00:00:00 IGIHE NETWORK KN KINYARWANDA EN ENGLISH FR FRANCAIS

Abamburiwe muri Miss Rwanda bagiye kugana inkiko

Yanditswe na Nsengiyumva Emmy
Kuya 18 May 2022 saa 08:27
Yasuwe :

Umunyarwanda yaciye umugani ngo ntawe ukira asongwa! Mu gihe iby’Irushanwa rya Miss Rwanda bikomeje kurikoroza mu bakunzi b’imyidagaduro, abakobwa begukanye amakamba mu myaka yashize ariko batarahabwa ibihembo byabo bagiye kugana inkiko basaba kurenganurwa.

Ibi biri kuvugwa muri iri rushanwa mu gihe riherutse guhabwa Inteko y’Umuco ryambuwe Rwanda Inspiration Back Up yari isanzwe iritegura, ndetse na Ishimwe Dieudonne uzwi nka Prince Kid wari Umuyobozi wayo agatabwa muri yombi.

Bakimara kubona ko irushanwa ryambuwe Rwanda Inspiration Back Up kandi ariyo yari yaragiranye amasezerano n’abaterankunga batigeze babishyura, bamwe mu bakobwa batsindiye amakamba mu myaka ishize ntibahabwe ibihembo byabo, biyemeje kugana inkiko.

Umwe mu bakobwa batsinze mu irushanwa rya Miss Rwanda 2021 wari umaze umwaka atarishyurwa n’umuterankunga we, avuga ko yagerageje kumenyesha Rwanda Inspiration Back Up inshuro nyinshi ko kumwishyura bikomeje kugorana ariko ntafashwe.

Yakomeje gusaba iyi sosiyete yagombaga kumuhemba kubahiriza ibyo yemeye ariko muri 1.800.000 Frw bamugombaga, bamuhayemo make yo kumwikiza andi arategereza araheba.

Uyu mukobwa ni umwe mu bamaze gufata icyemezo cyo kugana ubutabera, mu gihe hari abandi nabo bakiri kwishyuza abaterankunga batarubahiriza ibyo bemeye.

Undi mukobwa twamenye ko afite ikibazo nk’iki ni uwatsindiye rimwe mu makamba yatanzwe mu 2020.

Mu gihe yasabaga guhabwa ibihembo yari yaremerewe, Umuyobozi wa sosiyete yagombaga kumuhemba yagiye amwandikira ubutumwa buganisha ku kumusaba urukundo n’ubucuti bwihariye, undi abonye bimeze gutyo ahitamo guheba ibihembo bye akuramo ake karenge.

Undi mukobwa wiyemeje kujya kurega umuterankunga wa Miss Rwanda wagombaga kumwishyura ariko akaba ataramuha ibihembo, yagize ati “Ibaze ko umwaka nambikiwemo ikamba warangiye ntarahembwa, nagerageje kuganira nabo ariko ntibigeze bakemura ikibazo cyanjye.”

Mu minsi ishize nibwo ibibazo byatangiye kuvugwa mu irushanwa rya Miss Rwanda nyuma y’uko uwari Umuyobozi wa Rwanda Inspiration Back Up yateguraga iri rushanwa atawe muri yombi.
Icyo gihe yari akurikiranyweho bigendanye n’ihohotera rishingiye ku gitsina bikekwa ko yakoreye bamwe mu bakobwa bitabiriye irushanwa rya Miss Rwanda.

Icyakora nyuma yo kuburana ifunga n’ifungurwa ry’agateganyo, Urukiko rwavuze ko rushingiye ku mpamvu zikomeye zatanzwe n’ubushinjacyaha, Ishimwe Dieudonne uzwi nka Prince Kid agomba gukirikiranwa afunzwe ku nyungu z’ubutabera bunoze mu gihe hageterejwe ko iburanisha mu mizi ritangira.

Ubu Ishimwe asigaye aburana ibyaha bibiri muri bitatu yashinjwaga aho icyo gukoresha undi imibonano mpuzabitsina ku gahato yagikuriweho kuko Urukiko rwabuze ibimenyetso bifatika.

Ibyaha uyu musore akurikiranyweho birimo gusaba cyangwa gukoresha ishimishamubiri rishingiye ku gitsina no guhoza undi ku nkeke bifitanye isano n’imibonano mpuzabitsina.

Hagati aho, uretse kuba uyu musore wateguraga irushanwa rya Miss Rwanda ari gukurikiranwa mu butabera, n’irushanwa yamaze kuryamburwa rihabwa Inteko y’Umuco.

Ibibazo muri Miss Rwanda bikomeje kwiyongera umunsi ku wundi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .