00:00:00 IGIHE NETWORK KN KINYARWANDA EN ENGLISH FR FRANCAIS

Umunyarwanda DJ Innox yatumiye Ne-Yo mu gitaramo

Yanditswe na Nsengiyumva Emmy
Kuya 14 June 2022 saa 02:56
Yasuwe :

Umunyarwanda DJ Innox uri mu bazwiho gutegura ibitaramo bikomeye muri Leta Zunze Ubumwe za Amerika, yatumiye umuhanzi w’icyamamare muri Amerika, Ne-Yo mu gitaramo ari gutegura.

Iki gitaramo DJ Innox yatumiyemo Ne-Yo kizabera mu Mujyi wa Portland wo mur Leta ya Maine ku wa 9 Nyakanga 2022.

DJ Innox washinze ikigo gikora imyidagaduro kitwa Innox Entertainment, akorana bya hafi na The Ben cyane ko yanagize uruhare mu ikorwa ry’indirimbo ’Why’ uyu muhanzi aherutse gukorana na Diamond.

Uretse iyi ndirimbo DJ Innox aherutse no gutegura igitaramo yatumiyemo The Ben cyari kigamije kwinjiza abantu mu mwaka mushya wa 2022.

DJ Innox kandi asanzwe atumira abandi bahanzi benshi b’Abanyarwanda n’abanyamerika mu bitaramo bye, akenshi ibitaramo bye bigakunda kwitabirwa n’Abanyarwanda batuye muri Leta Zunze Ubumwe za Amerika.

Umunyamerika Shaffer Chimere Smith wamamaye mu muziki nka Ne-Yo [Gogo] yataramiye i Kigali mu 2019, yahakoreye igitaramo cy’amateka cyanitabiriwe na Perezida Kagame.

Cyari igitaramo cyiswe "Kwita Izina Concert" cyabereye mu nyubako ya BK Arena yahoze yitwa Kigali Arena.

Cyateguwe n’Ikigo cy’Igihugu cy’Iterambere (RDB) mu bikorwa biri muri gahunda zo gusoza umuhango wo Kwita Izina abana 25 b’ingagi, wabereye mu Kinigi mu Karere ka Musanze.

Ni igitaramo Ne-Yo yahuriyemo n’abahanzi bo mu Rwanda nka Charly na Nina, Bruce Melodie, Riderman na Meddie.

Ne-Yo yigaruriye imitima ya benshi binyuze mu bihangano bitandukanye birimo “So Sick”, “One In A Million” “Miss Independent”, “Marry You”, ‘‘Sexy love’’ yakoranye na Diamond Platnumz n’izindi.

Ne-Yo w’imyaka 39 yatangiye kumenyekana mu 1998 kugeza n’ubu. Yatangiye umuziki akiri umunyeshuri, aba mu itsinda ryitwaga Envy ryaje gusenyuka mu 2000, ahita awukora ku giti cye n’ubwo bitari byoroshye.

Mu 2004 nibwo yatangiye kumenyekana ubwo yagiraga uruhare mu kwandika indirimbo ya Mario yitwa “Let Me Love” yanakunzwe cyane.

Umwaka wa 2006 niwo wasize Isi yose irangamiye uyu mugabo wavutse mu 1979. Icyo gihe yashyize hanze album ye ya mbere yitwa “In My Own Words” yabaye iya mbere ku rutonde rukorwa na Billboard muri Amerika.

Mu 2007 yasohoye album yise “Because of you”; “Year of the Gentleman’’ yo mu 2008; mu 2010 yamuritse “Libara Scale’’, 2012 yasohoye ‘‘R.E.D’’, 2015 yasohoye ‘‘No-Fiction’’ naho mu 2018 yasohoye ‘‘Good Man’’.

Ne-Yo yegukanye ibihembo bya Grammy mu 2009 harimo icya album nziza yo mu njyana ya R&B “Because Of You” na Miss Independent yahembwe nk’indirimbo yahize izindi za R&B.

Ne-Yo agiye gutarama mu gitaramo yatumiwemo n'Umunyarwanda
Igitaramo cya Ne-Yo i Kigali cyitabiriwe n'abantu benshi
Ne-Yo yaherukaga guhuzwa n'u Rwanda mu gitaramo yakoreye i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .