00:00:00 IGIHE NETWORK KN KINYARWANDA EN ENGLISH FR FRANCAIS

Abahatanye na Bruce Melodie muri "The Choice Awards" bamazwe impungenge zo guhangana na nyiri televiziyo

Yanditswe na Nsengiyumva Emmy
Kuya 21 Mutarama 2021 saa 03:16
Yasuwe :
0 0

ISIBO TV ibinyujije mu kiganiro cy’imyidagaduro cyitwa ‘The Choice’ gikorwa na Phil Peter, M. Irene na Moses Iradukunda yatangiye gutegura ibihembo ngarukamwaka yise ‘The Choice Awards’ igamije gushimira abateje imbere uruganda rw’imyidagaduro.

Abahatanira ibi bihembo bashyizwe mu byiciro bitandukanye, mu rwego rwo kurebera hamwe uko abahatana bitwaye mu mwaka wa 2020 ari nawo uzareberwaho ibikorwa.

Mu cyiciro cy’Umuhanzi wakoze indirimbo ifite amashusho meza hari guhatana "Saa Moya" ya Bruce Melodie, "Bon" ya Davis D, "Player" ya Butera Knowless, "Zoli" ya Nel Ngabo na "Atansiyo" ya Platini.

Muri iki cyiciro uwahamya ko hazaca uwambaye ntiyaba abeshye kuko umwaka ushize aba bahanzi bari mu bakoze indirimbo nziza mu buryo bw’amashusho.

Nubwo abahatana ari babiri umwe aba yigiza nkana, ariko hari n’uwagira impungenge ku mahitamo ashobora kuyoborwa n’amarangamutima mu itangwa ry’iki gihembo.

Izi mpungenge zishingiye ku kuba abahatanira iki gihembo bahanganye na Bruce Melodie uri mu bashoye imari muri Televiziyo ya Isibo iri kubitegura.

Umuvugizi wa ‘The Choice Awards’, Phil Peter, yamaze impungenge abakurikiranira hafi ibijyanye n’umuziki, ababwira ko Bruce Melodie nta bushobozi azaba afite mu itangwa ry’ibihembo ku buryo yabihabwa atabikwiye.

Yavuze ko abantu bakwiye kwikuramo imyumvire y’uko umuntu ufite aho ahuriye n’irushanwa adakwiye kurihatanamo mu gihe abikwiye.

Yagize ati “Bruce Melodie ni umushoramari mu Isibo TV ariko ntaho ahuriye n’itangwa ry’ibihembo. Ku rundi ruhande ariko abantu bakwiye kumva ko umuntu ufite aho ahuriye n’ikigo ashobora kugihatanamo mu gihe hari amahirwe gitanze.”

Ushaka kureba uko izi ndirimbo zagiye zirushanwa kurebwa kurusha izindi, wareba ku rubuga rwa YouTube bashyiraho amashusho yazo.

"Saa Moya" ya Bruce Melodie imaze amezi atanu kuri YouTube imaze kurebwa n’abarenga 2 700 000, "Bon" ya Davis D yo imaze ukwezi kumwe yarebwe n’abarenga ibihumbi 400, "Player" ya Butera Knowless imaze amezi ane imaze kurebwa n’abarenga gato ibihumbi 100, "Zoli" ya Nel Ngabo imaze amezi atandatu yarebwe n’abarenga ibihumbi 800 mu gihe "Atansiyo" ya Platini imaze amezi abiri imaze kurebwa n’abarenga ibihumbi 400.

Mu majwi yo kuri site itorerwaho, igice gifite 40% by’amajwi yose, "Bon" ya Davis D ni yo iyoboye n’amajwi arenga 300, igakurikirwa na "Saa Moya" ya Bruce Melodie na yo yarengeje amajwi 300.

Nk’ijisho ry’umunyamakuru, muri iki cyiciro bigaragara ko "Atansiyo" ya Platini, "Saa Moya" ya Bruce Melodie na "Bon" ya Davis D nizo zifite amahirwe menshi yo kubonekamo imwe izegukana iki gihembo.

"Bon" ya Davis D ni imwe mu zihatana muri The Choice Awards 2020
Nel Ngabo ni umwe mu bahanzi bashya bashyizwe mu byiciro bikomeye
Indirimbo "Atansiyo" ya Platini ni imwe mu zikunzwe bikomeye
Indirimbo "Player" ya Butera Knowless iri guhatana muri iki cyiciro
Bruce Melodie ufite imigabane mu Isibo Tv ari guhatana muri iki cyiciro
Bruce Melodie yari mu kiganiro The Choice cyatangije televiziyo Isibo
Abahatana mu cyiciro cya The Choice Video of the Year

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .