Abakobwa 20 b’uburanga bemerewe guhagararira Kigali muri Miss Rwanda 2020 (Amafoto & Video)

Yanditswe na Ishimwe Israel, Nsengiyumva Emmy, Uwiduhaye Theos
Kuya 18 Mutarama 2020 saa 02:37
Yasuwe :
0 0

Nyuma yo kuzenguruka mu ntara zitandukanye z’u Rwanda, ijonjora ry’ibanze mu irushanwa ryo gushaka Nyampinga w’u Rwanda 2020 ryasorejwe mu Mujyi wa Kigali, ahatoranyirijwe abakobwa 20.

Igikorwa cyo guhitamo abakobwa b’uburanga, ubwenge n’umuco cyabereye kuri Hilltop Hotel i Remera ku wa Gatandatu, tariki ya 18 Mutarama 2020.

Abakobwa 20 bavuye muri Kigali basanze abandi 34 batoranyirijwe mu ntara enye z’u Rwanda kuva mu Ukuboza 2019.

Irushanwa rya Miss Rwanda ryatangiriye mu Karere ka Rubavu ku wa 21 Ukuboza 2019, ahatoranyirijwe abakobwa batandatu bemerewe guhagararira Intara y’Uburengerazuba; ku wa 28 Ukuboza 2019 mu Karere ka Musanze hatoranyijwe abakobwa batandatu bazahagararira Amajyaruguru.

Umwaka wa 2020 watangiye irushanwa rikomereza mu Karere ka Huye aho ku wa 4 Mutarama havuye abakobwa barindwi bahagarariye Amajyepfo.

Urugendo rw’ijonjora ry’ibanze mu ntara rwasorejwe mu Karere ka Kayonza, ahavuye abakobwa 15 bahagarariye Uburasirazuba.

Umujyi wa Kigali ni wo watanze abakobwa benshi ugereranyije n’izindi ntara. Abanyamujyi baserutse bifitiye icyizere cyane binagaragarira mu mishinga abakobwa bawuhatanyemo batanze n’amahitamo ya bamwe yo gukoresha Icyongereza [cyakoreshejwe n’abagera ku munani] bitandukanye no mu tundi duce aho benshi bahisemo gukoresha Ikinyarwanda.

Rwari urugendo rutoroshye! Nyuma yo kuzenguruka intara zitandukanye guhera mu Ukuboza umwaka ushize, abakobwa 20 baboneye mu Mujyi wa Kigali itike yo guhatana muri Miss Rwanda 2020.

Ni ku nshuro ya 10 hari gushakishwa uzambara ikamba rya Miss Rwanda, nyuma y’abandi batandukanye batowe mu myaka ishize.

Ba nyampinga bamaze gutorwa ni Bahati Grace watowe mu 2009 na Mutesi Kayibanda Aurore wa mu 2012 bose baturutse mu Ntara y’Amajyepfo, Akiwacu Colombe wambitswe ikamba mu 2014 ava mu Burasirazuba, Kundwa Doriane wabaye nyampinga mu 2015 ava i Musanze mu Majyaruguru.

Mutesi Jolly, Iradukunda Elsa na Iradukunda Liliane batowe mu 2016, 2017 na 2018 bose baboneye itike i Rubavu mu Ntara y’Uburengerazuba na Nimwiza Meghan ufite iri kamba mu 2019 wiyamamarije mu Mujyi wa Kigali.

UKO IRUSHANWA RYAGENZE:

-  KIGALI iracyari ku isonga!

-  Video: Reba ubwiza bw’abakobwa bazahagararira Kigali muri Miss Rwanda 2020

-  Amafoto y’ibyishimo by’abakobwa bakomeje mu kindi cyiciro!

Nyuma yo gutangazwa kw’abakomeje, abakobwa bagaragaje ibyishimo by’intambwe bateye yo guhagararira Umujyi wa Kigali muri Miss Rwanda 2020.

Abagize imiryango, inshuti n’abavandimwe b’abakobwa bakomeje bakiranye iyo nkuru ibyishimo, babagwa mu byano mu kwishimira iyo ntsinzi.

20:03: Igikorwa cyo guhitamo abakobwa bazahagararira Umujyi wa Kigali cyahumuje. Aka gace kakomeje kuza ku isonga y’izindi ntara kuko niwo watoranyirijwemo abakobwa benshi bazahatana muri Miss Rwanda 2020.

Havuye abakobwa 20 mu gihe Intara y’Uburasirazuba ariyo yari ifite benshi, abagera kuri 15 baboneye itike mu Karere ka Kayonza.

Amafoto y’abakobwa 20 bakomeje mu kindi cyiciro cya Miss Rwanda

-  Amazina y’abakobwa 20 batoranyirijwe guhagararira Umujyi wa Kigali muri Miss Rwanda 2020:

1. Tuza Prime Rose (No 22)

2. Mpinganzima Josephine (No 19)

3. Murerwa Blandine (No 3)

4. Irakiza Alliance (No 24)

5. Teta Mauren (No 4)

6. Uwimpaye Marlene (No 25)

7. Kamikazi Rurangirwa Nadine (No 5)

8. Utamuliza Ella (No 17)

9. Gaju Evelyne (No 28)

10. Umumararungu Ange Aline (No 10)

11. Mutesi Denyse (No 27)

12. Ishimwe Divine (No 14)

13. Ishimwe Melissa (No 21)

14. Kamikazi Celia (No 8)

15. Kirezi Rutaremara Brune (No 30)

16. Mutegwantebe Chanice (No 7)

17. Marebe Benitha (No 15)

18. Umulisa Rosemary (No 31)

19. Ingabire Gaudence (No 23)

20. Nishimwe Naomie (No 26)

Nishimwe Naomie yiyamamarije mu Mujyi wa Kigali aho yatoranyirijwe mu bakobwa bemerewe kuwuhagararira

19:53: Abagize Akanama Nkemurampaka bagarutse mu myanya yabo nyuma yo guteranya amanita. Hagiye gutangazwa amazina y’abakobwa biyongera kuri 34 batoranyirijwe mu ntara, bose bahataniye kwambikwa ikamba rya Nyampinga w’u Rwanda 2020.

-  Miss Rwanda 2020 irashyigikiwe!

Kuva ijonjora rya Miss Rwanda 2020 ryatangira, hari abaterankunga batandukanye barishyigikiye aho bamwe bazatanga ibihembo ku mukobwa uzahiga abandi agahabwa ikamba ndetse n’ibisonga bye.

Izi ni zimwe muri serivisi z’ingenzi zitangwa n’ibigo biri gukorana na Rwanda Inspiration Back Up iyoborwa na Ishimwe Dieudonné wamamaye nka Prince Kid ikaba ariyo itegura Miss Rwanda.

-  MTN Rwanda

Sosiyete y’itumanaho ya MTN Rwanda iri mu baterankunga b’imena ba Miss Rwanda 2020. Yatangiye gukorera mu Rwanda mu 1998. Imibare yo muri Werurwe 2019 igaragaza ko ari wo murongo uhuriweho n’abanyarwanda benshi, bagera kuri miliyoni 4.8.

Imibare yo mu Ukuboza 2018 igaragaza ko MTN yinjije miliyari 30.1 Frw muri uwo mwaka mbere yo gutanga imisoro, ibona inyungu ya miliyari 7.7 Frw.

Mu mwaka wa 2017, MTN yaguye mu gihombo cya miliyari 8.5 Frw ahanini bitewe n’ihazabu ya miliyari 15.5 Frw yaciwe n’Urwego Ngenzuramikorere (RURA) n’abashinzwe imisoro.

Muri uwo mwaka iyi sosiyete yishyuye imisoro ya miliyari 28 Frw na miliyari 8.2 Frw ku banyamigabane bayo.

Muri Nzeri umwaka ushize MTN Rwanda, yahawe umuyobozi mushya,witwa Mitwa Kaemba Ng’ambi, wasimbuye Bart Hofker, wari umaze imyaka itatu ayiyobora.

MTN Rwanda yemeye guhemba Miss Popularity wa Miss Rwanda 2020 1 500 000 FRW akagirwa Brand Ambassador wa MTN Yolo, azahabwa iPhone 8Plus ya 64 GB ndetse anahabwe guhamagara no gukoresha Internet ku buntu mu gihe cy’umwaka azamarana iri kamba.

-  Songa Logistics

Songa Logistics ni kimwe mu bigo bishya byinjiye mu baterankunga bashya ba Miss Rwanda , iki kigo cyiyemeje guhemba umukobwa uzegukana ikamba ry’Igisonga cya kabiri Miliyoni imwe n’ibihumbi magana abiri (1 200 000frw) akanaba ambasaderi wabo umwaka wose.

Songa Logistics ikorera i Gikondo mu Mujyi wa Kigali (Rwandex). Ikora ibikorwa bijyanye n’ubwikorezi bw’ibintu byinjira mu Rwanda bivuye mu mahanga, yunganira abacuruzi mu bijyanye n’imisoro n’amahoro, ikanakora ubwikorezi bw’ibintu biri mu gihugu hagati yaba kwimura ibintu n’abantu bava ahantu hamwe bajya ahandi. Iki kigo kimaze imyaka ibiri.

-  Rwanda Motors

Imodoka nshya (Zero Kilometre) yo mu bwoko bwa Suzuki Swift 2019 izatangwa na Suzuki binyuze muri Rwanda Motor.

Rwanda Motors iri mu baterankunga ba Miss Rwanda yatangiye gukora mu 1967, ni iya kompanyi yo Bubiligi. Mu Rwanda Rwanda Motor ni imwe muri Sosiyete zigurisha imodoka zikomeye mu Rwanda.

-  Africa Improved Foods

Africa Improved Foods ni yo izahemba Miss Rwanda 2020 umushahara w’ibihumbi 800 ku kwezi mu gihe cy’umwaka.

AIF ni uruganda rwegukanye igihembo cy’indashyikirwa mu gukora ishoramari ryagize akamaro mu 2017.

Ubwo ibi bihembo ngarukamwaka byatangwaga ku nshuro ya gatanu ku wa 19 Mutarama 2018, Ikigo cy’Igihugu cy’Iterambere (RDB) cyahembye ibigo 10 maze AIF yegukana igihembo nyamukuru nk’umushoramari w’umwaka.

Uru ruganda ruherereye mu cyanya cyahariwe inganda mu Mujyi wa Kigali (Kigali Special Economic Zone) rwahawe n’igihembo cy’umusoreshwa mwiza w’umwaka wa 2017.

AIF ikora ibiribwa bifasha abari mu kaga; ni ifu y’igikoma yitwa “super cereal” yoherezwa mu nkambi z’impunzi muri Sudani, Burundi, Uganda na Kenya.

Bakora n’ifu yitwa “Shisha Kibondo” muri Porogaramu ya Goverinoma yo kurwanya imirire mibi. Iyi fu ihabwa abagore batwite, abonsa n’abana bari hagati y’amezi atandatu n’imyaka ibiri bari mu cyiciro cya mbere cy’Ubudehe mu rwego rwo kurwanya imirire mibi mu minsi ya mbere 1,000 y’ubuzima bw’umwana.

N’ifu icuruzwa harimo Nootri Mama igenewe abagore batwite n’abonsa na Nootri Toto igenewe abana guhera ku mezi atandatu. Ifu yacu yunganira ibere, ntirisimbura. Igicuruzwa gishya twashyize ku isoko ni ifu twise ‘Nootri Family’ igenewe umuryango wose muri rusange harimo n’abagabo.

-  Banki y’Ubucuruzi ya Ecobank

Miss Rwanda 2020 ifite abaterankunga benshi banakomeye bayobowe na ECOBANK nk’umuterankunga mukuru w’irushanwa.

Banki y’Ubucuruzi ya Ecobank Rwanda Plc ni imwe mu zikomeye mu Rwanda. Iki kigo cy’imari kimaze kubaka izina mu gutanga serivisi mu bihugu 33 muri Afurika hose, cyanahagurukiye gutanga serivisi ku bakiliya bacyo hose binyuze mu ikoranabuhanga rihambaye, bitangirira ku gufungura konti ya Banki utarindiriye kuzuza impapuro hifashishijwe telefoni gusa.

Ecobank kandi igaragaza ko abacuruzi barenga 5530 bari hirya no hino mu gihugu bamaze kwiyandikisha ku gufasha abahaha bifashishije uburyo budasaba guhererekanya amafaranga mu ntoki.

-  Multi Design Group (MD Group)

Uzegukana ikamba rya Miss Rwanda yemerewe itike y’indege izamujyana i Dubai n’ibindi byose bijyanye n’urugendo azakora mu rwego rw’ikiruhuko na kompanyi yitwa Multi Design Group. Ndetse uzaba Igisonga cya mbere azahita agirwa Brand Ambassador wa Multi Design Group izamuhemba 1 200 000 Frw.

Sosiyete y’ubucuruzi ya Multi Design Group isanzwe itanga serivisi zitandukanye zirimo kugena agaciro k’imitungo, gucunga imitungo itimukanwa, gukora no gucunga imishinga n’ibindi, inafite urubuga www.mdgrou.com rusurwa cyane n’abo mu Rwanda no hanze yambariye kwamamariza abashaka kumenyekanisha aya matangazo.

Iyi sosiyete imaze imyaka 10 ikorera ku butaka bw’u Rwanda; muri Kamena 2019 nibwo yatangije serivisi nshya zirimo isoko ryo kuri internet rigurishirizwaho inzu n’ibibanza no guhuza abakiliya n’abagurisha imitungo itimukanwa rukaba rumaze kumenywa na benshi.

-  Mr Endowed

Mr. Endowed ni ikigo gikora imyambaro ya kizungu yitwa Urban Wear mu rurimi rw’Icyongereza, yambarwa ahantu aho ariho hose n’ibindi byijyanye n’imyambarire.

Mr.Endowed kandi ni ikirango gikoreshwa ku myambaro yose yakozwe niyo kompanyi kikaba kigaragaza umwimerere w’iyo myenda.

Yatangiye gukora mu 2016 yatangiranye n’imipira yo kwifubika ifite ingofero (hoodies), idafite ingofero ariyo (Sweaters) n’imipira isanzwe izwi nka T-Shirts.

Muri Miss Rwanda 2020 iri gutera inkunga yo gufasha mu mikorere y’ibirango biri gukoreshwa.

Africa Improved Foods izahemba Miss Rwanda mu gihe cy'umwaka azamarana ikamba
ECOBANK ni umuterankunga mukuru w’irushanwa rya Miss Rwanda 2020

-  19:25: Akanama Nkemurampaka kagiye mu mwiherero, aho kagiye guteranya amanota mbere yo gutangaza abakobwa bakomeje mu kindi cyiciro.

19:18: Umulisa Rosemary (No 31) ni we mukobwa wa nyuma wanyuze imbere y’Akanama Nkemurampaka. Yasoje amashuri mu ishami ry’Imibare Ubukungu n’Ubumenyi bw’Isi. Yabajijwe ibyiza bya siporo, asubiza ko ‘Irindwi indwara’.

Uyu mukobwa afite umushinga wo kurwanya imirire mibi. Ateganya kuzajya ategura utugoroba tw’ababyeyi. Yahawe ‘Yes’ eshatu na Mutesi Jolly, Dr Higiro Jean Pierre na Umurerwa Evelyne.

Uyu mukobwa yitabiriye Miss Rwanda 2020 nyuma yahoo yari ari mu bakobwa 30 bashakishwagamo Miss Career Africa 2019, yahuriyemo abakobwa bo mu RDC, Burundi, Kenya, Tanzania, Sudan, Uganda n’u Rwanda ariko ntabwo yabashije kubona amahirwe yo kugira ikamba na rimwe yegukanamo.

Muri Miss Career Africa uyu mukobwa w’imyaka 22, yari afite umushinga yise Stand and shine, ugamije kurinda abagore n’abakobwa ingaruka zo gusezerana mbere y’igihe.

-  Kigali izongera gutanga Nyampinga?

Nyampinga w’u Rwanda, Nimwiza Meghan ufite ikamba rya 2019, yatoranyirijwe mu Mujyi wa Kigali.

Uyu mukobwa yitabiriye ijonjora ryabereye mu mujyi yatorewemo. Ese birashoboka ko amateka azongera kwiyandika, umukobwa uhiga abandi mu buranga, ubwenge n’umuco mu 2020 akava muri Kigali?

Mu Mujyi wa Kigali ni ho havuye umukobwa, Nimwiza Meghan ubitse ikamba rya 2019.

Uyu mukobwa yiyamamarije muri Kigali mu gikorwa cyabaye ku wa 29 Ukuboza 2018. Yatoranyijwe hamwe na Niyonshuti Assoumpta (No 1), Umutoni Grace (No 17), Gakunde Iradukunda Prayer (No 4), Nimwiza Meghan (No 22), Ibyishaka Aline (No 14) na Uwase Sangwa Odille (No 25).

Nimwiza yambitswe ikamba rya Nyampinga w’u Rwanda mu birori byabereye mu Intare Conference Arena ku wa 25 Gashyantare 2019.

Nimwiza Meghan yiyamamarije mu Mujyi wa Kigali

19:13: Kirezi Rutaremara Brune (No 30) areshya na 1.70 cm. Yarangije amashuri yisumbuye muri Lycée de Kigali mu Ishami ry’Imibare, Ubukungu n’Ubumenyi bw’Isi. Afite umushinga wo guhangana n’ikibazo cy’abakobwa bava mu ishuri.

19:06: Kayiranga Tona Nelly (No 29) afite uburebure bwa 1.71 cm. Yavuze ko abaye Nyampinga w’u Rwanda 2020 azakomereza ku byo ba Nyampinga bamubanjirije bagezeho ariko akanababera inshuti yagera aho batageze.

Uyu mukobwa afite umushinga wo kwimakaza ururimi rw’Ikinyarwanda, avuga ko azakorana n’Inteko Nyarwanda y’Ururimi n’Umuco (RALC) muri uyu mushinga we ndetse akazazenguruka mu mashuri yigisha abana akanagerageza kuganiriza ababyeyi ku ngingo yo kwigisha abana babo Ikinyarwanda.

19:02: Gaju Evelyne (No 28) w’imyaka 20, ureshya na 1.73 Cm yageze imbere y’Akanama Nkemurampaka.

Yabajijwe icyo kuri gahunda Leta iherutse gutangiza yo kwimura abantu batuye mu manegeka. Mu gusubiza avuga ko ari byiza kuko bizatuma abantu batuye mu manegeka badahitanwa n’ibiza.

18:57: Mutesi Denyse (No 27) areshya na 1.70 Cm. Afite umushinga ujyanye no Kurandura burundu ubushomeri ahereye mu mizi yabwo.

18:47: Nishimwe Naomie (No 26) w’imyaka 20. Yahisemo gusubiza mu Kinyarwanda.

Bamubwiye kugira inama bamwe mu Banyarwandakazi badakunda siporo, bamubwira kuvuga ibyiza byayo, mu gusubiza ati “Ikintu cya mbere ni uko ivura indwara nyinshi zirimo umutima no kuvuduka kw’amaraso kandi igatuma umuntu aramba.”

Yavuze ko ibibi bya siporo birimo kuba umuntu yayikora akavunika. Yabajijwe icyo yakora aramutse abaye Nyampinga w’u Rwanda, aravuga ati “Nasangiza abantu ibyo nateganyije mu mushinga wanjye ujyanye no kugabanya agahinda gakabije mu rubyiruko (depression). Urubyiruko rukunze kugira rukirukira mu biyobyabwenge rukaniyahura.”

-  Multi Design Group yijeje inkunga ku bakobwa bo muri Miss Rwanda

Kwizera Fidèle uhagarariye Sosiyete y’Ubucuruzi ya Multi Design Group yavuze ko bishimiye uko irushanwa riri kugenda.

Yagize ati “Birashimishije uko irushanwa riri kugenda, abakobwa bariteguye kandi bari gusubiza neza. Miss Rwanda iri kugenda igera ku rwego rwiza icyo twavuga ni yakomeza guteza imbere umwana w’umukobwa. Nababwira ko tubashyigikiye kandi tuzakomeza kubatera inkunga irimo n’iy’ibitekerezo.’’

Sosiyete y’Ubucuruzi ya Multi Design Group isanzwe itanga serivisi zitandukanye zirimo kugena agaciro k’imitungo, gucunga imitungo itimukanwa, gukora no gucunga imishinga n’ibindi, inafite urubuga www.mdgrou.com rusurwa cyane n’abo mu Rwanda no hanze yambariye kwamamariza abashaka kumenyekanisha aya matangazo.

Kwizera Fidèle yashimye uko irushanwa riri kugenda

-  Uko amanota atangwa

Abakobwa banyura imbere y’Akanama Nkemurampaka basubiza, bahabwa amanota mu buryo butandukanye.

Mu gutanga amanota Ubwiza bwahawe 30%, Ubwenge bukagira 40% mu gihe Umuco ni 30 %.

18:43: Uwimpaye Marlene (No 25) afite imyaka 19 yasoje amashuri yisumbuye umwaka ushize mu ishami ry’Imibare, Ubukungu n’Ikoranabuhanga.

Yabajijwe ibintu bine yasangiza abantu u Rwanda rumaze kugeraho muri iki gihe byo kwishimirwa, arasubiza ati “Umugore yahawe agaciro, u Rwanda ni igihugu kiri gutera imbere mu ikoranabuhanga, isuku yitabwaho cyane ikindi n’uko u Rwanda rwabashije kugera ku rwego rwo kurwanya ku rwego rwo hejuru.”

18:40: Irakiza Alliance (No 24) afite imyaka 21, yiga muri ALU mu Ishami rya International Business.

Yabajijwe icyo yumva kuri ‘Ndi Umunyarwanda’, mu gusubiza ati “Nyuma ya Jenoside yakorewe Abatutsi mu 1994, hatangijwe gahunda ya ‘Ndi Umunyarwanda’ igamije gushishikariza Abanyarwanda kwiyumvanamo no gukunda igihugu cyabo.”

18:34: Ingabire Gaudence (No 23) afite imyaka 22, akaba yiga muri Kaminuza ya Kigali mu Ishami rya Business Management and Economics.

18:25: Tuza Prime Rose (No 22) w’imyaka 20 yasoje amashuri yisumbuye mu by’Ubukorikori, Iyobokamana n’Ubugeni. Afite umushinga ujya no kwigisha urubyiruko kwihangira imirimo.

18:19: Ishimwe Melissa (No 21) w’imyaka 18. Yavuze ko abaye Nyampinga w’u Rwanda yashyira mu bikorwa umushinga ujyanye no kubagabanya ubushomeri mu rubyiruko no kuzazamura ubukungu bw’igihugu.

Uyu mukobwa na we yavuze mu rurimi rw’Icyongereza nka rumwe mu zemewe zikoreshwa muri iri rushanwa.

18:16: Uwamahoro Alice (No 20) areshya na 1.70 Cm, yashoje amashuri yisumbuye mu ishami ry’Ikoranabuhanga.

Umushinga we ujyanye no gushishikariza urubyiruko gukunda igihugu. Yatanze urugero rw’urubyiruko rwisunze Inkotanyi mu rugamba rwo kubohora igihugu cyari mu bihe bikomeye bya Jenoside yakorerwaga Abatutsi, rwahagaritse nyuma y’amezi atatu imaze guhitana abasaga miliyoni.

18:05: Mpinganzima Josephine (No 19) afite imyaka 19, yasoje amashuri yisumbuye mu mwaka ushize mu Ishami ry’Ubukerarugendo, akaba akora akazi ko kumurika imideli.

Yabajijwe icyo yabwira abantu batandukanye bazi ko imyambaro ya ‘Made in Rwanda’ ari ikozwe mu bitenge, mu gusubiza ati “Made in Rwanda ntabwo ari ibintu bikozwe mu bitenge gusa.”

17:53: Umubyeyi Mugisha Christelle (No 18), afite imyaka 20 akareshya na 1.70 Cm ni umunyeshuri muri kaminuza mu ishami rya Business Management and Entrepreneurship.

Uyu mukobwa afite umushinga ujyanye no kwihangira imirimo kuko yizera ko biri mu bizatuma igihugu gikomeza gutekana.

-  Video: Reba ubwiza bw’abakobwa 31 bahataniye guhagararira Kigali muri Miss Rwanda 2020

17:46: Utamuriza Ella Deneave (No 17). Yize MPC mu mashuri yisumbuye. Yavuze ko umushinga we ugamije gushyira imbaraga mu kurwanya inda zitateganyijwe kuko bidindiza iterambere ry’igihugu.

Umusanzu we n’umwihariko we ni ukwigisha ababyeyi kugorora abana bakiri bato. Yavuze ko asaba ababyeyi "kwita ku nshingano z’urugo birakwiye ariko no gukurikirana aba bana ni ingenzi cyane."

17:42: Umumararungu Shakira (No 16) areshya na 1.71 Cm afite imyaka 19 yasoje amashuri yisumbuye umwaka ushize mu Ishami ry’Ubukerarugendo.

Umushinga we ujyanye no guteza imbere ururimi n’umuco. Azakora ubukangurambaga mu bice bitandukanye aho nibura muri buri murenge azahashyira isomer rizajya rifasha abantu kwiyungura ubumenyi.

Yabajijwe icyo yiyumvamo mu muco Nyarwanda avuga ko ari ukubyina, asaba abari mu cyumba kumuha amashyi, atangira gutega amaboko bya bindi by’ababyinnyi b’indirimbo gakondo.

Yabajijwe icyo azi gukora, ahitamo kubyina

17:36: Marebe Benitha (No 15). Yavuze ko yakuranye indoto zo kuzaba Miss Rwanda.

Afite umushinga ujyanye no ‘Gushinga amahuriro’ ku rwego rw’uturere y’abafite ubumuga.

Kugeza ubu mu Rwanda hari abafite ubumuga bagera ku bihumbi 446 mu byiciro byose, biganjemo abafite ubw’ingingo.

17:30: Ishimwe Divine (No 14) yize amateka. Afite umushinga ujyanye no gufasha abantu kumenya kuvugira mu ruhame.

Yabajijwe nk’umuntu wize amateka icyo nkwano zisobanuye mu muco Nyarwanda mu gusubiza ati “Inkwano ku giti cyanjye mbona ari ingenzi. Umwana w’umukobwa agomba gukobwa, bikagaragaza ko iwanyu bagutanze.”

“Ntabwo bibaho ko umukobwa yakwa umuhungu, mu muco nyarwanda ntibibaho.”

17:22: Niyigena Sarah (No 13) wize ishami ry’Icungamari yavuze ko impamvu yifuza kuba Nyampinga w’u Rwanda ari uko afite icyizere kandi ashaka gushyira mu bikorwa umushinga we.

Afite umushinga wo kwita ku basaza n’abakecuru bafite imyaka iri hejuru ya 65.

Ati “Icyo nzabafasha ni ukubegera nkabaganiriza, abadafite ubushobozi bwo kujya kwa muganga no kwikorera ibindi bintu. Nakorana n’urubyiruko muri iki gikorwa.”

“Impamvu natekereje uyu mushinga ni uko nari ndi kwa muganga mbona umusaza yabuze umuntu umufasha, mpita numva habonetse umuntu ukora igikorwa cyo kubafasha.”

17:17: Ingabire Winifrida (No 12) yavuze ko umushinga we uzibanda ku bijyanye no guteza imbere ikoranabuhanga.

17:10: Isimbi Ange (No 11) yavuze ko umushinga we ari uguteza imbere ubuvuzi binyuze mu kuzana abaganga bo mu mahanga bagatanga ubuvuzi imbere mu gihugu.

17:03: Umumararungu Ange Aline (No 10) yavuze ko naba Nyampinga w’u Rwanda wa 2020 azibanda ku bijyanye no gukoresha ikoranabuhanga no kubika no guhererekanya amafaranga.

16:53: Tuyishime Prisca (No 9) afite umushinga wo kurwanya ibiyobyabwenge. Yavuze ko yakoresha imbuga nkoranyambaga, akanafatanya n’inzego zitandukanye mu guhashya ibiyobyabwenge.

16:49: Kamikazi Celia (No 8) yavuze ko umushinga we uzita ku rubohero nk’ahantu abana b’abakobwa baganirira.

Ubusanzwe kera urubohero ni ahantu abakobwa bahuriraga bakaganira, bakagirana inama bagacyahana hagamijwe kububakamo abantu b’umumaro, bazirikana indangagaciro zikwiye kuranga Umunyarwandakazi.

Yanabajijwe kuri gahunda ya ‘Connect Rwanda’ igamije kuzamura no kwihutisha ikoreshwa ry’ikoranabuhanga mu Rwanda, abantu batangiye gutanga izi telefoni ndetse umuntu agasaba undi ahisemo kugira icyo yiyemeza, bigakorerwa kuri internet cyane cyane ku mbuga nkoranyambaga.

Ku wa 20 Ukuboza 2019 nibwo MTN Rwanda yatangije ubukangurambaga bwiswe Connect Rwanda Challenge, aho ibigo n’abantu ku giti cyabo bakomeje kwiyemeza umubare runaka wa telefoni zigezweho bazatanga zigahabwa abadafite ubushobozi bwo kuzigurira hirya no hino mu gihugu.

16:42: Mutegwantebe Chanice (No 7) yageze imbere y’Akanama Nkemurampaka.

Uyu mukobwa wasoje kwiga muri IPRC yabajijwe na Umurerwa Evelyne icyo gahunda y’ubumenyi ngiro imaze, mu gusubiza ati “Bivuze ikintu kinini, ni byiza ku mwana w’umukobwa cyangwa se undi Munyarwanda uwo ariwe. Bifasha kwikorera no kwihangira imirimo, umuntu akaba ukomeye kandi agatanga akazi.”

Yabajijwe uko umushinga we uteye mu gusubiza ati “Nzafasha urubyiruko cyane cyane abakobwa, icyo nzabamarira ni ukubaha ibitekerezo bijyanye no kwitinyuka.”

16:35: Kayiranga Mutoni Brigitte (No 6) afite imyaka 23, yize ‘Ubukungu’ akaba areshya na 1.76 Cm.

Umurerwa Evelyne yamubajije icyo azakora naba Miss Rwanda 2020, asubiza ko “Nzateza imbere igihugu binyuze mu mushinga wanjye ujyanye no kurwanya no gukumira icuruzwa ry’abantu.”

Yavuze ko azashyira mu bikorwa umushinga binyuze mu bukangurambaga azakora afatanyije n’inzego zitandukanye za Leta.

Mutesi Jolly yamubajije icyo abona kibitera mu gusubiza ati “Biterwa n’ubukene no kuba abantu bafite inyota yo kumva ko nibajya hanze y’igihugu aribwo bazatunganirwa.”

16:31: Kamikazi Rurangirwa Nadine (No 5) w’imyaka 21 akareshya na 1.70 Cm yageze imbere y’akanama nkemurampaka.

Uyu mukobwa afite umushinga ujyanye no kurwanya inda zitateguwe. Abajijwe uko azabigenza asubiza ko ikintu azakora ari ugutegura ibiganiro n’abakobwa bari kubyiruka.

Ku cyo abona kiri mu bituma abakobwa batwara inda zitateguwe avuga rimwe na rimwe biterwa no kutamenya neza ibijyanye n’ubuzima bw’imyororokere.

Dr Higiro yamubajije niba yemeranya n’abavuga ko ubukene buri mu bituma abakobwa batwara inda zitateguwe asubiza ko atemeranya nabyo na gato.

Kamikazi we yahisemo gukoresha Icyongereza mu gihe bagenze be bose bamubanjirije bavuze mu Kinyarwanda nk’ururimi rwa mbere bahisemo gukoresha, kugira ngo basobanure imishinga yabo neza.

16:25: Teta Mauren (No 4) w’imyaka 19, areshya na 1.70 Cm, afite umushinga ujyanye no kurwanya idindira ry’abana mu mikurire. Azakora ubukangurambaga mu miryango irimo icyo kibazo hagamijwe kuyigisha guteka indyo yuzuye.

16:19: Murerwa Blandine (No 3), yarangije amashuri yisumbuye mu Ishami ry’Ubukungu, Imibare n’Ubumenyi bw’Isi. Yabajijwe impamvu ashaka kuba Miss Rwanda 2020, mu gusubiza ati “Impamvu nshaka kuba Nyampinga w’u Rwanda ni uko nifitiye icyizere kandi nshoboye ndetse nkaba nshaka gutanga umusanzu mu guteza imbere igihugu.

Yabajijwe na Mutesi Jolly umushinga we, avuga ko afite umushinga w’ubujyanama mu mitekerereze.

Yavuze ko mu bushakashatsi yasanze hari amakimbirane atandukanye aba mu muryango Nyarwanda, aterwa n’ubusinzi, ubusambanyi n’ibindi avuga ko aramutse abaye Nyampinga w’u Rwanda 2020 yafatanya n’ibigo bitandukanye bya Leta hagatangwa amahugurwa mu muryango Nyarwanda.

Umushinga we washimwe n’akanama nkemurampaka, abakagize bose bamuha ‘Yes’.

16:11: Umukobwa witwa Kabari Sada (No 2) yageze imbere y’Akanama Nkemurampaka. Dr. Higiro Jean Pierre yamubajije icyo ‘Ireme ry’Uburezi’ bivuze kuri we, ati “Uko numva ireme ry’uburezi, aba ari uburezi bwiza butanga umusaruro.”

Mutesi Jolly we yamubajije ati “Wize ubukerarugendo, ni gute wakoresha ubumenyi wakuye mu ishuri ukabuhuza n’umuyoboro waba Miss Rwanda waba ufite mu guteza imbere Visit Rwanda?”

Ati “Nashishikariza Abanyarwanda kudata imyanda aho babonye hose.”

-  Amafoto agaragaza igihe abagize akanama nkemurampaka bari bageze mu byicaro byabo

Uhereye ibumoso: Umurerwa Evelyne, Dr Higiro Jean Pierre na Miss Mutesi Jolly ni bo bagize Akanama Nkemurampaka

-  Impinduka mu bagize Akanama Nkemurampaka

Abanyamakuru Mike Karangwa, Evelyne Umurerwa na Miss Rwanda 2016 Mutesi Jolly, nibo batangiranye n’ijonjora ryo gushakisha umukobwa uzegukana ikamba rya Nyampinga w’u Rwanda 2020, aribo bagize akanama nkemurampaka.

Banyuze mu Ntara zose ariko mu Mujyi wa Kigali hajemo impinduka aho Dr. Higiro Jean Pierre wakunze kwitabazwa inshuro nyinshi mu kanama nkemurampaka yasimbuye Mike Karangwa wagize ikibazo cy’uburwayi.

Mutesi Jolly ategura ibiganiro bizwi nka Inter-Generation. Mu mwaka ushize yahawe igihembo cy’umukobwa ubonwamo icyizere na benshi (Best Female Celebrity Influencer).

Umurerwa Evelyne amaze imyaka isaga 20 mu mwuga w’itangazamakuru, ari mu batoye ba Nyampinga muri Kaminuza y’Imari n’Ubukungu (SFB).

Dr Higiro Pierre ni umuganga ukorera mu Bitaro bya Nyamata mu Karere ka Bugesera. Yateguye Miss Campus muri Kaminuza y’u Rwanda mu 2005. Ari mu bagize uruhare mu gutegura amarushanwa y’ubwiza mu Rwanda nyuma ya Jenoside yakorewe Abatutsi mu 1994.

Dr. Higiro Jean Pierre yinjiye mu bagize Akanama Nkemurampaka asimbuye Mike Karangwa wagize uburwayi
Umurerwa Evelyne winjiye mu kanama nkemurampaka ka Nyampinga w'u Rwanda yari yabukereye
Mutesi Jolly yitabiriye ijonjora rya Miss Rwanda 2020 nk'umwe mu bagize Akanama Nkemurampaka nyuma y'igihe gito ahawe Impamyabumenyi y’Icyiciro cya kabiri cya Kaminuza ya Makerere. Yize ibijyanye n’imibanire mpuzamahanga

16:05: Iyampaye Keza Nadine (No 1) ni we mukobwa wa mbere wageze imbere y’Akanama Nkemurampaka.

Evelyne Umurerwa yamubajije impamvu yahisemo kwiyamamariza mu Mujyi wa Kigali, undi mu gusubiza avuga ko ‘Impamvu ni uko ariho iwacu, ntabwo nahavukiye ariko narahakuriye.’

Yanamubajije icyo yakora abaye Miss Rwanda 2020, asubiza ko afite umushinga ujyanye no kurwanya inda zitateguwe.

Ati “Ntabwo navuga ngo ba nyampinga bambanjirije ntacyo bakoze, mbaye Nyampinga w’u Rwanda kubunganira nicyo nakora. Icyo nahisemo nafasha u Rwanda ni ukugabanya inda zitateguwe mu bana b’abangavu. Nzakora ubukangurambaga nifashishije amaradiyo n’ibigo bigera kuri benshi.”

16:00: Umunyamakuru Martina Shami Abera ukora kuri KC2, Ishami rya kabiri rya Televiziyo y’u Rwanda uyobora igikorwa cyo guhitamo abazitabira Miss Rwanda 2020 yatanze ikaze! Abakobwa 31 bahise bahamagarwa biyerekana imbere y’Akanama Nkemurampaka.

-  Andi mafoto y’abakobwa biyandikishirije guhatanira ikamba rya Nyampinga w’u Rwanda 2020 mu Mujyi wa Kigali

I Kigali abakobwa benshi bitabiriye ijonjora ry'ibanze ryatoranyirijwemo abazahatanira ikamba

-  Ibigenderwaho mu guhitamo Nyampinga ubereye u Rwanda mu 2020

Umukobwa wiyandikisha guhatanira ikamba rya Nyampinga w’u Rwanda asabwa ikimuranga nk’Umunyarwanda (indangamuntu cyangwa pasiporo); afite imyaka hagati ya 18-24; yararangije amashuri yisumbuye; avuga neza Ikinyarwanda n’urundi rurimi nk’Igifaransa, Icyongereza n’Igiswahili.

Agomba kuba apima nibura ibilo 45 na metero 1.70 kuzamura; atarabyara; yemera kuzaguma mu Rwanda nibura umwaka umwe naramuka ahawe ikamba; yemera kutazashaka acyambaye ikamba; yemera kuzahagararira u Rwanda igihe cyose n’ahantu bikenewe no kuba yemera gukurikiza amategeko n’amabwiriza agenga Nyampinga w’u Rwanda.

-  Kigali ku isonga mu bwitabire bw’abayiyamamarijemo!

Umujyi wa Kigali ni wo wagize abakobwa benshi bawiyandikishirijemo muri Miss Rwanda 2020, ni ho hanakomeje umubare munini w’abemerewe kunyura imbere y’Akanama Nkemurampaka.

Muri Kigali hiyandikishirije abakobwa 134, 45 ni bo bageze ahabereye irushanwa mu gihe 31 aribo bujuje ibisabwa banyura imbere y’Akanama Nkemurampaka.

Umujyi wa Kigali wakuye kuri uyu mwanya Intara y’Uburasirazuba yarenze ku y’Amajyepfo mu ziyandikishirijemo abakobwa benshi.

Mu Karere ka Kayonza hiyandikishije abakobwa 90, muri bo 41 ni bo bageze ahabereye ijonjora mu gihe 30 aribo bujuje ibisabwa bibemerera kunyura imbere y’Akanama Nkemurampaka.

I Huye hiyandikishije abakobwa 79, ahabereye ijonjora hageze 28 mu gihe 17 aribo batoranyijwe nk’abujuje ibisabwa.

Mu Majyaruguru hiyandikishije abakobwa 75, muri bo 24 ni bo bageze aho igikorwa cyabereye mu gihe 14 ari bo banyuze imbere y’akanama nkemurampaka mu gihe mu Burengerazuba hiyandikishije 50, aho igikorwa cyabereye hagera 31 naho 13 banyura imbere y’akanama nkemurampaka.

Mu Mujyi wa Kigali ni ho hiyamamarije abakobwa benshi ugereranyije n'izindi ntara irushanwa ryanyuzemo

15:46: Abagize Akanama Nkemurampaka bahageze, barimo Miss Mutesi Jolly, Umurerwa Evelyne na Higiro Jean Pierre wasimbuye Mike Karangwa.

15:36: Abakobwa bose uko ari 31 bujuje ibisabwa bashyizemo amakanzu. Bahamagawe mu cyumba bari bubarizwemo bahabwa amabwiriza y’ibyo bagomba gukurikiza n’uko bitwara imbere y’Akanama Nkemurampaka.

-  Imvura yaguye ntiyakomye mu nkokora igikorwa!

Abakobwa bari mu cyumba bategereje bagaragaraga ku maso nk’abifitiye icyizere. Bari bafite akanyamuneza, ubona biteguye guhatana.

Nubwo imvura yajojobye mu kirere cya Kigali mu masaha abanziriza igihe igikorwa cyabereye, ntiyakomye mu nkokora ubwitabire. Abakobwa benshi bahageze mbere, baritegura bihagije.

Ijonjora rya nyuma rya Miss Rwanda 2020 ryabereye muri Hilltop Hotel i Remera
Imvura yabanje kugwa mbere y'amasaha make ngo irushanwa ritangire

14:50: Nyuma yo kwandikwa no kureba abakobwa bujuje ibisabwa, abemerewe kunyura imbere y’Akanama Nkemurampaka bagiye guhindura imyenda bashyiramo amakanzu biyerekanyemo.

-  Video: Uko byifashe ahagiye kubera ijonjora ry’abazahagararira Umujyi wa Kigali muri Miss Rwanda 2020

-  Amafoto y’abakobwa ubwo bari bategereje kwandikwa

Abakobwa bari bafite akanyamuneza mbere yo kumenyeshwa ko bujuje ibisabwa bibemerera kunyura imbere y'Akanama Nkemurampaka
Abanya-Kigali bari babukereye biteguye guhatanira ikamba rya Nyampinga w'u Rwanda wa 2020

13:30: Abakobwa batangiye gupimwa, harebwa abujuje ibisabwa banyura imbere y’abagize Akanama Nkemurampaka.

Abakobwa batandukanye bageze kuri Hill Top i Remera ahabereye ijonjora ry’ibanze ryo guhitamo Nyampinga w’u Rwanda 2020 mu masaha ya kare.

Igikorwa cya Miss Rwanda kizasozwa tariki 22 Gashyantare 2020 aribwo hazamenyekana uwegukanye ikamba rya Nyampinga w’u Rwanda 2020 asimbuye Nimwiza Meghan ufite irya 2019.

Miss Nimwiza Meghan (uwa kabiri iburyo) yatoranyirijwe mu Mujyi wa Kigali

Amafoto: Miss Rwanda

Video: Salomo George na Tumukunde Nadine


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .