Amerika: Umuraperi Pop Smoke yishwe arashwe n’abagizi ba nabi

Yanditswe na Nsengiyumva Emmy
Kuya 20 Gashyantare 2020 saa 11:09
Yasuwe :
0 0

Bashar Barakah Jackson uzwi nka Pop Smoke mu muziki wa Leta Zunze Ubumwe za Amerika yitabye Imana nyuma yo kuraswa n’abagizi ba nabi kuri uyu wa Gatatu tariki 19 Gashyantare 2020.

Polisi yo mu mujyi wa Los Angeles aho uyu muraperi yarasiwe yatangaje ko yarashwe n’agatsiko k’abagizi ba nabi barimo umwe wari wipfutse mu maso wari ufite imbunda.

Bamusanze ahitwa Hollywood Hills mu mujyi wa Los Angeles muri Leta ya Calfornia aho yari asanzwe atuye.

Nyuma yo kuraswaho uyu muraperi yajyanywe kwa muganga ari naho bemeje inkuru y’urupfu rwe. Polisi yabwiye ibinyamakuru bitandukanye byo muri Leta Zunze Ubumwe za Amerika ko igikora iperereza ku mpamvu z’iraswa ry’uyu muraperi.

Pop Smoke w’imyaka 20 yari umusore mushya muri Hip Hop ya Amerika ariko ugaragaza umuvuduko mu gutera imbere dore ko yari yarasinye amasezerano na Victor Victor Worldwide na Republic Records nka kompanyi zamufashaga mu bijyanye na muzika.

Muri Mata 2019 nibwo uyu muraperi yashyize hanze indirimbo ye ya mbere “Welcome to the Party” yanatumye amenyekana, iyi ikaba ariyo yahereyeho kuri Mixtape ye ya mbere yise “Meet the Woo” yasohotse muri Nyakanga 2019.

Indirimbo “Welcome to the Party” yayisubiranyemo na Nick Minaj na Skepta muri Kanama 2019.

Muri Gashyantare 2020 uyu muraperi yari aherutse gushyira hanze Mixtape ye ya kabiri yise “Meet the Woo 2” iriho indirimbo yakoranye n’abahanzi nka Quavo, A Boogie wit da Hoodie, Fivio Foreign na Lil Tjay.

Reba indirimbo ya mbere uyu muraperi yakoze "Welcome to the party"

Pop Smoke yitabye Imana afite imyaka 20
Pop Smoke yari umuhanzi mushya ariko wamaze kwinjira mu mitima y'abakunzi ba Hip Hop muri Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza