Bari uruvunganzoka! Buravan yakoze igitaramo cy’amateka yamurikiyemo album ye ya mbere (Amafoto na Video)

Yanditswe na Uwiduhaye Theos
Kuya 2 Ukuboza 2018 saa 08:23
Yasuwe :
0 0

Buravan uri mu bahanzi bagezweho muri iki gihe yakoze igitaramo cy’akataraboneka, abantu bamwe babura ibyicaro bahitamo kugikurikira bahagaze.

Iki gitaramo cyo kumurika album ya mbere y’uyu muhanzi yise ‘The Love Lab’ cyabereye muri Kigali Conference & Exhibition Village hahoze hitwa Camp Kigali, kuri uyu wa Gatandatu tariki 1 Ukuboza 2018.

Byari ibyishimo, Umujyi wa Kigali wari wajegejwe n’umuriri w’abenshi basiganwaga n’amasaha bajya kukireba.

Cyari kimaze igihe kinini cyamamazwa mu bitangazamakuru bitandukanye mu Rwanda ndetse no ku mbuga nkoranyambaga, ku buryo ubwitabire bwo hejuru ntawe bwigeze butungura.

Ingeri ziganjemo abakobwa bisanzwe bizwi ko bakunze uyu muhanzi, abana bato ndetse n’abandi b’igitsina gabo bari bakubise buzuye ahabereye igitaramo.

Abantu bamwe babuze aho kwicara bakurikira igitaramo bahagaze

Buravan mu gitaramo cye yafatanyije n’abahanzi barimo itsinda rya Active, Uncle Austin ndetse na Charly na Nina.

Saa mbili zirengaho iminota nibwo ku rubyiniro hajeho MC Phil Peter washyize abantu by’akanya gato mu mwuka w’igitaramo ubundi agahita atumira umusore waje akoresha Saxophone bigashimisha abari bitabiriye.

Saa 20: 50 Buravan yinjiye ku rubyiniro afite isura yihariye yambaye mu buryo bwabanje gutera benshi kujijinganya.

Habanje haza abacuranzi be bambaye imyenda y’umweru ndetse n’udupfuka amazuru babijyanishije n’izina ry’igitaramo bameze nk’abagiye muri Laboratoire.

Buravan nawe mu kwinjira yaje yipfutse mu maso hose ndetse anambaye nk’abacuranzi be abantu bamwe babanza kugira ngo si we.

Yerekeje ku meza yari ariho ibisa nk’imiti yo muri Laboratoire arabivanga afatanyije n’umukobwa baje gukina basa nk’abakundana nyuma yo gusogongera ku byo yavangaga.

Yakuyemo isarubeti asigarana umupira w’ingofero n’ipantalo ubundi atangira kuririmbira abakunzi be.

Igitaramo cy’uyu muhanzi cyari kirimo ibice bigera kuri bine; icya mbere yaje aririmba indirimbo ze zitandukanye zizwi na benshi arangije agaruka aririmba iziri kuri iyi album zitarajya hanze.

Azisoje yahise akomerezaho anaririmbana n’aba bahanzi bamufashije asoreza ku gice cyo gushimira ndetse no kugaragaza umuryango we ari nacyo yaririmbiyemo indirimbo yakoranye na se.

Umwihariko w’iki gitaramo ni uko abahanzi batatu bafashije uyu muhanzi mu gitaramo cye bose nta n’umwe waririmbye indirimbo ye; nka Active baririmbanye iyo bise ‘Canga Irangi’, Charly na Nina baririmbana iyitwa ‘Oroha’ n’aho Uncle Austin bafatanyije iyo bakoze uyu muhanzi agitangira bise ‘Urwo Ngukunda’ iri no mu zahagurukije benshi.

Buravan wagaragazaga akanyamuneza ku maso yagezemo hagati ashimira abantu bari bitabiriye, ariko yerekana n’izindi mpano nshya zirimo umusore witwa ‘Amalon’, ‘Victor Rukotana’ ndetse n’undi witwa ‘Kevin Scar’.

Uyu muhanzi yanafashe akanya yunamira Hirwa Henry witabye Imana ku wa Gatandatu tariki ya Mbere Ukuboza 2012, arohamye mu kiyaga cya Muhazi mu Ntara y’Iburasirazuba.
Mu magambo ya Buravan yavuze ko uyu muhanzi ari umwe mu bari bakomeye u Rwanda rwabuze, ndetse akwiriye guhora azirikwanwa.

Ajya gusoza, Buravan yasanze umuryango we wari urangajwe imbere n’ababyeyi be, aho wari wicaye imbere y’urubyiniro atangira kugenda yerekana buri umwe muri abo bari bitabiriye anavuga isano bafitanye.

Asoze yahise ahamagara se ku rubyiniro basoza baririmbana indirimbo bahuriyemo yitwa ‘Garagaza’ yishimiwe na benshi kuko bayiririmbye abari muri cyumba bose bahagaze.

Indirimbo zose uyu muhanzi yaziririmbye mu buryo bwa live ndetse hari n’izo yacishagamo akazana n’ababyinnyi.

Reba hano bimwe mu bihe by’ingenzi mu gitaramo cya Buravan

Ababyeyi ba Buravan bari baje kumushyigikira
Aline Gahongayire urimo hagati byari byamurenze ibitwenge ari byose
Ama G The Black yitabiriye igitaramo cya mugenzi we
Amalon uri mu bahanzi bakizamuka yahawe umwanya yishimirwa na benshi
Aristide Gahunzire, Ishimwe Clement na Dennis Nsanzamahoro wamenyekanye nka Rwasa ntibatanzwe
Asinah na Shaddy Boo bati 'Ku buzima bwacu'
Asinah yari yabukereye mu myambaro yarangariwe na benshi
Buravan ku rubyiniro
Buravan na Charly baririmbana indirimbo bakoranye
Buravan na Charly na Nina ku rubyiniro
Buravan yari afite ababyinnyi b'abahanga
Buravan yaririmbye mu buryo bw'umwimerere igitaramo cyose
Camp Kigali yari yakubise yuzuye
Dj Marnaud uri mu bavanga imiziki bagezweho mu Rwanda aza imbere gusuhuza abakunzi be
Garagaza Buravan yahuriyemo na se niyo yashyize akadomo ku gitaramo
Hari aho Buravan yageze akina ameze nk'uri guhana isezerano n'umukobwa anamwambika impeta
Ibizungerezi by'i Kigali byari byabukereye ...
Igitaramo cya Buravan cyitabiriwe cyane
Iradukunda Elsa wabaye Miss Rwanda 2017 yari yitabiriye iki gitaramo
Itsinda rya Active ririmbana na Buravan indirimbo bahuriyemo
Kevin uri mu bahanzi b'abanyempano bamuritswe na Buravan mu gitaramo cye
Mani Martin na Andy Bumuntu bari baje gushyigikira Buravan
Masamba iburyo ari kumwe n'umubyeyi wa Buravan
Mu gice cya mbere Buravan yaje yambaye atya
Mushiki wa Buravan ari gufata ifoto y'urwibutso ku gitaramo cy'umuvandimwe we
Muyoboke Alex yari ari muri iki gitaramo
Victor Rukotana ku rubyiniro
Yanyuzagamo agafatanya n'ababyinnyi be
Uncle Austin nawe yafatanyije na Buravan mu ndirimbo bahuriyemo uyu muhanzi agitangira umuziki
Sacha Kate wakundanye na Nizzo na Shaddy Boo bari bambariye ikirori
Kizito Mihigo yari kumwe na Mariva bitabiriye iki gitaramo

Andi mafoto wayasanga hano:

Amafoto: Niyonzima Moïse

Video: George Salomo


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza