00:00:00 IGIHE NETWORK KN KINYARWANDA EN ENGLISH FR FRANCAIS

Abakunzi ba muzika batekerejweho muri ‘Tour du Rwanda 2023’

Yanditswe na Nsengiyumva Emmy
Kuya 13 Mutarama 2023 saa 11:18
Yasuwe :

Abakunzi b’umuziki batekerejweho mu Irushanwa ryo gusiganwa ku Magare ‘Tour du Rwanda 2023’ cyane ko kugeza ubu hamaze kwemezwa ko rizaherekezwa n’ibitaramo biri mu mujyo wa ‘Tour du Rwanda Festival’.

Ibi bitaramo byemejwe nyuma y’ibiganiro bimaze igihe biba hagati ya KIKAC Music yahawe uburenganzira bwo kubitegura n’ubuyobozi bwa FERWACY.

Ku wa 12 Mutarama 2023 ni bwo ku Cyicaro cy’Ishyirahamwe ry’Umukino w’Amagare habereye ibiganiro byahuje ubuyobozi bwa KIKAC Music na FERWACY. Ni bwo bicaye ku meza bemeranya imikoranire n’ubufatanye muri ibi bitaramo.

Uhujimfura Jean Claude wari uhagarariye KIKAC Music muri ibi biganiro yabwiye IGIHE ko ibiganiro byabahuje na FERWACY byari bigamije kujya inama ku mitegurire y’ibi bitaramo.

Yagize ati “Twaganiriye byinshi, harimo inama batugiriye ndetse hari n’ibyo natwe twaberetse ko twiteguye gukora. Icyakora ikirenze ibyo byose ni uko ubuyobozi bwa FERWACY bwatwemereye ubufasha no kutuba hafi mu rugendo rwo gutegura ibitaramo bizajya bijyana n’amagare.”

Uyu musore yavuze ko bifuza guhuza amagare n’umuziki kuko abakunzi bayo iyo bamaze kuruhuka mu gihe cya nimugoroba baba bifuza ahantu bahurira bagasabana.

Avuga ko aya azaba ari andi mahirwe ku bafatanyabikorwa ba Tour du Rwanda bazabegera kuko bazaba babonye aho bakongera gutangira ubutumwa bw’ibikorwa byabo.

Aha ni ho Uhujimfura yahereye asaba abafatanyabikorwa ba Tour du Rwanda no gushyigikira ‘Tour du Rwanda Festival’ kuko uretse gususurutsa abantu ariko ni n’umwanya mwiza wo gutambutsa ubutumwa bwabo ku mbaga z’abitabira ibi bitaramo.

Umubare w’ibitaramo ndetse n’aho bizabera, Uhujimfura yavuze ko bizatangazwa mu minsi mike iri imbere.

Iri rushanwa rizenguruka u Rwanda ku magare rigiye kuba ku nshuro ya 15 kuva ribaye mpuzamahanga, biteganyijwe ko rizakinwa ku wa 19-26 Gashyantare 2023.

Tour du Rwanda 2023 izitabirwa n’amakipe 20 yatoranyijwe muri 51 yasabye kuyitabira.

Ubwo ubuyobozi bwa KIKAC Music bwari bumaze kuganira n'ubuyobozi bwa FERWACY ku bitaramo bya 'Tour du Rwanda Festival'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .