Abasaga 400 mu Bufaransa beretswe filime “Petit pays” ya Gaël Faye

Yanditswe na Nsengiyumva Emmy
Kuya 17 Gashyantare 2020 saa 05:25
Yasuwe :
0 0

Abantu basaga 400 bitabiriye umuhango wo kumurika filime ikomoka ku gitabo “Petit Pays” cy’Umunyarwanda Gaël Faye mu Bufaransa.

Ni filime ishingiye ku nkuru iri muri icyo gitabo y’ubuzima bw’umwana wavukiye i Burundi abyarwa n’Umunyarwandakazi w’impunzi n’umuzungu w’Umufaransa..

Iyi filime yerekanwe bwa mbere tariki 15 Gashyantare 2020 ahitwa Pathé Belcourt mu mujyi wa Lyon mu Bufaransa ahari hakoraniye abarenga 400 bari baje kwihera ijisho iyi filime y’umunyarwanda.

Gaël Faye yari aherutse gutangaza ko iyi filime izasohokera bwa mbere mu Bufaransa tariki 18 Werurwe 2020 ariko mbere izerekanwa i Kigali mu Rwanda mu ntangiriro za Werurwe, icyakora amatariki ataramenyekana.

Iyi filime ishingiye ku gitabo cya Gaël Faye yise ‘Petit Pays’ aho avuga ku nkuru irimo y’ubuzima bw’umwana wavukiye i Burundi abyarwa n’umunyarwandakazi w’impunzi n’umuzungu w’Umufaransa, uko yabonaga ubuzima muri icyo gihe, ibibazo by’amoko, Hutu na Tutsi.

Uwo mwana uba ufite hagati y’imyaka 10 na 15, aba yibuka uburyo ubuto bwe bwaje kwicwa n’ibibazo bya politike zo muri aka karere. Anavuga ku kibazo cyo kuvuka ku babyeyi badahuje uruhu.

Nyuma yaje guhungishirizwa i Burayi ari nabwo yaje kubona ko kuba imvange bigoye kuko haba i Burundi no mu Burayi, hose abantu bamufataga nk’umunyamahanga.

Amaze gukura yiyemeje kugaruka muri Afurika kuko ariho nibura yumvaga ari iwabo. Mu byatumye yumva yigaruriye icyizere ni ugukunda gusoma no kwandika.

Iki gitabo kivuga ku mateka yaranze u Burundi n’u Rwanda, mu myaka ya za 1990 kugera na nyuma yaho.

Guhera tariki 14 Mutarama 2019 filime ishingiye kuri iki gitabo yatangiye gukinirwa mu Karere ka Rubavu, ikorwa n’Umufaransa Eric Barbier biciye muri studio yitwa Jerico.

Iyi filime yakinwemo n’abantu banyuranye ndetse iri mu za nyuma Nsanzamahoro Denis uzwi nka Rwasa yakinnyemo mbere y’uko yitaba Imana.

Gaël Faye ni umuhanzi umaze kubaka izina mu buryo bukomeye ku mugabane w’u Burayi by’umwihariko mu Bufaransa; mu kuririmba, kwandika ibitabo no mu ruganda rwa sinema.

Yavukiye mu Rwanda arererwa i Bujumbura mu Burundi, yerekeje i Paris afite imyaka 13, nyuma aza gutura mu Rwanda nyuma yo kurushinga.

Gaël Faye yamenyakanye mu ndirimbo zakunzwe i Burayi zirimo iyitwa "Je pars," "Ma femme," "Petit Pays," "Pili Pili" n’izindi.

Mu 2018 uyu muraperi ni umwe mu baririmbye mu birori bikomeye byabereye mu nzu y’ibitaramo ya Zénith yo mu Mujyi wa Paris ndetse ahembwa mu bahanzi bagaragaza ubuhanga n’imbaraga mu bihembo bya "Victoires de la Musique" byabaga ku nshuro yabyo ya 33.

Iki "Petit Pays" cyamuhesheje ibihembo birenze bitanu.

Abarenga 400 bari bakoraniye mu cyumba cyerekaniwemo iyi filime bwa mbere mu mujyi wa Lyon mu Bufaransa
Iyi filime yakiniwe mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza