Abakobwa bari mu mwiherero wa Miss Rwanda2020 basuwe n’imiryango yabo (Amafoto)

Yanditswe na Nsengiyumva Emmy
Kuya 19 Gashyantare 2020 saa 07:24
Yasuwe :
0 0

Abakobwa bari mu mwiherero wa Miss Rwanda 2020 bishimiye gusurwa n’imiryango yabo yahawe rugari ngo irebe imibereho yabo n’impumeko bafite mu gihe habura iminsi mike ngo hatangazwe uzegukana ikamba rya Nyampinga w’u Rwanda.

Ku wa Kabiri tariki 18 Gashyantare 2020 nibwo ababyeyi n’abavandimwe b’abakobwa bahataniye ikamba rya Nyampinga w’u Rwanda 2020 bugururiwe amarembo yo kubasura mu mwiherero muri Hotel La Palisse i Nyamata.

Iki gikorwa cyabaye cyashyize mu ngiro ibyo ubuyobozi bwa Miss Rwanda bwari bwemereye ababyeyi mbere yuko abakobwa bajya mu mwiherero cyane ko bari babijeje ko bazahabwa umunsi umwe wo gusura abana babo.

Ababyeyi bageze muri Hotel la Palisse i Nyamata bazengurukijwe ibice bitandukanye aba bakobwa bakoreramo ibikorwa binyuranye.

By’umwihariko ababyeyi bajyanywe mu byumba by’abakobwa babatunguye mu rwego rwo kureba aho barara n’isuku irimo.

Byari ibyishimo yaba ku babyeyi no ku bakobwa bari bongeye guhura nyuma y’icyumweru kirenga bari mu mwiherero batangiye ku wa 9 Gashyantare 2020.

Kugeza ubu irushanwa rya Miss Rwanda 2020 riri kugana ku musozo abakobwa bahatanira ikamba bari mu mwiherero mbere y’iminsi itatu ngo hamenyekane uzegukana ikamba.

Aba bakobwa bari mu mwiherero bamaze kuvamo umwe cyane ko ubu basigaye ari 19 nyuma y’uko Ingabire Jolie Ange asezeye mu irushanwa kubera uburwayi.

Umukobwa uzambikwa ikamba rya Nyampinga w’u Rwanda 2020 uzasimbura Nimwiza Meghan ufite irya 2019, azamenyekana mu birori biteganyijwe kubera muri Intare Conference Arena i Rusororo mu ijoro ryo ku wa 22 Gashyantare 2020.

Kugeza ubu amatike yo kwinjira mu irushanwa rya Miss Rwanda 2020 yashyizwe ku isoko; abayashaka bashobora kuyagura bifashishije Mobile Money (*182*8*1*333111#), Ecobank cyangwa bakayasanga kuri Camellia KBC, Keza Saloon no kuri Smart Design.

Ababyeyi basuye abakobwa mu byumba babamo
Abahataniye ikamba bari bafite akanyamuneza
Usibye gusura abana babo, wanabaye umwanya mwiza wo guhuza urugwiro no kumenyana hagati y'imiryango
Ishimwe Naomie yasuwe, anahabwa indabo
Abakobwa bahataniye ikamba rya Nyampinga w'u Rwanda 2020 babaye ba gahuza miryango
Batemberejwe ibice bitandukanye bigize ahabera umwiherero
Byari ibyishimo ku bakobwa n'imiryango yabo

Amafoto: Miss Rwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza