‘Art-stars band’ ya Ras Kayaga yegukanye igihembo nyamukuru muri iri rushanwa, yahise itsindira amasezerano y’akazi ko gucuranga muri Kigali Marriott Hotel mu gihe cy’umwaka wose, aho bazahembwa agera kuri miliyoni 15Frw.

Aba baguwe mu ntege na Paco XL Band yabaye iya kabiri, igenerwa miliyoni 2Frw, naho ku mwanya wa gatatu haza itsinda ryitwa Umuduli Band, ryegukanye ibihumbi 500Frw.

Mu kiganiro na IGIHE, Ras Kayaga wamenyekanye muri Holy Jah Doves yamamaye mu ndirimbo ‘Maguru’, yavuze ko iyi ari intangiriro nziza yo gutangiza irindi tsinda rishya bari gukorana.

Ati “Aba turi gukorana ni bashya tumaranye igihe gito cyane, kuba rero dutsindiye igihembo nk’iki ni iby’agaciro kuko bigiye kutubera intangiriro nziza rwose. Mu minsi ya vuba murumva ibikorwa byacu bishya.”

Iri rushanwa ryabaga ku nshuro ya gatatu, rigamije kugaragaza abanyempano muri muzika y’u Rwanda, rihuza amatsinda y’abahanga mu gucuranga no kuririmba muri Rwanda.

Battle of The Bands yaherukaga kuba mu 2019. Icyo gihe yegukanywe na Salus Music Band, yatsinze arimo Umurage Band na Symphony Band byahuriye mu cyiciro cya nyuma.

Salus Music Band yegukanye iri rushanwa mu 2019 yahawe amasezerano y’umwaka yo kuririmbira muri Kigali Marriott Hotel.

Battle of the Bands yatangijwe bwa mbere mu 2018, yegukanwa na Neptunez Band.

Paco XL Band yabaye iya kabiri ubwo yataramiraga abari muri Kigali Marriott Hotel

Umuduli Band babaye aba gatatu ni uku bari baserutse

Ahateguwe kubera ibi birori hari huzuye abakunzi b'umuziki wa Live

Itsinda 'Art-stars band' riyobowe na Ras Kayaga ni uku ryari ryaserutse

Bagishyiraho indirimbo 'Maguru' yaririmbwe na Ras Kayaga muri Holy Jah Doves, abantu bose bahise bikoza mu bicu

Buri wese yifuzaga gutahana amashusho y'urwibutso

Ras Kayaga yakoreshaga imbaraga ze zose kugira ngo atahane amanota menshi

Umuziki si intambara, yageze aho afana abo bahanganye

Abagize 'Umuduli band' byabanze mu nda bibera abafana ba 'Art- stars band' bari bahanganye

Ras Kayaga yongeye kugaragara ku rubyiniro

Abari bagize akanama nkemurampaka bagaragaje ko iri rushanwa ari ingirakamaro kuko rifasha kubona amatsinda afite impano zidasanzwe

Paco XL Band yabaye iya kabiri ihabwa miliyoni 2Frw

umuduli band babaye aba gatatu batahana ibihumbi 500Frw

Art- stars band niyo yegukanye umwanya wa mbere

Bahise bahabwa sheke ya miliyoni 15Frw

Amafoto: Kasiro Claude