Alyn Sano yerekanye ubuhanga mu gitaramo cya “My Talent Live”

Yanditswe na Mukahirwa Diane
Kuya 27 Ukuboza 2020 saa 10:17
Yasuwe :
0 0

Umuhanzikazi Alyn Sano umenyerewe mu njyana ya RnB, kuri uyu wa Gatandatu tariki 26 Ukuboza 2020, yerekanye ko umuziki we umaze gushinga imizi ubwo yasusurutsaga abantu mu gitaramo cya ‘My Talent Live Concert’.

Ni ibitaramo byateguwe na East African Promoters, bihuriramo abahanzi nyarwanda bakiri kuzamuka, bica kuri Televiziyo Rwanda buri wa Gatandatu guhera saa 22:45.

Mbere y’uko Alyn Sano atangira igitaramo, yabanje gutanga ikiganiro cyagarutse ku buzima bwe bwite ndetse no ku muziki we aho yahishuye ko impano ye yahawe umurongo na korali y’Abadivantisiti yaciyemo.

Ati “Natangiye kuririmba mu 2010 ndirimba muri korali y’Abadivantisiti b’umunsi wa karindwi, icyerekezo cyanjye nari narakivukanye igihe kiragera bikagukurikirana, guca muri korali niko urugendo rwanjye rwari rwarateganyijwe kuva kera.”

Yavuze ko mu byifuzo afite mu muziki ari ugukorana indirimbo n’abahanzikazi mpuzamahanga bakomeye.

Ati “Buriya mu buzima hari abahanzi nifuza kuzakorana nabo indirimbo nkumva ndishimye aribo Nicki Minaj wo muri Leta Zunze Ubumwe za Amerika na Yemi Alade wo muri Nigeria.”

Nyuma y’iki kiganiro yahise atangira kuririmbi zimwe mu ndirimbo ze zikunzwe n’abatari bake muri iki gihe zirimo nka None, Perimana, kontorola, Joni, Naremewe Wowe, We are the Best n’izindi.

Yacurangiwe na Symphony Band itsinda rimaze kugaragaza ubudasa mu gufasha abahanzi ku rubyiniro.

Biteganyijwe ko mu ijoro ryo gusoza umwaka ku ya 31 Ukuboza, abahanzi bo muri Kina Music, Nel Ngabo na Platini, bazasusurutsa abakunzi b’umuziki nyarwanda banasoza ibitaramo bya My Talent Live Concert.

Alyn Sano yagaragaje ubuhanga budasanzwe mu gitaramo cya My Talent Live Concert
Ku rubyiniro yafashijwe na Symphony Band
Uyu mahanzikazi yavuze ko yifuza gukora umuziki ufite icyo uhindura ku mitima y'abantu
Yavuze ko anyuzwe no kuba ari mu batumiwe muri ibi bitaramo
Alyn Sano yavuze ko urugendo rwa muzika yarutangiriye muri korali y'Abadivantisiti
Alyn Sano yerekanye ko umuziki we umaze gushinga imizi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .