Ama G the Black agiye kumurika firigo yakoze mu isura y’agaseke

Yanditswe na Nsengiyumva Emmy
Kuya 14 Ukuboza 2020 saa 08:40
Yasuwe :
0 0

Umuraperi Ama G the Black usanzwe uzwiho ubuhanga mu gukora amafirigo, ari mu myiteguro yo kumurika inshya yahanze mu isura y’agaseke.

Imirimo yo gutunganya iyi firigo nshya ya Ama G the Black iri kugana ku musozo, yabwiye IGIHE ko yiteguye kuyimurikira abanyarwanda.

Avuga ko ari igitekerezo yagize mu bihe bya #GumaMuRugo. Ati "Muri biriya bihe nta hantu umuntu yari afite ho kujya, nibaza ko nagombaga kwicara hamwe ngatekereza ikintu nakora kigatanga umusaruro yaba kuri njye ndetse no ku muryango nyarwanda muri rusange.”

Iyi firigo ikoze mu isura y’Agaseke, Ama G the Black avuga ko yayikoze mu rwego rwo kugerageza gusigasira amateka y’u Rwanda, ikindi ni uko yari amaze igihe yitegereza agasanga yaba umutako.

Ati ”Njye ndi intore y’Indatabigwi, uko mbyibuka rero mu cyivugo cyacu harimo ko tugomba gusigasira umurage wa Gihanga. Natekereje rero uburyo nawusigasiramo mu byo nkora nsanga agaseke ari kimwe mu bikoresho byifashishwaga cyera bidakwiye kuzimira gutyo.”

Uyu muhanzi avuga ko agaseke katakiri mu bikoresho bikenerwa cyane muri iki gihe, ariko nanone ko atari igikoresho cyagacitse mu muryango nyarwanda.

Avuga ko yahisemo gukora firigo iri muri ubu bwoko kuko usibye kuba izakora akazi ko gukonjesha no kubika neza ibintu, izajya inafasha mu kwigisha abakiri bato iby’agaseke kazwi cyane mu muco w’abanyarwanda, ikanaba n’umutako mu nzu y’uwabashije kuyigura.

Ama G the Black agiye kuzuza amezi atandatu akora uyu mushinga avuga ko umaze kumutwara arenga miliyoni n’igice y’amafaranga y’u Rwanda (1 500 000 Frw).

Icyakora ahamya ko nyuma yo kumurika iya mbere, igiciro cy’izo azakurikizaho kitazaba gihanitse kuko mu gutangira yagiye ahura n’ingorane za hato na hato.

Ati ”Gutangira byaraduhenze kuko rimwe na rimwe twashoboraga kugura icyuma runaka cyo kwifashisha, tukaza gusanga atari cyo cyari gikenewe tukakireka nyamara twakiguze. Nibaza ko nidutangira gukora firigo zo gushyira ku isoko itazaba ihenze nk’iyi ya mbere.”

Uyu muraperi avuga ko ikindi cyatumye iyi firigo yahereyeho ihenda ari uko yakoze inini, ati ”Iyi twakoze ni nini cyane, ishobora kubika inka yose cyangwa ihene eshatu. Urumva ko mu gihe twakora izo kugurisha zaba ari nto bityo ntizinahenda ku isoko.”

Ama G the Black avuga ko mu gihe yaba abonye inkunga yo kwagura umushinga we, yakora firigo nyinshi zikajya ku isoko bityo usibye kubika ibintu zikanaba imitako isigasiye amateka y’igihugu.

Ama G The Black asanzwe ari umwe mu baraperi beza igihugu gifite
Usibye umuziki, Ama G The Black azwiho ubuhanga mu gukora firigo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .