00:00:00 IGIHE NETWORK KN KINYARWANDA EN ENGLISH FR FRANCAIS

Alyn Sano yasezerewe mu irushanwa rya The Voice Afrique

Yanditswe na Nsengiyumva Emmy
Kuya 25 Mata 2021 saa 06:43
Yasuwe :
0 0

Ijoro ryo ku wa 25 rishyira ku wa 26 Mata 2021, ntabwo rizibagirana mu mateka y’umuziki wa Alyn Sano. Uyu muhanzikazi wari watangiye kurunguruka ahari igihembo cya ‘The Voice Afrique’, ntiyabashije kugera mu cyiciro cya nyuma cy’iri rushanwa.

Mu mujyi wa Abidjan ho muri Côte d’Ivoire niho hari hateraniye abanyempano baturutse mu bihugu bitandukanye bya Afurika bikoresha ururimi rw’Igifaransa. Bari bitabiriye ibirori by’icyiciro kibanziriza icya nyuma mu irushanwa rya ‘The Voice Afrique’, ahashakishwaga abahanzi bane berekeza mu cyiciro cya nyuma.

Umunyarwandakazi Alyn Sano yari umwe mu bari bahatanye muri iri rushanwa nubwo bitamuhiriye ko abasha kuharenga.

Mu cyiciro kibanziriza icya nyuma niho Alyn Sano yagarukiye, ntiyabashije gukomeza mu itsinda yari arimo nyuma yo kurushwa n’umusore ukomoka muri Togo witwa Foganne.

Uko irushanwa ryagenze

Ikipe yabanje ku rubyiniro ni iyatojwe na Charlotte Dipanda, ku ikubitiro umuhanzi Myndri niwe wabanje ku rubyiniro aseruka mu ndirimbo ′′Magnou Mako′′ ya Ismael Isaac.

Yakurikiwe na Gyovanni waririmbye indirimbo ‘Monvura’ ya Nathi. Haje guheruka Harmonie Tears waririmbye ‘Kuliko jana’ ya Sauti Sol.

Muri aba batatu umwe niwe wagombaga gukomeza mu irushanwa rya The Voice Afrique rizarangira ku wa Gatandatu tariki 1 Gicurasi 2021, uyu akaba yabaye Gyovanni.

Myndri yaserutse mu ndirimbo ′′Magnou Mako′′ ya Ismael Isaac
Gyovanni yaririmbye indirimbo ‘Monvura’ ya Nathi
Gyovanni waririmbye indirimbo ‘Monvura’ ya Nathi byarangiye ari we ubashije gukomeza mu cyiciro cya nyuma cy'iri rushanwa

Hakurikiyeho ikipe yatojwe na Hiro Le Coq, iyi ni nayo yabarizwagamo Umunyarwandakazi Alyn Sano wari uhanganye na Foganne wo muri Togo ndetse na Miss Audy wo muri Côte d’Ivoire.

Foganne niwe wabanje ku rubyiniro muri iyi kipe, aseruka mu ndirimbo yitwa ‘Knight of God’ ya Bebi Philippe.

Nyuma y’uyu musore hakurikiyeho Alyn Sano uhagarariye u Rwanda muri iri rushanwa. Uyu mukobwa yaririmbye indirimbo ‘My love is love’ ya Withney Houston.

Alyn Sano kimwe n’abo bari bahanganye mu itsinda, nawe yaserukanye n’ababyinnyi agira umwihariko w’uko abe barimo n’abana bakiri bato babiri bamufashije gususurutsa abari bateraniye mu cyumba cyabereyemo igitaramo.

Agisoza kuririmba, Youssoupha wari waryohewe n’uko uyu mukobwa yitwaye yamubwiye ko iyo atagira abo yatoje ari we yagahaye amahirwe.

Nyuma ya Alyn Sano hakurikiyeho Miss Audy wo muri Côte d’Ivoire waririmbye ‘Give it all’ ya Maitre Gims.

Muri iri tsinda hakomeje Foganne, Alyn Sano aba aviriyemo aho.

Hiro Le Coq watoje iri tsinda yashimiye aba bakobwa batabashije gukomeza, abibutsa ko nabo ari abanyempano b’abahanga.

Mu ijambo rigufi uyu mugabo yavuze, yihanganishije Foganne watsinze nyuma y’iminsi mike apfushije umubyeyi we.

Miss Audy nubwo yari ari imbere y'abavandimwe be b'i Abidjan ntibyabaye impamvu yo kubona itike
Alyn Sano ntabwo yabashije kugera mu cyiciro cya nyuma cy'iri rushanwa
Foganne wari umaze iminsi mike apfushije umubyeyi we niwe wegukanye itike yamugejeje mu cyiciro cya nyuma cy'iri rushanwa

Hahise hakurikiraho itsinda ryatojwe n’umuraperi ukomeye ukomoka muri Repubulika Iharanira Demokarasi ya Congo Youssoupha.

Ku ikubitiro ku rubyiniro habanje Lady Shine waririmbye indirimbo ‘Kafoul Maya’ ya Tabuley Rocherau. Uyu yakurikiwe na Kessi waririmbye indirimbo ‘Sere te tame’ ya Monique Seka.

Aba bakurikiwe na Christian Saar waririmbye indirimbo ‘African Queen’ ya 2Baba. Muri iri tsinda Lady Shine niwe watowe aba abonye itike yo kujya mu cyiciro cya nyuma cy’iri rushanwa.

Kessi waririmbye indirimbo ‘Sere te tame’ ya Monique Seka ntabwo yabonye itike imugeza mu cyiciro cya nyuma cy'irushanwa
Christian Saar waririmbye indirimbo ‘African Queen’ ya 2Baba, yavuyemo abafana bari bitabiriye barababara bikomeye
Lady Shine waririmbye indirimbo ‘Kafoul Maya’ ya Tabuley Rocherau, niwe wabonye itike imujyana mu cyiciro cya nyuma cy'irushanwa

Hari hasigaye kumenya uza gukomeza muri batatu batorejwe mu ikipe ya Lokua Kanza.

Uko ari batatu nabo banyuze imbere y’akanama nkemurampaka n’abafana bari mu cyumba cyabereyemo ibi birori bagaragaza impano yabo.

Mathilde Toussaint niwe wabimburiye abandi muri iki cyiciro aseruka mu ndirimbo ‘I Think you’ ya Amadou na Mariam.

Yakurikiwe na Diyanne Adam’s waririmbye indirimbo ‘Il n’est jamais trop tard ya Tchana Pierre. Uwagaragaje impano ye bwa nyuma muri iri tsinda yabaye Carine Sen waririmbye indirimbo ‘Micka’ ya Teeyah.

Muri iri tsinda umunyempano wabashije guhabwa amahirwe yo gukomeza mu cyiciro cya nyuma yabaye Carine Sen.

Mathilde Toussaint yaserutse mu ndirimbo ‘I Think you’ ya Amadou na Mariam
Diyanne Adam’s yaririmbye indirimbo ‘Il n’est jamais trop tard ya Tchana Pierre
Carine Sen yaririmbye indirimbo ‘Micka’ ya Teeyah inamuhesha itike yo kugera mu cyiciro cya nyuma cy'iri rushanwa

Muri Mutarama 2020 nibwo Abanyarwanda batandatu bitabiriye iri rushanwa, abo barimo Ariel Wayz, Linda Montez, Ngabo Evy, Serpha, Edrissia na Alyn Sano.

Aba bahanzi bafashwe amashusho y’ibyiciro bitatu bahataniyemo aribyo “Blind” aho uririmba abagize Akanama Nkemurampaka batakureba bakunda ibyo uri gukora bagahindukira bivuze ko iyo badahindukiye uba watsinzwe.

Icyiciro cya kabiri ni “Battle”, aha babiri babiri barahatana bakaririmba barushanwa bityo uwitwaye neza akaba yahita akomeza undi agasezererwa.

Icyiciro cya gatatu ni “Knockout”, aha naho babiri babiri baba bahatana, uwitwaye neza agakomeza uwarushijwe agahita asezererwa mu irushanwa.

Nyuma yo kubona ababashije kugera mu cyiciro cya nyuma, ku wa Gatandatu tariki 1 Gicurasi nibwo byitezwe ko hazamenyekana uwegukanye iri rushanwa.

“The Voice Afrique Francophone” ni irushanwa ryo kuririmba ryitabirwa n’abanyempano baturuka mu bihugu byo muri Afurika bikoresha ururimi rw’Igifaransa.

Iri rushanwa ryatangiye mu 2016 riri kuba ku nshuro yaryo ya gatatu. Ubwa mbere ryegukanywe n’umukobwa uturuka muri Repubulika Iharanira Demokarasi ya Congo witwa Pamela Baketa, ubwa kabiri ryegukanwa n’ukomoka muri Togo witwa Victoire Biaku.

Uwegukanye iri irushanwa akorerwa indirimbo imwe hamwe n’amashusho yayo ariko agahabwa n’igihembo cy’amafaranga ataratangazwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .