Big Fizzo yamwenyuye nyuma y’igitaramo cy’amateka cyinjije Abarundi mu 2021

00:00:00 IGIHE NETWORK

KINYARWANDA

ENGLISH

FRANCAIS IGIHE TV

Izigezweho

U Rwanda - Umusirikare w’u Rwanda yaguye muri Centrafrique, undi arakomereka
U Rwanda - Kuva mu gikoni kugera ku irasaniro: Abagore ku ruhembe rw’ababereye maso umutekano muri Centrafrique (Amafoto na Video)
U Rwanda - Impinduka zidasanzwe zaranze gahunda ya VUP imaze gukubirwa ingengo y’imari inshuro 65
U Rwanda - ’Valens Kibyeyi’ afunzwe akekwaho kunyereza miliyari 10,4Frw y’imisoro yifashishije abakozi bo mu rugo
Iyobokamana - Impinduka muri Kiliziya Gatolika: Abagore bongerewe inshingano kuri Alitari
U Rwanda - I Gitwe ku gicumbi cy’Abadivantisiti: Amavu n’amavuko y’idini ryatangijwe mu Rwanda n’Umusirikare

Big Fizzo yamwenyuye nyuma y’igitaramo cy’amateka cyinjije Abarundi mu 2021

Yanditswe na Nsengiyumva Emmy

Kuya 4 Mutarama 2021 saa 08:54

Yasuwe :

Yavuzweho:

0 0

Uwavuga ko umwaka wa 2020 wihariwe na Big Fizzo mu muziki w’u Burundi ntiyaba yibeshye cyane. Uyu muhanzi yanatangiye uwa 2021 ari mu byishimo by’ikirenga nyuma yo gukora igitaramo cy’amateka cyanyuze abacyitabiriye.

Big Fizzo tariki 1 Mutarama 2021 yakoze igitaramo gikomeye yise ‘Dushigikire ivyacu concert’. Nta wundi muhanzi yigeze agitumiramo nkuko bimenyerewe mu muziki w’u Burundi, aho abahanzi bakunze guhuza imbaraga ngo bakurure abafana benshi.

Kuba yari wenyine ku byapa byamamaza iki gitaramo byatumye bamwe batekereza ko ashobora kubura abafana cyangwa hakitabira umubare muto w’abakunzi be.

Uko bamwe babitekerezaga siko byagenze kuko ku munsi w’igitaramo, kuri Safi Beach aho cyabereye hari hakubise huzuye.

Big Fizzo wari wuzuye akanyamuneza, ku mbuga nkoranyambaga yakunze kugaragaza ko Abarundi bakunda umuziki wabo mu gihe baba bateguriwe ibintu byiza.

Mu kiganiro kigufi yahaye IGIHE, Big Fizzo, yavuze ko umwaka wa 2021 yagombaga kuwutangira aha urugero barumuna be mu muziki.

Yagize ati "Ni ibyishimo kuba narabashije kubikora, nari mbizi ko ari njye wagombaga kubanziriza barumuna banjye. Ndashimira abakunzi b’umuziki wacu, byanyongereye imbaraga zo gukora cyane muri uyu mwaka mushya dutangiye.”

Uyu muhanzi usanzwe anayobora Bantu Bwoy, inzu ifasha abahanzi banyuranye, yakunze kumvikana yibasira itangazamakuru ry’iwabo arishinja guteza imbere umuziki w’ab’ahandi bakirengagiza iwabo.

Ahamya ko abahanzi b’i Burundi nabo bafite impano zanagera kure ziramutse zitewe ingabo mu bitugu n’abafite aho bahuriye no guteza imbere ubuhanzi.

Big Fizzo muri iyi minsi agezweho mu Burundi kubera indirimbo ze ndetse n’iz’abahanzi afasha bari mu bagezweho muri iki gihugu gituranyi cy’u Rwanda.

Abahanzi Big Fizzo afasha [Kirikou na Double Jay] bafitanye indirimbo ikunzwe bikomeye yitwa ‘Nopfa’ n’indi bise ’Kokota’.

Big Fizzo yaryohereje abitabiriye igitaramo cye