00:00:00 IGIHE NETWORK KN KINYARWANDA EN ENGLISH FR FRANCAIS

Abakobwa 66 bagiye guhatana muri Miss Global Beauty Rwanda

Yanditswe na Uwiduhaye Theos
Kuya 2 May 2022 saa 03:09
Yasuwe :

Abakobwa 66 bagiye guhatana mu irushanwa rya Miss Global Beauty Rwanda, rigiye kongera kuba ku nshuro ya kabiri.

Aba bakobwa batoranyijwe binyuze ku rubuga rwa Embraceafrika rwa sosiyete itegura iri rushanwa. Abazahiga abahiga abandi bazitabira amarushanwa atandukanye mpuzamahanga. Aba bakobwa bashyizwe mu matsinda 11.

Aya marushanwa arimo irya The Miss Globe ribera muri Albania riri mu munani akomeye ku Isi, irya Miss Tourism International ribera muri Malaysia rigamije guteza imbere Ubukerarugendo bw’ibihugu bigize isi na Miss Africa Golden ribera muri Nigeria.

Abakobwa bari guhatana batari bashya mu marushanwa y’ubwiza barimo abitabiriye Miss Rwanda 2022; hari nka Leila Franca Kalila, Sandrine Byiringiro na Fredda Umutoniwase. Hari kandi Cynthia Teta witabiriye iri rushanwa mu 2021 ndetse n’iri mu mwaka ushize ndetse na Gretta Iwacu witabiriye iri rushanwa umwaka ushize.

Irushanwa rya Miss Global Beauty Rwanda riheruka kuba muri Kamena umwaka ushize.

Ryasojwe abakobwa bane bahawe amakamba arimo iry’igisonga cya kane ryahawe Gretta Iwacu wari unafite irya Miss Congeniality, Grace Ingabire witabiriye Miss Supranational 2020 wabaye igisonga cya gatatu muri iri rushanwa, Bayizere Diane wabaye igisonga cya kabiri muri iri rushanwa na Honorine Uwase wabaye igisonga cya mbere.

Hari kandi Dorinema Queen wegukanye ikamba ry’umukobwa ufite isura nziza kurusha abandi, Stella Matutina wegukanye ikamba rya Miss Tourism World Rwanda 2021, Clémentine Uwimana wegukanye ikamba rya Miss Glam World Rwanda 2021 n’irya Long Gown, Rutayisire Cynthia Umutesi wabaye Miss Tourism Global Rwanda 2021, Landrine Gisagara Uwicyeza watwaye irya Miss Golden Africa Rwanda 2021 na Miss Photogenic ndetse na Irera Queen Isabella wabaye World Top Model Rwanda 2021.

Abategura irushanwa rya Miss Global Beauty Rwanda baheruka kohereza abakobwa bamwe mu batsinze mu marushanwa mpuzamahanga.

Abo barimo Stella Matutina Murekatete wahagarariye u Rwanda mu irushanwa rya Miss Globe ryaberaga i Tirana mu Murwa Mukuru wa Albanie ntabashe kugira ikamba yegukana ndetse na Uwicyeza Gisagara Landrine wambitswe ikamba ry’Igisonga cya Gatatu cya Miss Golden Africa, aho we na bagenzi be bari bahanganye mu irushanwa ryari riri kubera muri Nigeria.

Uyu mukobwa yanahize bagenzi be mu cyiciro cy’umwambaro wa bikini.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .