Ibi Ambasaderi Ron Adam yabitangaje ku mugoroba wo kuri uyu wa Gatatu tariki 3 Ukuboza 2020, mu mugoroba wo gusangira wahuje ubuyobozi bwa Ambasade ya Israël mu Rwanda n’abaterankunga ba gahunda ya ‘Twende Jerusalem’.

Muri uyu mugoroba wo gusangira wabereye muri Kigali Serena Hotel, abatumiwe bataramiwe n’uyu muhanzi wabavumbije ku byo azakorera mu bitaramo umunani yitegura gukorera mu mijyi yubatse izina ku Isi nka Jerusalem.

Ambasaderi wa Israël mu Rwanda, Ron Adam, mu ijambo rigufi yagejeje ku bari bateraniye mu cyumba cyabereyemo ibi birori, yagize ati ”Twishimiye kuba turi kumwe hano, buri wese agubwe neza. Sinifuza kuvuga byinshi, ahubwo Mbonyi agiye kudutaramira. Twatekereje igikorwa cya Twende Jerusalem mu rwego rwo guhuza abaturage b’ibihugu byombi, njye mu myizerere nemera ko ubuhanzi ari kimwe mu byahuza abantu.”

“Twahisemo guhera kuri Mbonyi kuko ari umuhanzi wihariye, ndabizi abanya-Israël bazamukunda.”

Ambasaderi Ron Adam yishimiye kuba abaturage b’igihugu ahagarariye baratangiye gutemberera mu Rwanda cyane ko mu minsi ishize aribwo indege y’iki gihugu yazanye ba mukerarugendo ba mbere bashaka kumenya urw’imisozi igihumbi.

Biteganyijwe ko ibi bitaramo Mbonyi azakorera muri Israël bizaba mu minsi ya Pasika muri Mata 2021.

Iyi gahunda iri mu murongo wa Ambasade ya Israël mu Rwanda wo kuzamura umubano hagati y’ibihugu byombi no guteza imbere impano z’urubyiruko rw’u Rwanda ndetse n’urwego rw’ubuhanzi.

Miss Rwanda 2020, Nishimwe Naomie yari yatumiwe muri ibi birori

Miss Nishimwe Naomie na Ambasaderi Ron Adam bafatanye ifoto

Miss Nishimwe Naomie, Israel Mbonyi na Ambasaderi Ron Adam

Byari ibyishimo ku bitabiriye ibi birori

Umutoniwase Belinda wigeze kwitabira Miss Rwanda2017 n'umugabo we Theo Gakire bari mu bitabiriye ibi birori

Itsinda ry'abacuranzi ba Israel Mbonyi ryamufashaga gususurutsa abitabiriye ibi birori

Israel Mbonyi yataramiye abari bitabiriye ibi birori

Israel Mbonyi ku meza na Ambasaderi Ron Adam