Abarundikazi babiri basesekaye mu Rwanda aho bitabiriye Miss Career Africa

Yanditswe na Uwiduhaye Theos
Kuya 22 Ugushyingo 2020 saa 03:02
Yasuwe :
0 0

Abakobwa 38 bagiye guhurira mu mwiherero uzasiga hamenyekanye uhiga abandi, ndetse babiri bo mu Burundi bamaze kuhagera aho abandi bategerejwe mu Rwanda kuri iki Cyumweru.

Abakobwa bageze mu Rwanda barimo Abarundikazi Delicia Izere na Nice Cailie Ineza. Abandi nabo biteganyijwe ko bagera mu Rwanda kuri iki Cyumweru tariki 22 Ugushyingo 2020.

Abakobwa biteganyijwe ko bagomba kujya mu mwiherero barimo Abakobwa 10 bo mu Karere ka Afurika y’Iburasirazuba[ barimo abanyarwandakazi Mutesi Betty, Naomi Mugisha, Mignone Gisèle Irankunda, Tuyishimire Clémence na Geneviève Iranyuze Atosha].

Harimo kandi abandi 10 batoranyijwe mu Majyepfo ya Afurika, 10 batoranyijwe mu Burengerazuba na batatu bo mu Majyaruguru ya Afurika, batanu bo muri Afurika yo Hagati bose bakaba 38. Umwiherero wa Miss Career Africa 2020 uzabera i Kayonza.

Uyu mwiherero uzatangira kuri uyu wa Mbere tariki 23 Ugushyingo 2020, usozwe ku wa 27 Ugushyingo 2020. Uzasozwa hatorwa umukobwa uhiga abandi ari na we uzegukana $ 5000, ndetse agafashwa gushyira mu bikorwa umushinga.

Gutora umukobwa uhiga abandi, bizakorerwa muri Kigali Marriott aho abakobwa baziyereka akanama nkemurampaka kazaba karimo abarimo na Muyombo Thomas wamamaye mu muziki nka Tom Close.

Abantu bazakurikirana iki gikorwa hifashishije Youtube cyane ko muri iki gihe, ibikorwa bihuza abantu benshi bitemewe kubera COVID-19. Muri iki gikorwa hazaba harimo abantu bake cyane, ndetse bizakorwa hakurikizwa amabwiriza yo kwirinda Coronavirus.

Iri rushanwa rifite intego y’imyaka 30, aho nibura abakobwa 450 000 bazaba bamaze kuvamo ba rwiyemezamirimo bato, abahanga mu mirimo n’inganda zitandukanye muri Afurika.

Rizajya riba hasimbukwe umwaka umwe ryongere kuba. Ku ikubitiro Miss Career Africa 2020 azatorerwa mu Rwanda mu birori bikomeye bizaba ku wa 27 Ugushyingo 2020. Mu 2022 iri rushanwa rizabera muri Nigeria.

Hazatorwa uzahiga abandi abe ariwe ugirwa Miss Career Africa 2020, mu gihe hazatangwa andi makamba arimo nka Miss Speaker, Miss Technology, Miss Hospitality, Miss Science, Miss Talent na Miss Art.

Irushanwa rya Miss Career Africa ntabwo rigendera ku bwiza ahubwo rireba umushinga w’umukobwa, kuko icyo rigamije ni uguteza imbere igitsinagore kurusha ibindi byose.

Ibisabwa mu bashaka guhatana ni ukuba uri hagati y’imyaka 18-24, uri umushabitsi wasoje amashuri yisumbuye cyangwa wiga muri kaminuza unabarizwa muri Afurika.

Aba bakobwa bagiye guhurira n'abandi mu mwiherero wa Miss Career Africa
Delicia Izere afite icyizere cyo kwitwara neza muri iri rushanwa
Nice Cailie Ineza wo mu Burundi ubwo yageraga mu Rwanda muri Miss Career Africa
Delicia Izere wo mu Burundi ni umwe mu bakobwa bagiye kwitabira Miss Career Africa mu Rwanda
Nice Cailie Ineza wo mu Burundi ari mu bakobwa bari muri Miss Career Africa igiye kubera mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .