Akari ku mutima wa Umwiza witegura guserukira u Rwanda muri Miss University Africa

Yanditswe na Uwiduhaye Theos
Kuya 20 Mutarama 2021 saa 12:49
Yasuwe :
0 0

Umwiza Phionah wabaye Igisonga cya Mbere muri Miss Rwanda 2020, ari kwitegura guserukira mu irushanwa ry’ubwiza rya Miss University Africa ribera muri Nigeria.

Uyu mukobwa ari mu bakobwa bazitabira iri rushanwa muri Gashyantare uyu mwaka ntihatagira igihinduka bitewe na COVID-19 ikomeje gufata indi ntera mu bihugu bitandukanye bya Afurika ndetse no hanze yayo.

Muri iri rushanwa azahuriramo n’abandi bakobwa bo mu bindi bihugu bya Afurika bitandukanye birimo u Burundi, Uganda, eSwatini, Ethiopia, Gabon, Burkina Faso, Repubulika Iharanira Demokarasi ya Congo, RDC n’ibindi. Azahuriramo n’abandi bakobwa barenga 50.

Yabwiye IGIHE ko imyiteguro ijyanye n’iri rushanwa ayigeze kure ndetse afite icyizere cyo kuzitwara neza mu buryo bwose bushoboka, akazana ikamba mu Rwanda.

Ati “Ntabwo turi mu bihe byoroshye. Mperuka gukora indirimbo ijyanye no kurwanya Coronavirus, nka kimwe mu byorezo bitwugarije. Iki cyorezo ndabona gishobora gutuma gahunda bategura irushanwa bari bafite bayisubika tukabanza tukareba aho byerekeza, ariko njye nditeguye nzi ko nindamuka nserukiye igihugu nzitwara neza nta kabuza.”

Yavuze ko ari ishema kuri we kuba azaserukira u Rwanda muri iri rushanwa.
Umwiza yabwiye IGIHE ko azajyana muri iri rushanwa umushinga mugari ugamije gufasha abakobwa kwiteza imbere mu buryo butandukanye asanzwe afite yise ‘Ntitubahane Initiative’.

Uyu mushinga asanzwe yaratangije mu Rwanda ugamije gufasha abakobwa kwihangira imirimo ndetse no kuboroza amatungo magufi arimo inkwavu, ku bufatanye n’umuryango witwa All Trust Consult ufasha abategarurgori n’abandi biganjemo urubyiruko kwiteza imbere.

Mu 2020, afatanyije na Uwihirwe Yasipi Casmir wabaye Igisonga cya Mbere muri Miss Rwanda 2019, bakoze uyu mushinga bagamije gufasha abakobwa baterwa inda, bagatereranwa n’imiryango icyizere cy’ubuzima kigasubira hasi. Bahereye mu Karere ka Karongi aho boroje inkwavu itsinda ry’abangavu batewe inda.

Uyu mushinga ufite intego yo kwigisha abangavu batewe inda kubafasha kwisanga muri sosiyete, kongera kugira icyizere cy’ubuzima no gufashwa kubona icyo bakora kugira ngo biteze imbere.

Umwiza Phionah w’imyaka 19 atuye mu Mujyi wa Kigali mu Karere ka Gasabo mu Murenge wa Kimironko. Yitabiriye Miss Rwanda ahagarariye Intara y’Iburasirazuba yegukana ikamba ry’Igisonga cya Mbere muri iri rushanwa ry’ubwiza rya mbere mu Rwanda.

Amashuri yisumbuye yayasoreje mu Kigo cya King David Academy aho yize ibijyanye n’Amateka, Ubukungu n’Ubumenyi bw’Isi (HEG).

Nta gihindutse muri Gashyantare 2021 Umwiza Phionah na bagenzi be bose bazahurira mu mwiherero uzamara icyumweru mu Mujyi wa Lagos muri Nigeria, aho uzasozwa hatorwa uwahize abandi.

Umwiza Phionah aherutse gushyira hanze indirimbo yise ‘Fight Corona’ ayikorewe na Dany Beats mu buryo bw’amajwi naho amashusho akorwa na Souke Olivier.

Iyi ndirimbo igamije gushishikariza abantu kurwanya Coronavirus, yayikoze nka kimwe mu bikorwa yasabwe n’abategura iri rushanwa mu kugaragaza impano.

Iri rushanwa agiye kwitabira risanzwe ryitabirwa n’abanyarwandakazi. Mu 2017 Umutoniwase Linda niwe wahagariye u Rwanda, mu 2018 Umunyana Shanitah ni we waserukiye u Rwanda ariko ntiyabashije kwegukana ikamba.

Mu 2019 ryari kwitabirwa na Uwase Sangwa Odylle wabaye igisonga cya kabiri cya Miss Rwanda 2019 ariko ntibyamukundira ko arijyamo ndetse naryo riza gusubikwa kubera impamvu zitamenyekanye.

Umukobwa uhiga abandi muri iri rushanwa yegukana $50 000, imodoka nshya ndetse akaba Ambasaderi w’abanyeshuri b’Umuryango w’Abibumbye, ryitabirwa n’abakobwa bari hagati y’imyaka 18 na 26, batashatse ndetse badafite abana. Buri kamba ryose ritangwa riherekezwa n’ishimwe ry’amafaranga.

Umwiza yiteguye guhagararira u Rwanda neza muri Miss University Africa
Umwiza ajyanye umushinga ugamije gufasha abakobwa kwihangira imirimo ndetse no kuboroza amatungo magufi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .