Ambasaderi wa Israel yasangiye n’abahanzi bo mu Rwanda, bungurana ibitekerezo (Amafoto)

Yanditswe na Uwiduhaye Theos
Kuya 12 Mutarama 2020 saa 01:47
Yasuwe :
0 0

Ambasaderi wa Israël, Ron Adam yasangiye n’abahanzi batandukanye bakomeye mu Rwanda bungurana ibitekerezo ndetse baranatarama bari kumwe n’umuhanzi wo muri Israel witwa Avraham Tal.

Ni igikorwa cyabaye ku mugoroba wo kuri uyu wa Gatandatu tariki 11 Mutarama 2020, cyari kirimo abahanzi bakomeye mu Rwanda nka Charly na Nina, Bruce Melodie, Buravan, Igor Mabano, Nel Ngabo, Albert Rudatsimburwa, Mighty Popo n’abandi baba hafi y’umuziki nka Ishimwe Clement na Bruce Twagira uzwi nka Bruce Intore.

Habayeho igikorwa cyo gutaramana aho buri muhanzi muri aba bose yagiye ajya imbere akaririmbira abari bahari zimwe mu ndirimbo ze.

Mu bindi byaranze uyu mugoroba harimo kungurana ibitekerezo ndetse no gufata amafunguro ya nijoro.

Umuhanzi Mighty Popo akaba n’umuyobozi w’ishuri ry’umuziki rya Nyundo, yabwiye IGIHE ko cyari igikorwa cyiza cyane.

Intego nyamukuru mu byaganiriweho nubwo byose bitashyizwe mu itangamakuru kwari ukumenyana birushijeho hagati y’abari mu ruganda rw’umuziki mu Rwanda na Israel no kubahuza na Avraham Tal.

Ati “Byari byiza cyane. Wari umugoroba wo gusangira, Ambasaderi yatumiye abahanzi bo mu Rwanda na Avraham Tal wo muri icyo gihugu natwe turacuranga. Avraham yashimiye abahanzi bo mu Rwanda cyane, yishimye bikomeye. Niko uruganda rugenda rukura, kungurana ibitekerezo mukavugana muti kuki tutakorana indirimbo, niko muzika itera imbere.”

Ambasaderi Ron Adam na Avraham Tal basangiye n’aba bahanzi nyuma y’uko ku wa Gatanu we na Avraham Tal bari babanje guhura na Clement Ishimwe, Tom Close na Butera Knowless.

Butera Knowless yavuze ko icyo gihe baganiriye ibintu bigamije guteza imbere umuziki nyarwanda.

Ati “Ku wa Gatanu Ambasaderi wa Israel yaratwakiriye iwe tuganira ku bintu bitandukanye ndetse duhura na Avraham Tal. Twaganiriye ibintu byinshi kandi byiza mu buryo butandukanye cyane.”

Avraham Tal ni umwe mu bahanzi bakomeye muri Israel. Yavutse mu 1975 ariko yatangiye ibikorwa bya muzika mu 1998.

Yabaye umuyobozi mu miririmbire w’itsinda rya Shotei Hanevuah kuva mu 1998 kugeza mu 2007, ubwo yatandukanaga naryo. Mu ndirimbo zakunzwe iwabo yandikiye iri tsinda harimo iyitwa “Mi” bishatse kuvuga ‘Nde’ mu Kinyarwanda.

Ubusanzwe yitwa Avraham Poankinos Tal, yavukiye ahitwa Nir Moshe akurira muri Neve Ativ. Azi gucuranga ibicurangisho bitandukanye birimo icya Fife na Guitar.

Afite album eshanu ze bwite n’izindi yakoranye n’itsinda yahozemo rya Shotei Hanevuah, ize zirimo Avraham Tal yakoze mu 2008, Orot yo mu 2010, Shoshana[yitiriye uwari umugore we] yo mu 2013, Achshav Hayim yo mu 2016 na Avraham Tal Live 2017 iyi yanakozwe n’umugore we batandukanye muri Gashyantare 2018.

Buravan, Ambasaderi wa Israël Ron Adam na Ishimwe Clement bafata ifoto y'urwibutso
Aba bahanzi bafashe ifoto y'urwibutso
Nyuma yo gutarama aba bahanzi basangiye ifunguro rya nimugoroba na Ambasaderi Ron Adam
Ubwo Butera Knowless, Tom Close na Ishimwe Clement bahuraga na Avraham Tal na Ambasaderi Ron Adam
Ambasaderi Ron Adam ubwo yafataga ifoto y'urwibutso na Charly na Nina

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .