Abahanzi umunani barimo umukecuru w’imyaka 65 bageze kuri finali ya Hanga Higa itegurwa na Alain Muku

Yanditswe na Nsengiyumva Emmy
Kuya 19 Ukwakira 2019 saa 07:14
Yasuwe :
0 0

Abahanzi umunani muri 19 bahatanaga muri ½ babashije kwinjira mu cyiciro cya nyuma cy’irushanwa Hanga Higa ryatangijwe na Alain Muku mu mwaka wa 2013, rikaba ribaye ku nshuro ya gatatu ribaye.

Iri rushanwa rifite muri gahunda gufasha abahanzi bakiri bato badafite ubushobozi kandi bafite impano ntashidikanywaho nk’uko Alain Muku yabitangarije IGIHE.

Alain Muku yavuze ko uyu mwaka ubwo hatoranywaga abahatana byahereye mu ntara zose ariko bikorwa mu buryo butamamajwe bikomeye.

Nyuma yo kuzenguruka intara zose ngo batoranyije abantu 19 babashije kugera muri ½ , kuri uyu wa Gatanu tariki 18 Ukwakira 2019 bahataniye kwinjira mu cyiciro cya nyuma.

Muri 19 bari bageze muri ½, umunani nibo batsinze ; Uwase Nadia na Mushashi Odile bo mu karere ka Ngoma, Rugamba Claude w’i Rusizi, Cyilima Buhungiro Jean Climaque w’i Kirehe, Itsinda ry’Abatanihira, Itsinda rya Gakondo y’Igisaka cy’imigongo mu karere ka Kirehe, Niyigena Hycinthe w’i Musanze, Ganza Michael w’i Musanze na Uwimana Esther w’i Ngoma.

Itsinda rya Gakondo y’Igisaka cy’imigongo mu karere ka Kirehe niryo ririmo umukecuru w’imyaka 65 Mariyana Nyiramatabaro ucuranga umuduri afatanya n’abuzukuru be.

Alain Muku yavuze ko iri rushanwa ryagiye rihura n’ingorane, ati” Mu mwaka wa 2015 ryasaga naho rimaze gukomera nabonye n’umuterankunga ariko biba ngombwa ko mpita ngenda risa n’iridindiye gutyo.”

Uyu mugabo yakomeje ahamya ko uzatsinda muri aba azahabwa amasezerano na kompanyi ye ifasha abahanzi ya Boss Papa, ati” Uzatsinda azahabwa amasezerano y’imyaka itatu muri Boss Papa.”

Alain Muku yakomeje avuga ko mu myaka itatu byibuza bazaba bamaze gukora umuhanzi akaba icyamamare bityo ngo basanga amasezerano bamuha aba ahagije ku mpande zombi.

Yavuze kandi ko abahanzi bose bageze muri ½ baba bafite indirimbo 10 zanditse ku buryo uwatsinda wese baba bizeye ko afite ibihangano bihagije byatuma avamo icyamamare.

Umunani bagiye mu cyiciro cya nyuma bazahatana tariki 15 Ukuboza 2019, bazarushanwa baririmba mu buryo bwa Live baherekejwe n’itsinda ry’abacuranzi bazitozanya, bikazabera muri Saint Andre i Nyamirambo.

Reba uyu mukecuru nyuma y’irushanwa ubwo yerekaga impano ye Nsengiyumva wamamaye nka Igisupusupu

Reba hano incamake z’uko irushanwa ryagenze

Cyilima Buhungiro Jean Climaque w’i Kirehe
Itsinda rya Gakondo y’Igisaka cy’imigongo mu karere ka Kirehe
Niyigena Hycinthe w’i Musanze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza