza inshingano za kibyeyi.

P.Diddy na 50 Cent baamaze imyaka myinshi batajya imbizi
Aba bahanzi bamaze imyaka myinshi batumvikana ndetse byongeye kwigaragaza ubwo P.Diddy yari ari mu mazi abira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .