Albert Uderzo wamamaye mu bitabo bisetsa birimo icya ‘Astérix’ yitabye Imana

Yanditswe na Uwiduhaye Theos
Kuya 24 Werurwe 2020 saa 07:56
Yasuwe :
0 0

Umufaransa wamamaye mu kwandika ibitabo bisetsa ‘Albert Uderzo’ wanafatanyije na René Goscinny mu cyo bise ‘Astérix’, yapfiriye mu rugo iwe yishwe n’umutima.

Umuryango wa Uderzo wari ufite imyaka 92 ni wo watangaje urupfu rwe. Yamamaye cyane muri ‘Astérix’ yakoze mu 1959 afatanyije na René Goscinny. Yitabye Imana kuri uyu wa Kabiri, tariki ya 24 Werurwe 2020.

Bernard de Choisy, umukwe we yabwiye AFP ati “Yapfiriye mu rugo muri Neuilly mu Burengerazuba bw’u Bufaransa, yishwe n’umutima ntabwo ari Coronavirus. Yari amaze ibyumweru byinshi agaragaza umunaniro.”

Uyu mugabo yakunzwe mu buryo bukomeye mu muco w’Abafaransa, ndetse yagurishije miliyoni 370 za album z’ibitabo, filime 11 ndetse na ‘Astérix’ yatumye yamamara yubakirwa na pariki yo kwidagaduriramo mu Bufaransa n’ibindi.

Umunyarwenya Chris Addison yanditse kuri Twitter agaragaza ko Uderzo ari umwe mu bamushimishije cyane. Ati “Ibikorwa by’abantu bake nibyo bishobora kuzampa ibyishimo nk’ibyo yampaye kuva ndi muto cyane […]”

Mark Millar, umwanditsi w’ibitabo bisetsa birimo Kingsman yise Uderzo uw’ikirenga.

Oliver Kamm umwana wa Anthea Bell washyize ibitabo bya Astérix mu rurimi rw’Icyongereza yavuze ko Uderzo yari umunyabwenge noneho yabuhuza na René Goscinny bikaba byiza kurushaho.

Ati "N’ubwo atari azi Icyongereza nka René Goscinny, yishimiye uburyo umubyeyi wanjye yashyize ibitabo bya Astérix mu Cyongereza.”

Uderzo yahuye na Goscinny mu 1951 batangira guhanga abagombaga kugaragara muri Asterix barimo Oumpah-Pah. Mu 1959 basabwe guhanga ikinyamakuru cyiswe Pilote.

Goscinny yapfuye mu 1977. Uderzo yakomeje Astérix wenyine. Album ya Astérix ya 25 yagiye hanze mu 1980 ni nayo yari igiye hanze ikozwe na Uderzo wenyine. Mu 2009 uyu mugabo yagiye mu kiruhuko cy’izabukuru agurisha uburenganzira kuri Hachette Livre.

Albert Uderzo wamamaye mu bitabo bisetsa birimo icya ‘Astérix’ yitabye Imana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .