Uyu muramyi uri mu bakunzwe cyane mu Rwanda kubera indirimbo zihembura imitima ya benshi. Yari amaze igihe atumvikana cyane mu bikorwa byo gusohora indirimbo, kuri we avuga ko byatewe na gahunda zitandukanye yari ahugiyemo mu gihugu cya Kenya atuyemo.

Ati “Nibyo nari maze iminsi ncencetse, kuva mu 2015 bitewe n’ibibazo bitandukanye.”

Dudu avuga ko n’ibihe bigoye by’icyorezo cya COVID-19 Isi imazemo iminsi byamubereye imbogamizi ikomeye ariko agerageza gukora uko ashoboye kugeza arangije album ye ya gatatu iriho indirimbo 12.

Album nshya Dudu yasohoye iriho indirimbo nka “Mu Maraso Yawe”, “Yaraciye Inzira”, “Nzahora Nshima”, “Mbega Urukundo” n’izindi nyinshi.

Iyi album uyu muhanzi yayise “Uri Mwiza”. Avuga ko ari album iriho indirimbo zo gushimira, kuvuga ineza y’Imana ndetse no gushishikariza abantu kuyihimbaza kuko ariyo bakesha byose.

Dudu T. Niyukuri wamenyekanye mu ndirimbo zo guhimbaza Imana yashyize hanze album

Ati “Ni album iriho indirimbo amashimwe, gutambira Imana ndetse no gushishikariza abantu kuririmba ishimwe ry’Imana kuko ariyo ibarinda umunsi ku wundi bagakomeza kugira ubuzima bwiza.”

Uyu muhanzi umaze imyaka irindwi aba muri Kenya yavuze ko akumbuye kuririmbira mu Rwanda cyane nubwo ataramenya neza igihe azahazira.

Ati “Ibyo kongera gutaramira mu Rwanda turacyari kubisengera no kubitegura kuko ubu nibwo icyorezo kiri kugabanyuka. Gusa kuko ibihe bihindagurika ntabwo navuga igihe bizabera ariko bikunze byaba vuba aha.”

Dudu aheruka kuririmbira mu Rwanda mu gitaramo gikomeye cye mu 2015. Icyo gihe yari yacyise “Stand for Jesus Outreach” cyabereye kuri Christian Life Assembly[CLA] Nyarutarama.

Dudu yamenyekanye mu ndirimbo nka ‘Ntari twebwe, Ndi hano, na Ndagushima n’izindi.

Reba igitaramo Dudu Niyukuri aheruka gukorera mu Burundi