Ambasaderi w’u Rwanda muri Kenya yahuye n’Itorero ‘Intayoberana’ bahagarariye neza igihugu muri EAGT

Yanditswe na Uwiduhaye Theos
Kuya 8 Ukwakira 2019 saa 08:39
Yasuwe :
0 0

Ambasaderi w’u Rwanda muri Kenya, Dr Richard Masozera, yahuye n’Itorero Intayoberana ryakuye umwanya wa kabiri mu irushanwa rya East Afruca’s Got Talent ndetse yakira n’umunyarwandakazi Makeda Mahadeo wari uri mu bakeramurampaka muri iri rushanwa.

Mu butumwa bwanditse ku rukuta rwa Twitter rwa Ambasade y’u Rwanda muri Kenya, bagaragaje ko Dr Masozera yashimiye iri tsinda.

Buti “Kuri iki gicamunsi Ambasaderi w’u Rwanda muri Kenya Dr Masozera Richard yahuye anashimira Intayoberana zo mu Rwanda zatwaye umwanya wa kabiri mu irushanwa ryasojwe ku mugoroba, rya East Africa’s Got Talent.”

Esther na Ezekiel bakomoka muri Uganda nibo begukanye igihembo cya $50 000, mu irushanwa East Africa’s Got Talent ryari rimaze igihe rihuje abanyempano bo mu karere ka Afurika y’Iburasirazuba.

Mu cyiciro cya nyuma cy’iri rushanwa, Itorero Intayoberana niryo gusa ryari rihagarariye u Rwanda muri batandatu bahataniraga igikombe.

Iri torero ni naryo ryabanje ku rubyiniro ku munsi wa nyuma w’irushanwa, mu birori bikomeye byabereye i Nairobi muri Kenya. Mu minota ibiri bari bafite babyinnye Kinyarwanda indirimbo zinyuranye.

Abana icumi bagize itorero Intayoberana baba babyina ari nako baririmbirwa n’abatoza babo banabavugiriza ingoma.

Abagize akanama nkemurampaka bongeye kugaragariza aba bana urukundo babashimira uko bateza imbere umuco wabo, babinyujije mu mbyino gakondo.

Iri torero ryari riri muri batanu ba mbere ryanaje muri batatu ba mbere, nyuma yo kubarura amajwi, Anne Kansime wari uyoboye ibirori yahamagaye Esther na Ezekiel bo muri Uganda nk’abegukanye irushanwa, bashyikirizwa sheki y’ibihumbi 50 by’amadorari ya Amerika, mu gihe Intayoberana zaje ku mwanya wa kabiri.

Kuri ubu Intayoberana zamaze kugaruka mu Rwanda aho zageze ku kibuga cy’indege i Kanombe kuri uyu wa Mbere nijoro.

Reba uko Itorero Intayoberana ryaraye ryitwaye ku isozwa rya East Africa’s Got Talent

Ambasaderi w’u Rwanda muri Kenya yahuye n’Itorero ‘Intayoberana’ na Makeda bahagarariye neza igihugu muri EAGT

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza