00:00:00 IGIHE NETWORK KN KINYARWANDA EN ENGLISH FR FRANCAIS

Uruhisho rwa Chorale de Kigali ku bazitabira iserukiramuco ryatumiwemo amakorali 15 akomeye muri Afurika

Yanditswe na Akayezu Jean de Dieu
Kuya 23 March 2022 saa 03:28
Yasuwe :

Ubuyobozi bwa Chorale de Kigali bwijeje Abanyarwanda by’umwihariko abakunda indirimbo zo kuramya no guhimbaza Imana ko bazanyurwa n’iserukiramuco ry’indirimbo ryatumiwemo amakorali akomeye muri Afurika y’Uburasirazuba na Afurika y’Epfo.

Iri serukiramuco riteganyijwe kuba hagati ya tariki 24-28 Werurwe 2022, aho muri iyo minsi ine yose Abanyarwanda bazataramirwa na Korali 15 ziturutse muri Nigeria, Ghana, Cameroon, Afurika y’Epfo n’ahandi.

Muri iri serukiramuco ryateguwe n’Ihuriro Nyafurika rigamije guteza imbere muzika ya korali muri Afurika (African Choral and Gospel Championship, ACGC), hazaba harimo kandi korali zo mu Rwanda zirimo Chorale de Kigali.

Hazaba harimo Alarm Ministries, Choeur International et Ensemble Instrumental de Kigali na Korali Ishema Ryacu n’andi makorali atandukanye.

Mu kiganiro n’abanyamakuru cyo kuri uyu wa 23 Werurwe 2022, ubuyobozi bwa ACGC ndetse na Chorale de Kigali izakira iri serukuramuco basobanuye ibijyanye n’imigendekere yaryo.

Cyari kitabiriwe n’Umuyobozi ushinzwe Ibikorwa muri ACGC, Varrick James, Umunyamuryango wa ACGC waturutse muri Ghana, Enock Mintha, Visi Perezida wa mbere wa Chorale de Kigali, Dr. Diane Kayitesi ndetse na Visi Perezida wa Kabiri wa Chorale de Kigali, Irambona Oscar.

Varrick yavuze ko iri huriro n’iserukiramuco bigamije guhuriza hamwe Abanyafurika binyuze mu muziki wo kuramya no guhimbaza Imana.

Yagize ati “Icyo dushaka ni uguhuriza hamwe abagize umugabane binyuze mu muziki, turi umwe n’ubwo dutandukanywa n’imipaka ariko dushaka gukuraho iyo mipaka.”

Varrick James yavuze ko impamvu bahisemo u Rwanda nk’igihugu kigomba kwakira iri serukiramuco harimo kuba rwarabashije guhashya icyorezo cya Covid-19 ndetse no kuba ari igihugu gifite ubushobozi bwo kwakira iserukiramuco ryo kuri uru rwego.

Ati “Impamvu twahisemo u Rwanda ni igihugu cyiza natwe ubwacu dushaka gusura, ikindi cyabashije guhangana na Covid-19 kuko ahandi twari gutekereza ni muri Afurika y’Epfo ariko hariyo iki cyorezo.”

Yakomeje agira ati “Iyo hatabaho ACGC hari abantu benshi batari kuzaza muri Kigali ngo bibonere ibyiza byayo, biradushimishije kuba turi mu Rwanda, twakiriwe neza kandi twizeye kuzahagirira ibihe byiza dushimisha abazitabira iri serukiramuco.”

Visi Perezida wa mbere wa Chorale de Kigali, Dr Kayitesi Diane yavuze ko ari ishema kwakira iri serukiramuco kandi hari n’inyungu nyinshi igihugu kizaryungukiramo.

Ati “Ni ibyishimo, ni ishema kwakira ibindi bihugu bya Afurika, niba baravuze ngo twe nk’u Rwanda ni ishema. Tuzanabasha kugira ayo mahirwe yo kubereka umuco wacu, bazasura ahantu nyaburanga hirya no hino.”

Iby’ibanze wamenya kuri iri serukiramuco

Iri serukiramico rya ACGC, ni urubuga rwo guhuriza hamwe Abanyafurika by’umwihariko abari muri iki cyiciro cy’abahanzi baririmba indirimbo zo kuramya no guhimbaza Imana.

Rizarangwa n’ibitaramo bibiri binini birimo icyo gufungura giteganyijwe ku wa Kane tariki 24 Werurwe 2022, ku Intare Arena ahagana saa Kumi n’ebyiri z’umugoroba.

Ku Intare Arena kandi ku Cyumweru tariki 28 Werurwe 2022, nibwo hazaba igitaramo gisoza iri serukiramuco nacyo kikazaba mu masaha y’umugoroba. Kwinjira muri ibyo bitaramo byose ni ibihumbi 10Frw n’ibihumbi 20Frw mu myanya y’icyubahiro.

Ku wa Gatanu hateganyijwe amarushanwa ndetse n’igitaramo cyiswe ‘African Unit Concert’ kizitabirwa na Chorale zose kikabera muri Imbuka City Walk ahazwi nka Car Free Zone mu Mujyi wa Kigali.

Korali zitabiriye iri serukuramuco kandi ku wa Gatandatu zizahita zerekeza mu Mujyi wa Musanze, aho bazasura ibikorwa nyaburanga birimo n’ingagi zo mu Birunga, nyuma baze gusoza n’igitaramo kizabera mu Mujyi wa Musanze hafi na Diyosezi ya Ruhengeri.

Ni iserukiramuco rizanarangwa n’ibikorwa bizwi nka ‘Master Class’, aho abantu bungurana ibitekerezo ku muziki nk’abantu baririmba ku giti cyabo, korali n’ibindi.

Visi Perezida wa Kabiri wa Chorale de Kigali, Irambona Oscar avuga ko ibijyanye n’imyiteguro byarangiye igisigaye ari ugusaba abantu kuzakitabira ari benshi.

Uretse amakorali azaririmba ndetse n’amarushanwa kuri za korali n’abaririmba ku giti cyabo, muri iri serukiramuco hazagaragaramo amatorero abyina gakondo harimo Intayoberana zizasusurutsa abazitabira igitaramo cyo kuri uyu wa Kane.

Chorale de Kigali yijeje igitaramo cyiza abazitabira iserukiramuco ryatumiwemo amakorali 15 akomeye muri Afurika
Uko wagura tike yo kwinjira muri iri serukiramuco

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .