Abazitabira ibirori bya Miss Rwanda bashyiriweho imodoka z’ubuntu zizabajyana zikabacyura

Yanditswe na Nsengiyumva Emmy
Kuya 13 Gashyantare 2020 saa 09:55
Yasuwe :
0 0

Abategura Miss Rwanda bamaze gutangaza ko abazitabirira ibirori byo gutora nyampinga wa 2020 bashyiriweho imodoka z’ubuntu zizabajyana zikanabacyura.

Irushanwa rya Miss Rwanda 2020 riri kugana ku musozo, abakobwa 20 bahatanira ikamba bari mu mwiherero mu gihe tariki 22 Gashyantare ariwo munsi u Rwanda ruzarara rumenye Miss wa 2020.

Mu gihe habura icyumweru kirengaho iminsi mike ngo irushanwa rirangire, abategura Miss Rwanda bamaze gutangaza gahunda y’ibirori byo gutora Nyampinga w’u Rwanda ndetse n’ibiciro byo kwinjira muri ibi birori.

Byitezwe ko ibirori byo gutora Miss Rwanda bizabera mu Intare Arena aho byanabereye mu mwaka wa 2019 ubwo hatorwaga Nyampinga w’u Rwanda umaranye umwaka ikamba Nimwiza Meghan.

Kuri uyu munsi hashyizweho imodoka zizakura abantu kuri Stade Amahoro i Remera zibajyana ku Intare Arena ndetse zikaza no kubasubiza aho zabakuye ku buntu.

Kuri iyi nshuro kwinjira mu birori bya Miss Rwanda bizaba ari 5000 Frw mu myanya isanzwe, 20 000 Frw mu myanya y’icyubahiro na 500 000 Frw ku meza azaba ateye mu myanya y’icyubahiro.

Icyakora ibi biciro bizagabanywa ku bazagura amatike mbere kuko bo bazayabona kuri 3000 Frw mu myanya isanzwe,10 000 Frw mu myanya y’icyubahiro na 300 000 Frw ku meza azaba ateye mu myanya y’icyubahiro.

Ibirori byo gutora Nyampinga w’u Rwanda 2020 bizasusurutswa n’itorero ribyina Kinyarwanda rimaze kubaka izina mu bakunzi b’umudiho gakondo “Inganzo Ngari”.

Kugeza ubu amatora ya Miss Rwanda 2020 akomeje yaba ku IGIHE.COM ndetse no kubakoresha ubutumwa bugufi aho wandika ijambo Miss ugasiga akanya, ugashyiraho nimero y’umukobwa ushyigikiye ukohereza kuri 1525.

Abakobwa 20 bahatanira ikamba rya Miss Rwanda bari mu mwiherero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .