Batandatu babonye itike yo guhagararira Uburengerazuba muri Miss Rwanda 2020 yatangiriye i Rubavu (Amafoto na Video)

Yanditswe na Ishimwe Israel, Uwiduhaye Theos
Kuya 21 Ukuboza 2019 saa 02:52
Yasuwe :
0 0

Abakobwa batandatu babonye itike ibemerera guhagararira Intara y’Uburengerazuba mu irushanwa rya Miss Rwanda 2020, ryatangirijwe mu Karere ka Rubavu kuri uyu wa 21 Ukuboza 2019.

Urugendo rwo gushakisha umukobwa uzegukana ikamba rya Nyampinga w’u Rwanda 2020 rwatangiriye i Rubavu mu Burengerazuba bw’u Rwanda aho abakobwa batandukanye bahakomoka bari babukereye biteguye guhatana no kwerekana ko bafite ubwiza bufite intego.

Muri aka gace hiyandikishije abakobwa 50 baturutse mu turere turindwi tugize Uburengerazuba aritwo Karongi, Nyabihu, Rubavu, Rusizi, Ngororero, Nyamasheke na Rutsiro.

Kuri uyu wa Gatandatu, abakobwa 31 ni bo biyandikishije muri bo abagera kuri 13 banyuze imbere y’akanama nkemurampaka.

Abakobwa batandatu ni bo batoranyijwe kuzahagararira Uburengerazuba mu irushanwa rya Miss Rwanda rizasozwa ku wa 22 Gashyantare 2019, ari nabwo hazamenyekana uzambikwa ikamba rifitwe na Miss Nimwiza Meghan.

UKO IGIKORWA CYO GUHITAMO ABAKOBWA BAHAGARARIRA UBURENGERAZUBA CYAGENZE:

-  Igikorwa cyaberaga mu Karere ka Rubavu kirahumuje

18:04: Ijonjora ry’ibanze ryaberaga mu Karere ka Rubavu rirasojwe aho abakobwa batandatu aribo bemerewe gukomeza mu kindi cyiciro cyo guhatanira .

Abakobwa batandatu b'uburanga babonye itike yo gukomeza mu kindi cyiciro cyo guhatanira Miss Rwanda 2020

-  Amazina y’abakobwa b’uburanga bakomeje

1. Akaliza Hope (No 7)

2. Uwamahoro Phoebe (No 11)

3. Uwimana Joyeuse (No 6)

4. Umutesi Denise (No 2 )

5. Umuratwa Anitha (No 10)

6. Uwase Aisha (No 1)

-  Ibyishimo by’abatsindiye guhagararira Intara y’Uburengerazuba

17:56: Abakobwa bose bagarutse imbere y’Akanama Nkemurampaka. Nyuma yo kwiherera no guteranya amanota hagiye gutangazwa abakobwa bashimwe ubwenge, umuco n’ubwiza bakomeza mu kindi cyiciro.

-  Ibibazo byibanzweho byagarutse ku bumenyi rusange n’amakuru agezweho

Abagize akanama nkemurampaka barimo Umurerwa Evelyne, Mike Karangwa na Miss Mutesi Jolly babajije abakobwa bose uko ari 13 babanyuze imbere bitewe n’ururimi buri wese yiyumvamo.

Ibibazo byagarutsweho byibanze ku bumenyi rusange, umuco Nyarwanda n’amakuru agezweho hirya no hino. Buri wese yabazwaga icyamuteye kwitabira irushanwa rya Miss Rwanda 2020.

Mu mishinga abakobwa benshi bagaragaje bibanze ku kibazo cy’inda zitateganyijwe ziterwa abangavu ndetse n’icy’ibiyobyabwenge biri mu bikomeje koreka urubyiruko rwinshi ndetse kikaba gihangayikishije Leta y’u Rwanda.

Mike Karangwa yanyuzagamo agahanura abakobwa bitabiriye iri rushanwa ku buryo bakwiye kwitwara imbere y'akanama nkemurampaka
Mike Karangwa aha umwe mu bakobwa "Yes" yamwemereye gukomeza mu kindi cyiciro
Akanyamuneza kari kose kuri Mike Karangwa na Miss Mutesi Jolly

-  Video: Uko irushanwa ryagenze mu mboni z’abaritegura

17: 40: Akanama Nkemurampaka kagiye kwiherera gatoranye abakobwa bagomba gukomeza muri 13 bakanyuze imbere.

Mu gutanga amanota Ubwiza bwari bufite 30%, Ubwenge bukagira 40% mu gihe Umuco ni 30 %.

-  Video: Abatabashije kwemererwa kunyura imbere y’akanama nkemurampaka bafashe ingamba

Niyitegeka uri mu bakobwa 31 bageze ahatangiriye ijonjora rya mbere ryo gushaka umukobwa uzavanwamo Nyampinga w’u Rwanda 2019 yabwiye IGIHE ko nyuma yo kudakomeza atahanye ingamba nshya. Mu ijambo rigufi yagize ati “Ngiye gusimbuka umugozi.’’

17:20: Mudahogora Quentia Ritha (No 13) afite uburebure bwa 1.73 n’ibilo 59. Ni we mukobwa wa nyuma ugiye kunyura imbere y’Akanama Nkemurampaka.

Yatangiye yivuga mu bisekuru bye, asoreza kuri Nyarwaya rwa Yuhi. Uyu mukobwa waturutse mu Karere ka Gasabo. Yize ibijyanye n’Ishami ry’Imibare n’Ikoranabuhanga.

Umushinga we aramutse atsinze uzibanda ku guhangana n’ikibazo cy’inda ziterwa abangavu, ahereye mu Karere ka Rubavu yiyamamarijemo. Uburyo yivuze n’igihunga yagaragaje byatumye abagize akanama nkemurampaka bamubwira kongera gutekereza neza impamvu yo kwitabira irushanwa.

17:13: Iyamukijije Gaudence (No 12) afite uburebure bwa 1.70 n’ibilo 59. Avuka mu Karere ka Karongi. Uyu mukobwa w’imyaka 19 yavuze ko abaye Nyampinga w’u Rwanda byamufasha gushyira mu bikorwa umushinga we wo gushishikariza abantu guhererekanya amafaranga hifashishijwe ikoranabuhanga mu kwirinda ubujura mu bucuruzi butandukanye.

-  Miss Rwanda 2020 yaherekejwe n’abaterankunga batandukanye

Miss Rwanda 2020 yatewe inkunga n’abaterankunga batandukanye barimo Sosiyete y’Ubucuruzi ya Multi Design Group Ltd itanga serivisi zitandukanye zirimo kugena agaciro k’imitungo, gucunga imitungo itimukanwa, gukora no gucunga imishinga n’ibindi; MTN Rwanda itanga serivisi z’itumanaho; Uruganda rurangajwe imbere no kugira impinduka mu mibereho y’abantu rwa Africa Improved Foods; Ecobank itanga serivisi z’imari; East African Promoters (EAP) itegura ibitaramo n’abandi.

Miss Rwanda 2020 ifite abaterankunga batandukanye barimo Africa Improved Foods
Banki y'Ubucuruzi ya Ecobank iri mu baterankunga b'imena ba Miss Rwanda 2020

17:07: Uwamahoro Phoebe (No 11) afite uburebure bwa 1.70 n’ibilo 69. Yasoje amashuri yisumbuye mu Ishuri ryisumbuye rya Muhazi (Lycée du Lac Muhazi) rizwi nka ASPEJ riherereye mu Murenge wa Muhazi mu Karere ka Rwamagana.

Yagiriwe inama yo gukaza imyitozo, kwita ku ntambuko n’ibindi bizamufasha mu gihe yakomeza mu kindi cyiciro.

17:00: Umuratwa Anitha (No 10) afite uburebure bwa 1.71 n’ibilo 55. Yiga muri Kaminuza ya AUCA. Umushinga we ni uwo kurwanya ibiyobyabwenge n’inda zitateganyijwe.

Umushinga we ashaka kuzakorana n’amashuri azawunyuza muri siporo zitandukanye mu gihe yaba atowe.

16:51: Uwase Sarah (No 9) afite uburebure bwa metero 1.71 n’ibilo 50. Nyuma yo gusubiza ibyo yabajijwe, Umurerwa yamuhaye Oya avuga ko yasubije atifitiye icyizere.

16:30: Kibogo Mbabazi Aline (No 8) afite uburebure bwa 1.70 n’ibilo 76. Afite imyaka 24 y’amavuko, yasoje amashuri yisumbuye mu bijyanye n’Ubukungu.

Yahisemo gukoresha Igifaransa, ni we mukobwa wa mbere wakoresheje uru rurimi. Ikinyarwanda nirwo rurimi rw’ibanze ruri gukoreshwa ariko umukobwa ashobora guhitamo urundi yakoresha bitewe n’ubushake bwe.

Yavuze ko yifuza guhangana n’ikibazo cy’abangavu baterwa inda zitateguwe.

Raporo y’Ikigo cy’Igihugu cy’Ibarurishamibare ku Miturire n’Ubuzima (RDHS) yerekanye ko abangavu baterwa inda bavuye kuri 6.1% mu 2010 bagera kuri 7.3% mu 2015. Nibura umwe mu bakobwa batanu abyara atarageza imyaka 19 y’amavuko. Abana b’abakobwa batewe inda bangana na 49.6% basamye bafite imyaka iri hagati ya 12 na 17.

Imibare yo mu 2016 ya Minisiteri y’Uburinganire n’Iterambere ry’Umuryango igaragaza ko abangavu 17,500 bari hagati y’imyaka 15-17 batewe inda, bivuze ko nibura abana 47 bavukaga buri munsi.

-  Nimwiza Meghan ari gukurikirana ijonjora ryo gushaka uzamusimbura

Nimwiza Meghan wabaye Miss Rwanda 2019 yakurikiranye ijonjora ryo gushakisha umukobwa uzamusimbura ryabereye i Rubavu.

Uyu mukobwa akubutse muri Miss World 2019 aho yaserukanye umushinga wo kurwanya imirire mibi mu bana; ni umwe muri 20 ya mbere yatoranyijwe ituma yinjira mu bakobwa 20 b’ubwiza bufite intego.

Uyu mukobwa mu gihe cy’umwaka amaranye ikamba yagiye akora ibikorwa bitandukanye bigamije gushishikariza urubyiruko kugana ubuhinzi aho yazengurutse mu turere hafi ya twose tw’u Rwanda aganira n’urubyiruko rwo muri za kaminuza no mu mashuri yisumbuye yanagiye yubaka uturima tw’igikoni mu rwego rwo kurwanya imirire mibi.

Miss Nimwiza Meghan ni we ufite ikamba rya Nyampinga w'u Rwanda 2019

16:30: Akaliza Hope (No 7) areshya na metero 1.70 n’ibilo 56. Yiga muri University of Kigali.

Yavuze ko intwaro afite ari ubushake. Ati "Ndashaka kubera ijwi abakobwa kuko utorwa aba ahagarariye abandi." Umushinga we aramutse atowe yawuganisha mu bukerarugendo.

16:23: Uwimana Joyeuse (No 6) afite uburebure bwa 1.82 n’ibilo 62 yavuze ko abaye Nyampinga w’u Rwanda wa 2020 mu byo yakora harimo no kurwanya ikibazo cy’ibiyobyabwenge cyugarije urubyiruko.

Imibare ya Polisi y’u Rwanda yerekana ko kuva muri Mutarama kugeza mu mpera z’Ugushyingo 2019, abarenga 2000 bafatiwe mu biyobyabwenge, muri bo 758 bafatiwe mu turere duhana imbibi n’ibihugu by’ibituranyi.

Uyu mukobwa uvuka mu Karere ka Karongi yavuze ko icyo ashaka gushishikariza urubyiruko ari ukugira umuco wo kwizigama no guteganyiriza ahazaza.

Ati “Maze kwizigamira 300 000 Frw, nabihereye i Remera Rukoma. Ayo nabikaga ni ku yo ababyeyi babaga barampaye yo kujyana ku ishuri.’’

-  Mu mashusho: Ubwiza bw’abakobwa bahatanira guserukira Uburengerazuba

16:12: Mbabazi Doreen (No 5) yabajijwe na Mike Karangwa uruhare Nyampinga w’u Rwanda yagira mu kubungabunga ibidukikije.

Ati “Nashishikariza abantu gukora ubukangurambaga bunyuze mu muganda mu gufasha abantu benshi guhangana n’ibiza.’’

-  Impinduka mu kanama nkemurampaka ko mu ijonjora rya Miss Rwanda 2020

Abanyamakuru Mike Karangwa, Evelyne Umurerwa na Miss Rwanda 2016 Mutesi Jolly batangiranye n’ijonjora ryo gushakisha umukobwa uzegukana ikamba rya Nyampinga w’u Rwanda 2020, aribo bagize akanama nkemurampaka.

Aba basimbuye akanama nkemurampaka kazengurutse umwaka ushize mu ijonjora ryanyuze mu ntara zitandukanye z’u Rwanda n’Umujyi wa Kigali. Mutesi Jolly ni we wenyine wakagarutsemo.

Aka kanama nkemurampaka katanze amanota mu majonjora umwaka ushize kari kagizwe n’Umunyamakuru Michelle Iradukunda, Jolly Mutesi wabaye Nyampinga w’u Rwanda mu 2016 na Uwase Marie France.

Umurerwa Evelyne amaze imyaka isaga 20 mu mwuga w’itangazamakuru, ari mu batoye ba Nyampinga muri Kaminuza y’Imari n’Ubukungu (SFB) mu gihe Mike Karangwa na we afite ubunararibonye bw’imyaka 12 mu bijyanye n’amarushanwa y’ubwiza.

Miss Mutesi Jolly ni umwe mu bakemurampaka muri Miss Rwanda 2020
Mike Karangwa afite ubunararibonye mu bijyanye n'amarushanwa y'ubwiza
Umurerwa Evelyne yinjiye mu kanama nkemurampaka ka Miss Rwanda 2020
Umurerwa Evelyne winjiye mu kanama nkemurampaka ka Nyampinga w'u Rwanda yari afite akanyamuneza
Mike Karangwa yagarutse mu Kanama Nkemurampaka ka Miss Rwanda nyuma y'umwaka w'akaruhuko
Miss Mutesi Jolly yagarutse mu bagize akanama nkemurampaka

16:03: Uwineza Anathalie (No 4) w’imyaka 20 yiga muri ULK Gisenyi mu mwaka wa mbere aho akurikira ibijyanye n’Amategeko.

Yavuze ko ku bijyanye no kwihangira imirimo ari byiza ko Leta y’u Rwanda ishishikariza urubyiruko kuzavamo abantu b’umumaro bafite ibitekerezo byubaka.

Ati “Ubumenyi buriyongera bitewe no kuba ufite ubw’imyuga ashobora no kwiteza imbere.’’

Yavuze ko agiriwe icyizere, azibanda ku “Kurwanya ihohoterwa rikorerwa abana b’abakobwa bari munsi y’imyaka 18 kuko abari muri icyo kigero kubonona uba wangije ahazaza h’igihugu.’’

-  Amazina na nimero abakobwa bahawe bambaye

1. Uwase Aisha (No 1)ureshya na metero 1.74 n’ibilo 50

2. Umutesi Denise (No 2 ) afite uburebure bwa metero 1.71 n’ibilo 55

3. Igitangaza Shekinah Roquelle (No 3) afite uburebure bwa metero 1.71 n’ibilo 53

4. Uwineza Anathalie (No 4) ufite uburebure bwa metero 1.71 n’ibilo 61

5. Mbabazi Doreen (No 5) areshya na metero 1.75 n’ibilo 46

6. Uwimana Joyeuse (No 6) afite uburebure bwa 1.82 n’ibilo 62

7. Akaliza Hope (No 7) areshya na metero 1.70 n’ibilo 56

8. Kibogo Mbabazi Aline (No 8) afite uburebure bwa 1.70 n’ibilo 76

9. Uwase Sarah (No 9 ) afite uburebure bwa metero 1.71 n’ibilo 50

10. Umuratwa Anitha (No 10) afite uburebure bwa 1.71 n’ibilo 55

11. Uwamahoro Phoebe (No 11) afite uburebure bwa 1.70 n’ibilo 69

12. Iyamukijije Gaudence (No 12) afite uburebure bwa 1.70 n’ibilo 59

13. Mudahogora Quentia Ritha (No 13) afite uburebure bwa 1.73 n’ibilo 59

15:56: Igitangaza Shekinah Roquelle (No 3) yanyuze imbere y’akanama nkemurampaka asobanura impamvu zikomeye zimugira igitangaza nk’uko izina rye ribivuga. Uyu mukobwa yasobanuye ko yifuza kuba uw’umumaro muri sosiyete abarizwamo no kuyizanamo impinduka zifatika.

15:50: Umutesi Denise (No 2) w’imyaka 19 wize Ishami ry’Amateka, Ubukungu n’Ubuvanganzo muri Ste Bernadette. Yavuze ko yasanze ashoboye kandi akaba yatanga umusanzu wo kubaka u Rwanda.

Ati “Ihame ry’uburinganire ryatumye ubu umugabo ashobora guhangana n’umugore mu kugaragaza ubushobozi. Kuri ubu abakobwa barakora cyane ku buryo bashobora kugera ku rwego rwa basaza babo.’’

Uyu mukobwa afite inzozi zo guteza imbere u Rwanda no gushyigikira ufite ibitekerezo bizima.

15: 45: Uwase Aisha ufite imyaka 19 wambaye nimero 1 ni we mukobwa wa mbere wanyuze imbere y’Akanama Nkemurampaka.

Uyu munyamideli azatangira Kaminuza mu mwaka utaha wa 2020. Yigiriye icyizere cyo kwiyamamaza kuko ari umuntu wiyizera cyane akaba anafite impano yo kudatsindwa ahubwo icyo atagezeho agifata nk’isomo. Mu mwaka ushize Aisha nabwo yiyamamarije mu Karere ka Rubavu.

Aramutse atsinze ngo yafasha mu mushinga wo kurwanya ihohoterwa rishingiye ku gitsina, yavuze ko nubwo hari ingamba zashyizweho ariko abarikorerwa bacyifitemo kwiheba.

Ati “Nzabafasha kubakura mu kizima bashobore kwinjira mu rumuri rw’ahazaza.’’

15:36: Igikorwa cyo guhitamo abakobwa bazahagararira Uburengerazuba muri Miss Rwanda 2020 kiratangijwe.

Martina Shami ukora KC2, Ishami rya kabiri rya Televiziyo y’u Rwanda ni we ugiye kuyobora igikorwa cyo guhitamo abazitabira Miss Rwanda 2020.

Nyuma yo gutanga ikaze, abakobwa bose uko ari 13 banyuze imbere y’Akanama Nkemurampaka kagizwe na Mike Karangwa, Miss Mutesi Jolly na Umurerwa Evelyne.

15: 10: Abakobwa bahawe nimero bakoresha mu irushanwa nyuma yo kubona abujuje ibisabwa, bategereje kunyura imbere y’akanama nkemurampaka.

Mu bakobwa 50 biyandikishije, uyu munsi hitabiriye 31, muri bo 13 ni bo bujuje ibisabwa.

Abakobwa babanje gupimwa uburebure

-  Ibisabwa umukobwa ngo abashe kwiyandikisha muri Miss Rwanda 2020

- Kuba ari Umunyarwandakazi

- Kuba afite imyaka hagati ya 18 na 24

- Kuba yararangije amashuri yisumbuye

- Kuba avuga neza Ikinyarwanda. (Kuba azi urundi rurimi rwiyongera ku rurimi kavukire mu zemewe n’amategeko mu Rwanda nabyo biremewe)

- Kuba afite uburebure guhera kuri 1,70 m

- Kuba afite BMI iri hagati ya 18.5 na 24.9

- Kuba atarigeze abyara

- Kuba yiteguye kuguma mu Rwanda byibuze mu gihe cy’umwaka nyuma yo gutorwa nka Nyampinga

- Ntagomba gushyingirwa cyangwa gushinga urugo mu gihe akiri Nyampinga

- Kuba yiteguye guhagararira u Rwanda ahantu hose n’igihe cyose abisabwe cyangwa biri ngombwa

- Kuba yiteguye gukurikiza no kubahiriza amahame yose n’amabwiriza agenga ba Nyampinga

-  Abakobwa bose bari kwandikwa bari kuba bitwaje indangamuntu igaragaza umwirondoro wabo n’indangamanota cyangwa ikindi cyangombwa kigaragaza ko basoje amashuri yisumbuye.

13:15: Abakobwa batangiye gupimwa ibiro n’uburebure harebwa abujuje ibisabwa kugira ngo bemererwe kunyura imbere y’akanama nkemurampaka.

Abakobwa bandikwaga babanje kwerekana ibyangombwa byabo

-  Muri Miss Rwanda ya 2020 zahinduye imirishyo!

Mu kiganiro n’itangazamakuru cyabaye ku wa 18 Ukuboza 2019 kigamije gutangiza irushanwa rya Miss Rwanda 2020,hatangajwe impinduka zikomeye zirimo iz’abaterankunga.

Zimwe mu mpinduka zatangajwe n’Umuyobozi wa Rwanda Inspiration Back, Ishimwe Dieudonne, ni uko abakobwa bazaba bemerewe gukoresha Ikinyarwanda nk’ururimi ngenderwaho muri iri rushanwa.

Ikindi cyahindutse ni uko bitandukanye n’indi myaka ubu nta mukobwa wemerewe gutsindirwa mu ntara imwe ngo ajye guhatanira mu yindi nk’uko byari bisanzwe bigenda.

Umushahara wa Miss Rwanda uyu mwaka uzatangwa na Sosiyete ya Africa Improved Food nshya muri iri rushanwa. Usibye umushahara w’ukwezi azahabwa imodoka nshya izatangwa na Suzuki ya Rwanda Motor nk’uko bisanzwe.

Muri uyu mwaka biteganyijwe ko hazahembwa Nyampinga n’ibisonga bye, gusa ibiganiro ku bigo bizabahemba biri kugana ku musozo.

Umukobwa uzaba yakunzwe cyane (Miss Popularity) azahembwa na MTN miliyoni n’igice (1 500 000 Frw) bamuhe uburyo bwo guhamagara na internet mu gihe cy’umwaka wose.

Multi Design Group izahemba Igisonga cya Mbere cya Miss Rwanda 1 200 000 Frw, inahe Miss Rwanda itike y’indege izamujyana Dubai mu biruhuko.

Ecobank nayo iri mu baterankunga bashya b’iri rushanwa rya Miss Rwanda 2020, izaba hafi abakobwa bose bazitabira Miss Rwanda inabafasha ibijyanye no gucunga neza no kwizigamira amafaranga yabo.

Nyuma y’ijonjora ryabereye i Rubavu, biteganyijwe ko ku wa 28 Ukuboza 2019 rizakomereza i Musanze, tariki 4 Mutarama 2020 i Huye mu Ntara y’Amajyepfo, i Burasirazuba mu Karere ka Kayonza ni ku wa 11 Mutarama 2020; amajonjora azasorezwa i Kigali tariki 18 Mutarama 2020.

Igikorwa cya Miss Rwanda kizasozwa tariki 22 Gashyantare 2020 aribwo hazamenyekana uwegukanye ikamba rya Nyampinga w’u Rwanda 2020 asimbuye Nimwiza Meghan ufite irya 2019.

Abakobwa 31 ni bo bageze ahabereye ijonjora ry'ibanze ryatangirijwe mu Karere ka Rubavu
Abakobwa bari bafite akanyamuneza mbere yuko hatangazwa abakobwa 13 banyuze imbere y'akanama nkemurampaka
Ijonjora ry'ibanze ryatangiriye mu Karere ka Rubavu ahatorewe abakobwa bahagarariye Intara y'Uburengerazuba

Akarere ka Rubavu muri Miss Rwanda kazwiho kugira umubare munini w’abakobwa bakunda kukiyamamarizamo.

Umwaka ushize kazamukiyemo abakobwa batandatu barimo Uwimana Triphine Mucyo, Mutoni Deborah, Igihozo Mireille, Uwase Aisha, Tuyishime Vanessa na Mwiseneza Josiane.

Ijonjora rya Miss Rwanda 2020 ryatangiriye muri iyi ntara ryabereye kuri Western Mountain Hotel iri mu Mujyi rwagati wa Rubavu.

Muri iyi ntara ni ho haturutse ba Nyampinga b’u Rwanda nka Mutesi Jolly, Iradukunda Elsa na Iradukunda Liliane batowe mu 2016, 2017 na 2018.

Ni naho hakunze kubera udushya kuko Uwase Hirwa Honorine wamamaye nka Igisabo mu 2017 akaza no guhabwa ikamba rya Miss Populality muri iri rushanwa niho yiyamamarije ndetse na Mwiseneza Josiane wavugishije benshi umwaka ushize kubera kwitabira n’amaguru na we akaza kwegukana ikamba nk’iri yari yiyamamarije muri iyi ntara.

Amafoto: Miss Rwanda

Interviewer: Nsengiyumva Emmy

Video: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .