00:00:00 IGIHE NETWORK KN KINYARWANDA EN ENGLISH FR FRANCAIS

Abahanzi nyarwanda bashya bo kwitega mu 2023

Yanditswe na Uwase Kevine
Kuya 19 Mutarama 2023 saa 12:24
Yasuwe :

Umuziki ni kimwe mu bintu bimaze guhabwa umwanya munini kugeza uyu munsi ugereranyije n’indi myaka yabanje, kandi uri gushyirwamo imbaraga mu kuwuteza imbere ku bawukora, abawutunganya n’abategura ibitaramo by’imyidagaduro mu Rwanda.

Ntitukibarira ku ntoki abahanzi babarizwa mu Rwanda, kuko uko iminsi igenda ihita indi ikaza, niko tugenda tubona amaraso mashya mu ruganda rwa muzika kandi ashoboye, bamwe twavuga ko bamaze no gutera intambwe ishimishije.

Kuva mu 2020, twagiye tubona abahanzi nka Juno Kizigenza, Kenny Sol, Ariel Wayz, Chris Eazy n’abandi bagiye batera ikirenge mu cyaba The Ben, Bruce Melodie, Knowless n’abandi, ndetse bazamura ibendera ry’Igihugu mu mahanga kubera umuziki wabo.

Ni muri urwo rwego IGIHE yabateguriye abandi bahanzi bashya bafite impano bo kwitega mu 2023, ndetse bamwe batangiye gukora ibikorwa byishimiwe n’abakunzi b’umuziki nyarwanda.

Bruce the 1st

Mukiza Bruce, umuraperi wamenyekanye ku izina rya Bruce the 1st muri muzika, ni umusore muto w’imyaka 21 wigaruriye imitima y’abakunda injyana ya ‘Drill’.

Bruce the 1st watangiye umuziki mu 2020, impano ye yatangiye guhangwa amaso ubwo yakoranaga indirimbo na Ish Kevin bise ‘Tugende’.

Mu 2022 nibwo uyu musore yashyize hanze ‘Mixtape’ yise ‘Sad Boys’ iriho indirimbo yakoranye n’abahanzi batandukanye harimo ‘Ku muhanda’ yakoranye na Juno Kizigenza, ‘Umutima’ yakoranye na Kenny K-Shot, Icara utagwa n’izindi.

Li John

Umuhanga mu gutunganya amajwi y’indirimbo Iradukunda Jean Aimé wamenyekanye nka Li John, kuva aho yatangiye gukora indirimbo ze harimo iyo yise ‘Imbunda’, ‘Ok’ yakoranye na Marina n’izindi, abakunzi b’umuziki bahora banyotewe nibyo uyu musore abafitiye mu biganza.

Li John ukora muri studio ya ‘Storykast Records’ yatangiye gukora ibijyanye n’umuziki kuva 2018, izina rye rimenyekana mu gutunganya amajwi y’indirimbo harimo ‘Kalinga’ ya Dilplomat, ‘Kamwe’ yahuriyemo abahanzi batandukanye nka Bulldog, Davis D, Alyn Sano n’abandi.

Uyu musore uherutse gushyira hanze indirimbo yakoranye na Papa Cyangwe yise ‘Pola’ mu ntangiriro z’uyu mwaka, ni umwe mu basore bakwiye kwitegwaho indirimbo zinyura benshi mu ruganda rwa muzika.

Joe West

Bigiribambe Josue wamenyekanye ku izina rya Joe West, ni umwe mu basore bakwiye kwitega muri uyu mwaka wa 2023.

Joe West wari usanzwe asubiramo indirimbo z’abandi mu buryo buzwi nka ‘Cover songs’, yatangiye gukora umuziki we mu 2022, ku ndirimbo ye ya mbere yise ‘Hejuru’.

Uyu musore muto w’imyaka 21, yatangiye gutwara imitima y’abakunzi b’injyana ya R&B ku ndirimbo yakoze nka Agahapinesi, Ndatinda n’izindi, zamuhesheje guhatana mu bihembo bya Isango na Muzika mu 2022, nk’umuhanzi mushya witwaye neza.

Yago

Nyarwaya Yago wamenyakanye ku biganiro yakoraga ku rubuga rwa ‘YouTube’ rwitwa ‘Yago TV show’ atumira ibyamamare bitandukanye, yatunguye abantu benshi ubwo yinjiraga mu ruganda rwa muzika mu 2022.

Ku ndirimbo yahereyeho yise ‘Suwejo’, Yago yagaragaje ko afite impano mu gukora umuziki ndetse bituma ahangwa amaso mu bahanzi bafitiye abakunzi b’umuziki byinshi mu mwaka wa 2023.

Kugeza ubu Yago afite indirimbo ebyiri yakoze harimo niyo yise ‘Rata’ aherutse gushyira hanze mu ntangiriro z’uyu mwaka, ndetse zamubereye ikiraro cyo kugira abantu benshi bakunze impano ye yo kuririmba.

Sagamba

Bakuramutsa Sagamba wamenyekanye ku ndirimbo yanditse yise ‘Demo’ yakoranye na Ariel Wayz, Kivumbi King n’abandi, ni umwe mu basore bakwiye guhangwa amaso mu 2023.

Indirimbo ya ‘Demo’ yavugishije benshi kubera uburyo yanditswemo buzwi nk’igifefeko butandukanye n’ubundi bumenyerewe, bituma ikururura abakunzi b’umuziki ndetse bibaza ku bisobanuro by’iyo ndirimbo inafite injyana ikunzwe na benshi mu myidagaduro.

Uyu musore w’imyaka 24 uherutse gushyira hanze indirimbo yise ‘20 Sum’, yakunze gukora umuziki ndetse yandika indirimbo kuva kera, afata umwanzuro wo kwinjira mu ruganda rwa muzika mu 2022, ndetse n’umwe mu bakiriwe neza mu bakunzi b’umuziki nyarwanda.

Mistaek

Bahizi Zitoni Eddy Nest wamenyekanye nka Mistaek, ni umusore wakunzwe ku ndirimbo yise ‘Kucyaro’ yashyize hanze mu 2022 n’amashusho yayo.

Mistaek ni umusore w’imyaka 22, wakuze mu muryango w’abanyempano b’umuziki bituma nawe akura awukunda, ku buryo yagiye kongera ubumenyi bwawo ku ishuri rya muzika riherereye i Muhanga.

Impano ye y’umuziki ikunzwe n’abatari bake mu Rwanda ihanzwe amaso mu mwaka wa 2023.

Yampano

Uworizagwira Florien wamenyakanye ku izina rya ‘Yampano’ yagaragaje impano idasanzwe ubwo yashyiraga hanze indirimbo yise ‘Uwo muntu’ yatumye abantu benshi bamenya impano ye.

Yampano wahataniye ibihembo bya Kiss Summer Awards 2022 itegurwa na radiyo ya Kiss FM hamwe na Isango na Muzika Awards itegurwa na radiyo ya Isango star nk’umuhanzi mushya witwaye neza, yatangiye umuziki neza mu 2021 ku ndirimbo yakoze yise ‘Priave’.

Impano ye yo kuririmba ndetse no kwandika neza, ni muri bimwe byatuma ahangwa amaso mu mwaka wa 2023, ku byo yaba ari gutegurira abakunzi b’umuziki, dore ko banyuzwe nizo amaze kubaha uhereye ku yo yise ‘Uwo muntu’.

Yassin Indistizo

Yassin Indistizo umenyerewe mu njyana ya ‘Drill’ ndetse na Hip Hop ni umwe mu basore bakwiye guhangwa maso mu 2023 mu muziki nyarwanda.

Uyu musore aherutse gushyira hanze indirimbo yise ‘Period’ yakoranye na Uwamahoro Malaika wamenyekanye mu gukina filime, no gukora imivugo ku rwego mpuzamahanga, yiyongera ku zo yakoze harimo ‘Buri Kimwe’ yakoranye na Kenny K-Shot, ‘Drama’ n’izindi.

Shemi

Shema Mico Gibril wamenyakanye ku izina rya ‘Shemi’ ni umusore wakuruye igikundiro ku bakunzi b’umuziki, ku ndirimbo yakoze yise ‘Peace of Mind’.

Shemi ni umuhanzi wari usanzwe ukora umuziki yumvikana mu ndirimbo z’abandi bahanzi bamaze gutera intambwe harimo Logan Joe na Maestro Boomin.

Uyu musore ukiri muto impano ye yo kuririmba yasakaye mu bakunzi b’umuziki ituma ahangwa amaso muri uyu mwaka wa 2023.

Ririmba

Ririmba ni umusore ufite impano yo kuririmba akanakora injyana ya Hip Hop, yamenyakanye mu ndirimbo yakoranye na Ish Kevin, Logan Joe na Kenny K-Shot.

Uyu musore uherutse gushyira album ye ya mbere hanze yise ‘Nitwa ririmba’ mu ntangiriro z’uyu mwaka, yatumye ahagwa amaso mu bafite impano yo kuririmba mu ruganda rwa muzika, ndetse bakwiye gukurikiranywa umunsi ku wundi muri uyu mwaka wa 2023.

Kabarankuru Icon

Umusore w’umuraperi Kabarankuru Icon wihebeye injyana ya Hip Hop, yakunzwe ku myandikire ye y’indirimbo, aho yandika inkuru z’ibintu bibabo mu buzima busanzwe.

Hari nk’indirimbo yanditse ivuga ku musore winginga Se umubyara ngo areke kumutwara umukobwa yakundaga, ariko bikarangira Se amutwaye.

Kabarankuru Icon ni umusore ukwiye guhangwa amaso ku mpano ye yo kuririmba mu 2023, dore ko yagiye kongera ubumenyi ku bijyanye n’umuziki ku ishuri ry’umuziki riherereye i Muhanga.

Day Maker

Habimana Patrick wamenyakanye ku izina rya ‘Day Maker’, ni umwe mu basore bakwiye kwitega mu 2023 mu muziki nyarwanda.

Day Maker aherutse gushyira hanze album ye yise ‘Fame is a gift’ iriho indirimbo 23, zirimo ‘Mama nkunda’, ‘My job’, ‘Hasii’ n’izindi.

Uyu musore yitabiriye Art Rwanda-Ubuhanzi 2022, agira agahigo ko kuba ariwe muhanzi wari ufite indirimbo nyinshi kurusha abandi mu irushanwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .