00:00:00 IGIHE NETWORK KN KINYARWANDA EN ENGLISH FR FRANCAIS

Umuziki wa Afurika i Kigali: Ibyaranze igitaramo Chorale de Kigali yahuriyemo na korali 15 (Amafoto)

Yanditswe na Akayezu Jean de Dieu
Kuya 27 March 2022 saa 08:04
Yasuwe :

Abahanzi baririmba indirimbo zo kuramya no guhimbaza Imana binyuze muri za korali bagera kuri 500 basoje iserukiramuco ry’indirimbo ryari rimaze iminsi ine ribera mu Rwanda aho ryakiriwe na Chorale de Kigali, iri mu zikomeye muri Afurika.

Iri serukiramuco rizwi nka ‘ACGC’ ryasojwe n’igitaramo kinogeye ijisho cyabereye mu Intare Arena mu ijoro ryo ku Cyumweru rishyira ku wa Mbere tariki 28 Werurwe 2022.

Kuva ryatangira ku wa 24 Werurwe 2022, abaryitabiriye bagera kuri 500 bakoze ibikorwa bitandukanye birimo amarushanwa yahuje za korali ndetse n’abaririmba ari amatsinda, babonye umwanya kandi wo gusura ibikorwa bibumbatiye amateka y’u Rwanda birimo Urwibutso rwa Jenoside rwa Kigali ruri ku Gisozi.

Uretse gusura Urwibutso rwa Jenoside yakorewe Abatutsi mu 1994 kandi abitabiriye iri serukiramuco batemberejwe ibice bitandukanye bigize Umujyi wa Kigali ndetse by’umwihariko ku wa Gatandatu basuye Pariki y’Igihugu y’Ibirunga iherereye mu Ntara y’Amajyaruguru.

Uretse igitaramo kandi habaye n’umuhango wo guhemba abahize abandi mu marushanwa yabaye muri iyi minsi iserukiramuco rimaze ribera mu Rwanda.

UKO IGITARAMO CYO GUSOZA ISERUKIRAMUCO RY’INDIRIMBO CYAGENZE:

- Amafoto ya Choeur International et Ensemble Instrumental de Kigali ku rubyiniro

12:05: Choeur International yashyize akadomo ku gitaramo gisoza iserukiramuco ry’indirimbo zo kuramya no guhimbaza Imana ryaberaga mu Rwanda.

Choeur International et Ensemble Instrumental de Kigali, ni umuryango w’abaririmbyi washinzwe ku kuwa 21 Mata 2006, ibona ubuzima gatozi mu mwaka wa 2008.

Ni umuryango udaharanira inyungu wemewe n’amategeko ufite icyicaro muri St Paul i Kigali mu Karere ka Nyarugenge.

CIEIK igizwe n’abaririmbyi b’abahanga babigize umwuga baturuka mu makorali akomeye yo mu Rwanda ndetse n’abanyamahanga bakaba bemerewe kuyiririmbamo mu gihe bagaragaza ubuhanga mu kuririmba.

Choeur International isanzwe yitabira ibitaramo mpuzamahanga (Festivals) birimo ibyagiye bibera mu bihugu bitandukanye birimo Burundi, Uganda, Tanzania, Kenya na Ghana, aho yahagarariye u Rwanda kandi ikitwara neza muri byo.

10:50: Visi Perezida wa mbere wa Chorale de Kigali, Dr Kayitesi Diane, yavuze ko iri serukiramuco ryamurikiwemo imico itandukanye yo mu bihugu byitabiriye

Ati “Kuva mu Intare Arena kugera mu Imbuga City Walk ukagera i Musanze, abantu bose bishimiye imico yamuritswe muri iri serukiramuco.”

Yavuze ko iri serukiramuco ryatekerejwe hagamijwe kunga Afurika binyuze mu muzika wo guhimbaza Imana.

Dr Kayitesi yahaye ikaze abitabiriye iri serukiramuco baturutse mu bihugu bitandukanye avuga ko bahawe ikaze mu Rwanda igihe cyose bazaba bifuza kugaruka gusura u Rwanda bazasanga amarembo afunguye.

Yashimiye ubuyobozi bw’igihugu bwafashije Chorale de Kigali mu kwakira iri serukiramuco.

Dr Kayitesi kandi yashimiye abafatanyabikorwa barimo Intare Arena, Minisiteri y’Urubyiruko n’Umuco, Umujyi wa Kigali, Akarere ka Musanze n’abandi bashyigikiye iri serukiramuco.

-Amafoto ya Grace Chorale International ku rubyiniro

10:45: Grace Chorale igeze ku rubyiniro

Grace Chorale International ni korali mpuzamahanga yo muri Ghana yibanda cyane ku muziki uzwi nka ‘Classic’ n’izindi njyana zitandukanye.

Indirimbo z’iyi korali ziba ziririmbwe mu Cyongereza, Ikidage, Igifaransa, Igitaliyani n’izindi ndimi ziganjemo izo muri Afurika

Grace Chorale International kuri ubu iyoborwa na Johannes Otoo ndetse ni umwe mu bakunze kuyifasha mu kwandika indirimbo.

- Amafoto ya Harmonious Chorale ku rubyiniro

10:15: Harmonious Chorale igeze ku rubyiniro.

Ni korali ikomeye ndetse ifite ibigwi n’amateka muri Ghana ikaba by’umwihariko yarashingiwe mu Murwa Mukuru w’iki gihugu, Accra.

Iyi korali imaze kwegukana ibihembo bitandukanye muri Ghana yatangijwe mu 2007.
Yashinzwe na Dr Joyce Rosalind Aryee mu gihe kuri ubu iyobowe na James Varrick Armaah.

Uyu mugabo ni nawe uyoboye Ihuriro rigamije guteza imbere muzika ya korali muri Afurika, ACGC akaba umwanditsi ukomeye w’indirimbo ndetse wanabyigiye muri Kaminuza ya Ghana.

Mu ndirimbo yaririmye uyu munsi harimo iyitwa ‘Oye’, ndetse n’iyitwa Nyen Agya Ewor Sor’.

- Abatabashije kwitabira igitaramo bashyiriweho uburyo bw’ikoranabuhanga

Kuva iri serukiramuco ryatangira, ibitaramo byagiye biba byose byabaga abantu bitabiriye imbonankubone ariko n’abatabashije kugera aho byabereye bakabasha kubikurikirana bifashishije ikoranabuhanga.

Hashyizweho umuyoboro wa YouTube unyuzwaho ibi bitaramo mu buryo bwa ‘Live’ ku buryo n’abari hirya no hino muri Afurika babasha gukurikirana imigendekere y’iri serukiramuco.

9:40: Lagos City Chorale igeze ku rubyiniro.

Ni korali yubatse izina muri Nigeria kuko imaze imyaka irenga 30 ikora umurimo w’ivugabutumwa binyuze mu ndirimbo.

Lagos City Chorale ikunze gutumirwa mu birori bikomeye birimo n’ibiba byitabiriwe n’Umukuru w’Igihugu muri Nigeria.

Iyi korali yashi zwe muri Gashyantare 1988, na nyakwigendera Lere Adesina wanabaye Umusenateri muri Nigeria. Yayishinze afatanyije na Sir Emeka Nwokedi.

- Korali 15 zitabiriye iri serukiramuco

Iserukiramuco Nyafurika ry’indirimbo ribaye ku nshuro ya mbere mu mateka yaryo, ndetse u Rwanda nirwo rwahise ruryakira.

Ni iserukiramuco ryitabiriwe na korali zikomeye ziganjemo izo mu bihugu bya Afurika y’Uburengerazuba.

Muri korali zitabiriye iri serukiramuco harimo iyitwa Bacmac Choir, Lagos City Choir, All Female Choir zo muri Nigeria na Bakamoso yo muri Afurika y’Epfo.

Muri Ghana haturutseyo korali zikomeye zirimo iyitwa Harmonious, Accra Diocesan Choir, Akoo Show Choir, Grace Chorale, Heavenly Jewels n’iyitwa Symphonials Choir.

Uretse Chorale de Kigali kandi mu Rwanda indi korali yitabiriye iri serukiramuco ni Alarm Ministries, Choeur International et Ensemble Instrumental de Kigali na Korali Ishema Ryacu.

- Amafoto y’abegukanye ibihembo

9:15: Abahize abandi bagiye guhembwa

Iri serukiramuco ryaranzwe n’ibikorwa bitandukanye birimo ibizwi nka ‘Master Class’, aho abantu bungurana ibitekerezo ku muziki nk’abantu baririmba ku giti cyabo, korali n’ibindi.

Mu bindi kandi habayemo amarushanwa ajyanye no gucuranga ndetse no kuririmba muri rusange aho abantu bagiye barushwa ku giti cyabo, za korali ndetse n’amatsinda y’abantu barenze umwe.

- Amafoto ya Chorale de Kigali ku rubyiniro

8:50: Chorale de Kigali yaririmbye indirimbo zirimo iririmbye mu buryo bwa Opera izwi ku izina rya ‘Basa Selim’.

Opera ni indirimbo zikinnye mu rwego rw’ikinamico zamamaye i Burayi n’ahandi bateye imbere muri muzika yanditse.

Chorale de Kigali ubwo yari iri ku rubyiniro kandi yaririmbye indirimbo yakunzwe cyane yiswe ‘Il est la’.

8:40: Umunye-Ghana Maame Efua Abrokwaha, uyoboye iki gitaramo nka ‘MC’ yamaze guhamagara Chorale de Kigali ku rubyiniro.

Maame Efua Abrokwaha uri kugenda anyuzamo akavuga n’Ikinyarwanda kirimo nka ‘Muraho’ n’ibindi amaze kwigishwa mu minsi mike amaze i Kigali.

Umunye-Ghana Maame Efua Abrokwaha, niwe uyoboye iki gitaramo nka ‘MC’

8:20: Rwanda Nziza yaririmbwe!

Nk’uko byagenze ubwo hafungurwaga iri serukiramuco, abitabiriye batangira baririmba indirimbo yubahiriza igihugu cy’u Rwanda cyane ko aricyo cyakiriye iri serukiramuco.

Abitabiriye bose baririmbye Rwanda Nziza bahagurutse.

Nyuma yo kuririmba Rwanda Nziza hahise hakurikiraho indirimbo yubahiriza Ihuriro Nyafurika rigamije guteza imbere muzika ya korali muri Afurika [ACGC].

Indirimbo yubahiriza ACGC, yiswe ‘We are Africa’, ifite ubutumwa bw’uko twese turi Abanyafurika ndetse umuziki ubahuriza hamwe.

Ni indirimbo yanditswe na James Varrick Armaah.

8:10: Umurishyo utangira igitaramo wamaze gukomwa!

Iki gitaramo cyagombaga gutangira ku saa kumi n’ebyiri z’umugoroba ariko ntabwo ariko byagenze bitewe n’impamvu z’uko bamwe mu bitabiriye iri serukiramuco bagombaga no kuririmbamo bari batarava kuri hoteli.

Bitandukanye n’uko byari byatangajwe mu matangazo yamamaze iki gitaramo, ahagana saa mbili n’iminota 10 nibwo igitaramo cyatangijwe ku mugaragaro.
Itorerero ry’abasore babyina gakondo yo mu gihugu cya Ghana nibo baserutse ku rubyiniro babyina imbyino ziri mu rurimi rwabo.

I Musanze byari ibicika

Ku wa Gatandatu tariki 26 Werurwe 2022, wari umunsi ubanziriza uwa nyuma w’iri serukiramuco aho abaryitabiriye baturutse mu bihugu bitandukanye basuye Pariki y’Igihugu y’Iburunga.

Nyuma yo gusura ibyiza bitatse Pariki y’Igihugu y’Iburunga birimo Ingagi ziboneka hake muri Afurika, aba bashyitsi bagarutse mu Mujyi wa Musanze ahabereye igitaramo cyiswe ‘Africa United Concert’.

Ni igitaramo cyabereye hafi na Diyosezi ya Ruhengeri, aho cyaririmbwemo na korali zitandukanye zirimo Chorale de Kigali yanyuze bikomeye abakitabiriye mu ndirimbo zayo zirimo izakunzwe ha mbere.

Abari bitabiriye iki gitaramo bari benshi cyane dore ko cyabereye hanze ndetse kwinjira bikaba byari ubuntu.

Ambasaderi w’u Bufaransa mu Rwanda, Antoine Anfré yageze mu Intare Arena mu ba mbere
Ambasaderi w’u Bufaransa mu Rwanda, Antoine Anfré ari mu bakunze kwitabira ibitaramo bya Chorale de Kigali

19:40: Ab’inkwakuzi bahageze kare

Igitaramo cyo gufungura iri serukiramuco cyabaye ku wa 24 Werurwe 2022, cyitabiriwe n’abayobozi barimo Minisitiri w’Uburezi, Dr Uwamariya Valentine; Umunyamabanga muri Minisiteri y’Urubyiruko n’Umuco, Bamporiki Edouard n’abandi banyacyubahiro.

Ni igitaramo kandi cyari cyitabiriwe n’abahagarariye ibihugu byabo mu Rwanda barimo Ambasaderi wa Israel mu Rwanda, Dr. Ron Adam n’abandi badiplomate by’umwihariko abahagarariye ibihugu bya Afurika byitabiriye iri serukiramuco.

Kuri iyi nshuro nabwo abayobozi ntibatanzwe mu bitabiriye iki gitaramo kuko Ambasaderi w’u Bufaransa mu Rwanda, Antoine Anfré ari mu ba mbere bageze ku Intare Arena ahagiye kubera iki gitaramo.

Ab'inkwakuzi bahageze hakiri kare baje mu gitaramo gisoza Iserukiramuco Nyafurika ry'Indirimbo cyakiriwe na Chorale de Kigali
Uyu yaje yitwaje ibendera rya Ghana nk'igihugu cyitabiriye iri serukiramuco
Kwinjira mu Intare Arena ahabereye iki gitaramo bisaba kwerekana ko wikingije kandi wipimishije ukaba udafite ubwandu bwa Covid-19
Rukundo Charles Lwanga (iburyo) uri mu baririmbyi ba Chorale de Kigali na we ni umwe mu bageze ku Intare Arena mu ba mbere
Uyu arimo kwitoza mbere y'uko igitaramo gitangira

IGIHE ibahaye ikaze i Rusororo ku Intare Arena ahabereye igitaramo gisoza Iserukiramuco ry’Indirimbo zo kuramya no guhimbaza Imana ryitabiriwe na korali zirenga 15 zikomeye ziganjemo izo muri Kiliziya Gatolika zaturutse mu bihugu byo hirya no hino muri Afurika.

Iri serukiramuco ryabereye mu Mujyi wa Kigali hagati ya tariki 24-27 Werurwe 2022, ryakiriwe na Chorale de Kigali ku bufatanye n’Ihuriro Nyafurika rigamije guteza imbere muzika ya korali muri Afurika (African Choral and Gospel Championship, ACGC).

Amafoto: Irakiza Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .