Abanyarwandakazi bamwe bayobotse gushakira amahaho mu bwambure bifashishije internet

Yanditswe na Uwiduhaye Theos
Kuya 26 Ugushyingo 2020 saa 04:39
Yasuwe :
0 0

Uko iterambere ry’ikoranabuhanga ryihuta hagenda haza byinshi byiza kandi byorohereje benshi ubuzima, ariko ntihabura n’ibishobora koreka abandi igihe ikoranabuhanga rya none rititondewe.

Ku rubyiruko cyane cyane biba bigoye kwitwararika kuko hari benshi babeshywa amafaranga, kubera inyota y’ubukire bakisanga mu gihombo gikomeye bitewe no kutagira amakenga, bakaba aka ya ‘nyamanswa idakenga yishwe n’umututizi’.

Ntibizagutangaze kubona abantu benshi bakunda paji y’umukobwa runaka ku mbuga nkoranyambaga, bakuruwe gusa n’ikimero cye, n’amafoto ashyiraho agaragaza imyambarire ituma ubona uko ateye.

Hari n’abakoresha izo mbuga nkoranyambaga zisanzwe nka WhatsApp, Instagram, Twitter, Snapchat n’ahandi, bakanyura kuri ya mafoto yakuruye abifuza guhaza amaso yabo, bagashyiraho nka nimero za telefoni cyangwa email, umukeneye agaca mu gikari akavuga ikimugenza.

Hari n’abayobotse imbuga zicucurizwaho amashusho y’urukozasoni tudashobora gutangaza hano kuko byaba ari uburyo bwo kuzamamaza mu gihe bihabanye n’amahame yacu.

Mu bakora bene ibyo banabyiyemerera harimo Isimbi Noeline. Uyu mukobwa wamenyekanye ubwo yajyaga kwiyamamaza muri Miss Rwanda 2019 ntibimuhire kubera indeshyo ye, yatangiye kugaragaza amafoto ye yambaye ubusa muri Werurwe 2019.

Isimbi ubu uherereye muri Kenya, yavugishije benshi. Bamwe bavuga ko ibyo yakoze bidakwiriye, abandi bakamushyigikira bavuga ko umubiri yerekanye ari uwe, nta mpamvu yo kumwiha kuko nta we yahatiye kureba amafoto yashyize ku rukuta rwe rwa Instagram.

Uyu mukobwa mu minsi ishize yashyize hanze amashusho ye ari gukora ibikorwa by’urukozasoni, agaragaza ko akeneye abaguzi bayo, anatangaza ibiciro ko ari 40 $, ni ukuvuga nibura ibihumbi 40 Frw.

Ni ibikorwa byayobotswe na benshi

Bene abo bakobwa mu mirimo yabo harimo no gutumirwa mu birori byihariye bizwi nka ‘private party’, aho bashobora kubyina bambaye ubusa cyangwa akenda k’imbere gusa, ubundi bakishyurwa.

N’i Kigali hari henshi uzasanga abakobwa bakora ubucuruzi nk’ubu bw’amashusho, ariko bo badakunze kwishyira hanze nk’uko bimera mu bindi bihugu.

Urugero ni nka Fofo Dancer (Phoibe Imwiyitire), kuri Instagram. Akunze gusangiza abamukurikira amashusho ye ari kubyina, akayashyira ku mbuga nkoranyambaga akongeraho imyirondoro ye, kugira ngo ukeneye ibirenzeho ace mu gikari.

We yivuga nk’umubyinnyi wigenga ushobora gutumirwa n’umuntu ubishaka, cyangwa nk’umubyinnyi wo kuri internet ushobora kukubyinira bitewe n’amashusho wifuza, akayafata akayakoherereza kuri email cyangwa WhatsApp, ukamwishyura, cyangwa nk’umubyinnyi ushobora kwifashishwa mu birori bisanzwe.

Aherutse gusangiza abamukurikira amashusho arimo urwijiji, arimo aho yasaga nk’urimo gukuramo imyenda, arangije ashyiraho nimero za WhatsApp, asaba abifite kumusangayo bakamwishyura akayabaha uko bayashaka.

Hari n’andi aheruka gushyira kuri uru rubuga nayo ari kubyinira mu gitanda yambaye ubusa, nayo ashyiraho email, asaba uwaba ayashaka kumwandikira bakavugana.

Aheruka kubwira Yambi TV ko adashobora kubyinira umuntu ngo amwemerere ko baryamana, nubwo akora buri kimwe cyatuma yishima kuko aba yamwishyuye.

Ati “Akazi kanjye nkora ni ukubyina gusa […] hari uwo mbyinira akambwira ati ese wabonaga ndi igiti, nshaka n’akandi kazi, nkahita mubwira ko bidashoboka kuko nshaka gukora bya kinyamwuga. Ntabwo nshaka ko ku kazi nkora hiyongeraho ko ndi indaya."

Ni ibyo yemeza nubwo bigoye kubigenzura ngo wemeze ukuri kwabyo.

Ku wa 31 Nyakanga 2020, Urwego rw’Igihugu rw’Ubugenzacyaha, RIB, rwerekanye abakobwa bane bari mu kigero cy’imyaka 18 na 27 y’amavuko, bakekwagaho icyaha cyo gutangaza amashusho y’urukozasoni binyuze kuri internet.

Umuvugizi wa RIB, Dr Murangira B. Thierry, aherutse kubwira IGIHE ko urukozasoni ari ibikorwa byose birimo amafoto, amashusho n’amajwi yerekeranye n’imikoreshereze y’ibitsina atangazwa mu buryo ubwo aribwo bwose mu ruhame.

Dr Murangira yavuze ko ntawe ubujijwe kwisanzura, ahubwo biba ikibazo iyo bitangiye kurengera bikabangamira abandi.

Ati “Hari abantu batarabisobanukirwa babifata nk’uburenganzira bwabo. Akumva ko paji ye ya Facebook, Tiktok, Instagram […] ngo ngomba gushyiraho amafoto yanjye yose y’ubwambure bwanjye uko mbishaka. Bifate muri telefone yawe ubibikemo ntawe uzakureba ariko igihe cyose uzaba wabishyize ku mbuga nkoranyambaga biba byagiye mu ruhame, itegeko riba rikureba.”

Yavuze ko bari kugirana ubufatanye n’amahanga ku buryo n’abakorera ibyaha hanze y’u Rwanda bazajya babiryozwa.

Fofo Dancer ni umwe mu bakora ubucuruzi bw'amashusho y'urukozasoni
Isimbi yeruye ko acuruza amashusho y'urukozasoni y'ubwoko bwose
Ubu bucuruzi ntabwo bubonwa kimwe kuri internet
Ikoranabuhanga ryahaye urwaho abakeneye kwicuruza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .