00:00:00 IGIHE NETWORK KN KINYARWANDA EN ENGLISH FR FRANCAIS

Amalon yagarukanye EP nshya! Indirimbo nshya zagufasha gusoza icyumweru ufite akanyamuneza

Yanditswe na Nsengiyumva Emmy
Kuya 23 July 2022 saa 10:21
Yasuwe :

Icyumweru kirarangiye, benshi batangiye ‘Weekend’ muri iyi minsi y’ikiruhuko kuri benshi, buri wese aba ari kwibaza icyamufasha kuruhuka neza mu buryo bumwe cyangwa ubundi.

Mu rwego rwo gufasha abakunzi b’umuziki gusoza neza gusoza icyumweru neza, IGIHE imaze igihe itangiye gahunda yo kubagezaho indirimbo nshya z’abahanzi nyarwanda zabafasha kuruhuka neza.

Mu mpera z’iki cyumweru turagerageza guterera akajisho mu ndirimbo z’abahanzi nyarwanda basohoye mu cyumweru turangije.

Amalon yagarukanye EP nshya yise ‘H.K.P’

Nyuma y’imyaka ibiri Amalon atangiye kugenda biguruntege mu muziki, ndetse benshi bakibaza aho yaburiye, kuri ubu yubuye umutwe mu muziki asohora EP nshya yise ‘H.K.P’.

Iyi EP iriho indirimbo enye zitwa; Champion yasohokanye n’amashusho yayo, All night long, Fuego na Kwaka.

Riderman yahuje imbaraga na Peace Jolis basohora iyitwa ‘Bulletin’

Riderman wiyemeje gusohora indirimbo nibura buri cyumweru, muri iki turangije yasohoyemo iyitwa ‘Bulletin’ yahuriyemo na Peace Jolis.

Iyi ndirimbo yakozwe na Davydenko mu buryo bw’amajwi mu gihe amashusho yayo yakozwe na B8films.

Abahanzi bashya mu muziki Fifi Raya na Tonalite basohoye iyitwa ‘Hoshi’

Fifi Raya afatanyije na Tonalite bose bafashwa mu muziki na Ddumba (Umugabo umaze kumenyekana cyane kubera imbuga nkoranyambaga), basohoye indirimbo bahuriyemo bise ‘Hoshi’.

Ni indirimbo mu buryo bw’amajwi yakorewe mu Ishusho studio ikorwa na Producer Ayooo Rash, mu gihe amashusho yayo yakozwe na Jakob Legacy.

Ddumba uherutse gutangaza ko yinjiye mu byo gufasha abahanzi, yahereye kuri batatu barimo Fifi Raya, Tonalite ndetse n’uwitwa Nadia.

Kenny Sol yasubiranyemo indirimbo Joli na Peruzzi wo muri Nigeria

Kenny wari umaze kwerekeza muri Uganda mu mpera z’icyumweru gishize niho yasohoreye indirimbo ‘Joli’ yasubiranyemo n’umuhanzi uri mu bakunzwe muri Nigeria, Peruzzi.

Ni indirimbo Kenny Sol yahisemo kumenyekanisha ahereye muri Uganda aho ari kuzenguruka mu bitangazamakuru bikomeye i Kampala anamenyekanisha umuziki we muri rusange.

Mu kiganiro na IGIHE, Kenny Sol yavuze ko nyuma yo gusohora iyi ndirimbo mu buryo bw’amajwi ateganya guhita ajya muri Nigeria kuba ariho bazafatira amashusho yayo.

It’s ok ya Papa Cyangwe, Fireman na Afrique

Papa Cyangwe wari umaze iminsi acecetse mu muziki, yongeye kubura umutwe afite indirimbo nshya yise It’s ok yahurijemo Fireman na Afrique.

Ni indirimbo ikijya hanze, Papa Cyangwe yatangiye kotswa igitutu n’ababyeyi b’umwe mu bakobwa bagaragaramo bamubwira ko akwiye gukuramo umwana wabo kuko atarageza imyaka y’ubukure.

Uyu muhanzi avuga ko atari azi iby’uko uyu mukobwa ari umwana kuko hari izindi ndirimbo yagaragayemo kandi ari nawe ubwe wabimwisabiye.

‘Demo’ ihuriweho n’abahanzi barimo Ariel Wayz, Kivumbi, Sagamba, Soldier Kid na Bruce The 1st

Ariel Wayz, Kivumbi, Sagamba, Soldier Kid na Bruce The 1st bahuje imbaraga basohora indirimbo bise ‘Demo’.

Ni indirimbo aba bahanzi baririmbanye bwa mbere mu gitaramo cya Trapish II ariko itarajya hanze, kuri ubu ikaba yamaze gusohokana n’amashusho yayo.

Macarena ya Mani Martin

Mani Martin yasohoye amashusho y’indirimbo ‘Macarena’ avuga ko yandikanye na Kenny Sol igitekerezo ari ukuyikorana ariko biza kurangira bidakunze kubera ikibazo cy’umwanya.

Iyi ndirimbo nshya ‘Macarena’ ya Mani Martin ni imwe mu zigize Extended Play [EP] y’indirimbo enye aherutse gusohora ari zo Jelasi, Cyanyiriromba na Something.

Buriyana ya Niyo bosco

Niyo Bosco uri mu bahanzi bagezweho muri iyi minsi yasohoye indirimbo nshya yise Buriyana yasohokanye n’amashusho yayo.

Ni indirimbo igiye hanze ikurikira ‘Urugi’ imwe mu ndirimbo z’uyu muhanzi zari zimaze igihe zikunzwe bikomeye.

Niwowe ya Liza na Chanty

Niwowe ni indirimbo nshya y’umuhanzikazi Mugisha Elizabeth uzwi nka Liza na Chanty.

Iyi niyo ndirimbo ya mbere Liza asohoye kuva hasohoka amakuru y’uko amaze amezi atatu atandukanye n’umugabo we Edman bari baherutse gukora ubukwe ndetse bagahita banimukira muri Canada.

Liza yafashwaga mu muziki na Edman wahoze ari umunyamakuru w’imyidagaduro kuri Prime TV kuri ubu akaba ari kubarizwa muri Canada aho yari yasanze uwari umugore we bamaze gutandukana.

Kuri ubu Liza watangiye kwirwariza, yatangiye kunyuza indirimo ze kuri shene ya Youtube ye bwite aho kuzinyuza kuri shene ya sosiyete y’uwari umugabo we ‘Edman Entertainment’.

Izi ni zimwe mu ndirimbo nshya twabashije kubona zasohotse mu cyumweru turangije, niba nawe uri umuhanzi ufite indirimbo uzasohora mu cyumweru gitaha cyangwa ufite iyo utifuza ko yazabura wayidusangiza kuri [email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .