00:00:00 IGIHE NETWORK KN KINYARWANDA EN ENGLISH FR FRANCAIS

Israel Mbonyi yatanze Noheli ishyitse mu gitaramo yamurikiyemo imbumbe ya album ebyiri (Amafoto)

Yanditswe na Akayezu Jean de Dieu, Israel Ishimwe, Nsengiyumva Emmy
Kuya 25 Ukuboza 2022 saa 07:02
Yasuwe :

Umuramyi Israel Mbonyi yanditse amateka mashya mu gitaramo “Icyambu Live Concert” cyafashije abacyitabiriye gusoza Umunsi wa Noheli bari mu mwuka wo kuramya no guhimbaza Imana.

Iki gitaramo cyabereye muri BK Arena ku mugoroba wo ku Cyumweru, tariki ya 25 Ukuboza rishyira ku wa Mbere, tariki ya 26 Ukuboza 2022.

Mbonyi yaririmbye anyura abari basendereye mu nyubako y’imyidagaduro n’imikino BK Arena kuva ku ndirimbo ya mbere yatangiriyeho kugera ku yo yasorejeho.

Yaririmbye indirimbo ze hafi ya zose zakunzwe zirimo Icyambu, Urwandiko, Nzaririmba, Uri Number One, Ku marembo y’Ijuru, Nkwiye kurara Iwawe, Ndakubabariye, Umukunzi, Ibihe, Karame, Mbwira, Urutare, Nturi Wenyine, Sinzibagirwa, Baho, Hari Ubuzima na Yaratwimanye.

Mu masaha agera kuri ane yamaze ku rubyiniro, Israel Mbonyi yongeye gushimangira ko ari umuhanzi wihagazeho, ukunzwe kandi usize amavuta atuma aririmba akanyura ab’ingeri zose.

Mu magambo y’abacyitabiriye bishimiye ko bagize Noheli nziza kuko bayisoje bari mu bihe byiza byo kuramya no guhimbaza Imana.

Muri iki gitaramo yanafatanyije n’abahanzi barimo Aneth Murava, James na Daniella na Danny Mutabazi.

UKO IGITARAMO CYAGENZE:

KANDA HANO UREBE AMAFOTO MENSHI YARANZE IGITARAMO

  Mbonyi yatwambukije umunsi tukiri mu mwuka wo kuramya

00:02: Mbonyi wageze ku rubyiniro saa Mbili yambutse umunsi akiri kuririmba, mbere yo gusoza saa Sita n’iminota ibiri.

  Igisirimba cyasoje igitaramo “Icyambu

23:59: Abitabiriye igitaramo biganjemo abari bicaye mu myanya y’icyubahiro bavuye mu byicaro byabo bagana imbere y’urubyiniro, bafatanya na Mbonyi gusirimba ubwo yaririmbaga indirimbo “Icyambu”.

  Mbonyi, Mbonyi, Mbonyi!! Yabaye Mbonyi

23:53: Abari muri BK Arena mu majwi menshi bumvikanye basubiramo izina rya Mbonyi inshuro nyinshi mu kumwereka ko bamwishimiye.

Bati “Mbonyi, Mbonyi, Mbonyi, Mbonyi, Mbonyi, Mbonyi.’’

  Yaratwimanye ni indirimbo ikunzwe

23:49: Israel Mbonyi yaririmbye indirimbo “Yaratwimanye” iri mu ze zikunzwe cyane muri iyi minsi.

Yishimiwe ubwo yayiririmbaga ndetse yafatanyije na benshi kuyiririmba kuva ku ijambo rya mbere kugera ku rya nyuma riyigize.

  Israel Mbonyi mu mateka mashya

23:44: Israel Mbonyi yasoje kuririmba indirimbo ye “Hari Ubuzima” ashimira abitabiriye igitaramo cye.

Ati “Ndabashimiye cyane. Mwakoze kuza. Mwakoze cyane uyu mugoroba twakoze amateka. Hano hari huzuye.’’

Nyuma yo gushimira, amajwi menshi yumvikanye aririmba “Yaratwimanye’’, na we ntiyazuyaje yahise ayiririmba.

  Israel Mbonyi yasengeye abifuza gukizwa

23:35: Israel Mbonyi mbere yo kuririmba indirimbo ye yise ‘‘Hari ubuzima” yabanje gusengera abifuza kwakira Yesu nk’Umwami n’Umukiza wabo.

Yavuze ko gukizwa ari ingenzi mu buzima bwa muntu, bityo buri wese akwiye kwiyitaho.

Ati “Gukizwa ntibituma utaba umu-jeunes mwiza. Urakizwa ugakomeza kuba ‘cool’. Gukizwa si ibintu by’abaturage byo kwambara amatisi manini. Ushobora gukizwa ukagumana ‘vibes’ zawe. Ibyaha Imana itubuza bitugiraho ingaruka mu buzima busanzwe. Gukizwa si ibintu by’abaturage, ni ibintu byiza.’’

Yahise yanzika aririmba indirimbo ivuga ko muri Yesu “Hari ubuzima”.

  IGISIRIMBA CYUBAHWE!!!!

23:30: Mu ndirimbo zose yaririmbye kuva atangiye, iyitwa “Sinzibagirwa” yahize izindi. Yayigezeho, abantu bava mu byabo bayiririmba bivuye inyuma.

Kuva itangiye kugera ku musozo wayo, bafatanyaga kuririmba ariko bananyuzamo bagasirimba, abatabizi ni za mbyino zimenyerewe mu nsengero.

Umurindi wo kubyinira Imana uri muri BK Arena urahambayeeeee!!

  “Sinzibagirwa” yaciye impaka

23:23: Israel Mbonyi mbere yo kuririmba “Sinzibagirwa” hasomwe ijambo ry’Imana riri muri Bibiliya riganisha ku ishimwe ry’umuntu wagiriwe neza n’Uhoraho, na we akarahira ni atazibagirwa.

Kuri iyi ndirimbo, abari muri BK Arena bahagurutse bafatanya kuririmba. Aha n’abanyamakuru baba abandika, abavuga na ba bandi bafata amafoto n’amashusho bari kunyeganyega, bagafatanya na we kuramya Imana.

  Israel Pappy afite impano idasanzwe

23:15: Israel Pappy uvuza umwirongi yishimiwe byo hejuru nyuma yo kukanyuzaho mu ndirimbo “Nturi wenyine”.

23:00: Mbonyi aracyaririmba ndetse imbaraga yatangiranye ntabwo zigeze zigabanuka.

Abakunzi b’ibihangano bye na bo baracyari kumwe na we, bari kuririmbana buri ndirimbo ye yose, uko zikurikirana.

Yinjiye ahagana saa Tanu aririmba indirimbo zirimo “Urutare” na “Nturi wenyine”.

  Yikuye ikote nyuma y’iminota 13 arishyizemo

22:43: Israel Mbonyi mbere yo gutangira kuririmba indirimbo ye yise “Karame”, yavuze ko iri mu nziza yanditse mu 2020, yabanje gukuramo ikote asigarana ishati y’umukara, abona gukomeza kuririmba.

22:37: Mu gice cya kabiri, Israel Mbonyi yatangiriye ku ndirimbo ye yise “Ibihe”. Iri mu ze zakunzwe cyane.

  Mbonyi yahinduye imyambaro

22:30: Mbonyi yasubiye imbere y’abitabiriye igitaramo cye. Yahageze yahinduye imyambaro yashyizemo ikote ry’umutuku, yambariye ku ishati n’inkweto by’umukara.

Bakimukubita amaso, bose bagize ibyishimo byinshi cyane bamukomera amashyi y’urufaya.

  Mbonyi arasaba guhagararana n’Imana

22:20: Herekanwe filime mbarankuru ivuga ku mateka ya Mbonyi waboneye izuba i Mulenge muri Repubulika Iharanira Demokarasi ya Congo.

Igaruka ku rugendo rwe rwo gukizwa, uko yinjiye mu buhanzi akaba amaze kubaka izina uyu munsi.

Mu byifuzo bye yavuze ko yifuza ko Imana yamukoresha nk’uko byagendekeraga Dawidi wacurangaga imyuka mibi ikava kuri Sawuli.

Yasoje yifuriza abitabiriye igitaramo cye Noheli Nziza n’Umwaka mushya muhire wa 2023.

  Danny Mutabazi yahaye Israel Mbonyi impano

22:13: Nyuma yo gusoza kuririmba, Danny Mutabazi, yageneye umuramyi Israel Mbonyi impano.

Yagize ati “Dushobora kuba igihe twamuboneye atari cyo yatangiriye ariko yakoresheje imbaraga nyinshi. Tumusabire kuzaba muri iki gitondo. Azasoze urugendo neza.’’

Yahise avuga ko yateguye impano yo kumugenera kuko azirikana imvune ziba mu gutegura igitaramo cyiza nk’icyo yakoze.

Yakomeje ati “Nzi imvune ziba mu gufata amajwi n’amashusho y’indirimbo. Natekereje kumushimira nk’umuntu watanze imbaraga nyinshi. Njye nk’umuryango wanjye twahisemo kumuha impano. Imana imwagure kurushaho, ikomeze imukoreshe iby’ubutwari. Izamuhe iherezo ryiza.”

Danny Mutabazi kuri ubu ni “Brand Ambassador” wa Hi Coffee, ikorera mu Gisimenti. Impano yamuhaye igizwe

Nyuma yo gusoza kuririmba, Danny Mutabazi, yageneye umuramyi Israel Mbonyi impano
Israel Mbonyi yakiranye urugwiro impano yahawe na Danny Mutabazi
Danny Mutabazi yazaniye impano Israel Mbonyi
Danny Mutabazi yashimye Israel Mbonyi
Umuyobozi w'Itorero Foursquare Rwanda, Dr. Bishop Fidèle Masengo, yagaragaye ateruye umwana we muri iki gitaramo

  Ibyihariye kuri Danny Mutabazi

Danny Mutabazi asanzwe ari umuramyi ubivanga n’ivugabutumwa mu Itorero ADEPR muri Paruwasi ya Gasave.

Yatangiye kuririmba mu 2004 abarizwa muri korali z’abana, impano ye yaje gukura kugeza mu 2015 ubwo yatangiye kuririmba ku giti cye. Ubuhanzi bwe abuvanga n’ivugabutumwa akorera muri ADEPR, akaba amaze gushyira hanze indirimbo nyinshi.

Indirimbo yitwa ‘Calvary’ ni yo yazamuye izina rye mu muziki uhimbaza Imana. Yanamenyekanye mu zirimo “Ntiyasinziriye”, “Ntiwanyihakanye”, “Binkoze ku Mutima”, “Ufite uwo mwana”, “Amarira y’Ibyishimo”, “Saa Cyenda” n’izindi.

Mutabazi yavukiye mu Murenge wa Gishali mu Karere ka Rwamagana ahitwa Nyarugari. Uyu musore w’imyaka 28 aheruka kurushinga na Mahoro Bernadette [Berry] nyuma y’imyaka isaga ibiri bari bamaze bakundana.

Ku wa 2 Kamena 2019 ni bwo yamuritse album ye ya mbere mu gitaramo yakoreye muri Dove Hotel.

Abitabiriye iki gitaramo bagize ibihe byiza
Danny Mutabazi ni umwe mu bahanzi bakunzwe mu ndirimbo zo kuramya no guhimbaza Imana
Danny Mutabazi yaririmbye indirimbo ye yise 'Igitondo'
Banasirimbye karahava

  Israel Mbonyi yahamagaye Danny Mutabazi ku rubyiniro

22:05: Umuramyi Danny Mutabazi yageze imbere y’abitabiriye igitaramo “Icyambu Live Concert”. Yinjiye aririmba indirimbo yise “Igitondo” amaze amezi atandatu asohoye.

Iyi ndirimbo yayanditse ashaka gukumbuza abantu iby’urugendo rugana i Siyoni.

Umuyobozi w'Itorero Foursquare Rwanda, Dr.Bishop Fidèle Masengo ni umwe mu bitabiriye iki gitaramo
Bari bafite akanyamuneza

22:01: James na Daniella mu minota bamaze ku rubyiniro beretswe urukundo.

Nyuma yo kuririmbana na Mbonyi, bakurikije indirimbo yabo bise “Umwami ni mwiza peee” bafatanyije na True Promises basanzwe baririmbamo.

Iyi couple na yo yerekanye ko ifitiwe igikundiro ndetse indirimbo zombi bafatanyaga kuziririmba.

  Ibyo wamenya ko kuri James & Daniella

James Rugarama na Daniella Rugarama baririmbana mu itsinda bise ‘James&Daniella’. Ni couple imwe mu zakoze umuziki ukabasha kugera ku kigero nk’icyo uyu munsi bariho. Bavuga ko kuba indirimbo zabo ziri kwamamara cyane mu buryo bwihuse ari ubushake bw’Imana n’amasengesho yabo adasiba.

Bigeze kubwira IGIHE ko babanye igihe kinini babitsanya amabanga, nyuma bafata umwanzuro wo kugirana umubano w’urukundo no kuririmbana nka Couple.

Aba bombi iyo bavuga amateka yabo bavuga ko batangiye baririmbana ariko mu 2019 bakaza gufata umwanzuro wo gutangira kuririmba nyuma y’uko baririmbiraga mu rugo bakumva ni byiza cyane.

James ati “Twararirimbaga tutarabana ubundi tugahurira mu matsinda atandukanye. Tumaze kubana dutangira kujya turirimbana ariko bitari mu buryo bweruye. Uyu mwaka nibwo nk’itsinda ryacu nibwo twagiye muri studio dukora indirimbo ya mbere twise ‘Mpa Amavuta’.”

Daniella avuga ko urukundo rwabo rwatangiye gututumba mu 2008 cyangwa 2009, mu 2012 bajya kwiga muri Uganda, umugabo yiga iby’Ububanyi n’Amahanga mu gihe umugore icyo gihe yigaga Ibaruramari.

James na Daniella beretswe urukundo ruhambaye

BIHINDUYE ISURA KURI JAMES NA DANIELLA

21:25: James na Danielle na bo basanganiye Mbonyi Israel ku rubyiniro, bakiriwe bahabwa amashyi menshi.

Bafatanyije kuririmbana indirimbo bafitanye bise “Yongeye guca ikanzu”. Iyi couple na Mbonyi bishimiwe cyane muri iyi ndirimbo ndetse bafatanyije n’imbaga kuyiririmba.

  Impano y’abizeye yatanzwe!!

21:25: Murava Aneth yavuze ko indirimbo ye ayifata nk’iyo gusubizamo abantu ibyiringiro.

Ati “Iyi ni indirimbo y’abantu bafite ibyiringiro. Wowe ubwira Imana ko utegereje ubushake bwayo, ufite ibyiringiro ko izakugeza mu gitaramo cy’abayishima.’’

Nyuma yo gusoza kuririmba, Israel Mbonyi na we yafatanyije na we kuririmba.

Yunzemo ati “Wakoze cyane.’’

Avuye ku rubyiniro yahise ahabwa amashyi yo kumwereka ko yishimiwe cyane.

Umuramyi Anet Murava yaririmbye mu gitaramo cya Israel Mbonyi
Anet Murava yagaragaje ubuhanga budasanzwe, ni umuhanzikazi utanga icyizere

  Aneth Murava yakiranywe ubwuzu

21:25: Umuramyi Aneth Murava yakiriwe ku rubyiniro, yakiranwa ibyishimo byinshi. Mbere yo guseruka, Israel Mbonyi yabanje kuririmba agace gato kagize indirimbo ye yise “Niho nkiri”.

Israel Mbonyi na Anet Murava bari bafite akanyamuneza ku rubyiniro
Israel Mbonyi yamuritse impano itangaje ya Anet Murava

  Ibyo wamenya kuri Aneth Murava

Murava amaze imyaka irenga itanu mu muziki uhimbaza Imana. Izina rye ryatumbagijwe cyane n’indirimbo "Niho Nkiri".

Mu mezi 12 yayo ya mbere yari imaze kurebwa n’abarenga miliyoni ebyiri kuri YouTube.

Afite izindi ndirimbo zirimo “Imboni” na “Urahebuje’’.

  Isengesho rito rya Mbonyi

21:10: Israel Mbonyi mbere yo kuririmba indirimbo ari kunyuzamo akaganiriza abakunzi b’ibihangano bye.

Mu isengesho rito, yasabiye umugisha abitabiriye igitaramo, abasabira umugisha w’impande zose.

Yagize ati “Reka uwaje arwaye atahe yakize, uwaje arushye aremerewe aruhuke. Uhembure imitima ya buri wese wabonetse aha hantu.’’

  Indirimbo za kera n’iz’ubu zirazwi kuva mu bato kugera mu bakuru

21:00: Israel Mbonyi yaririmbye indirimbo ye aheruka gushyira hanze, yayise “Ndakubabariye”.

Yabanje kubaza niba abantu bayizi, na bo baramwikiriza, bahita baririmbana amagambo ayigize.

Iyi ndirimbo imaze hanze iminsi 11 imaze kurebwa n’abasaga ibihumbi 319 kuri YouTube.

  Yasomye ku mazi nyuma y’iminota 56

20:54: Nyuma y’iminota 56 ku rubyiniro, Israel Mbonyi amaze kuririmba indirimbo esheshatu zirimo “Icyambu”, “Urwandiko”, “Nzaririmba”, “Uri Number One”, “Ku marembo y’Ijuru” na “Nkwiye kurara Iwawe”.

Agisoza iyi ya nyuma ni bwo yafashe agacupa asoma ku mazi kugira ngo abobeze umuhogo, abona kwanzika n’ibindi bihangano by’umwuka.

Incamake ku buzima bwa Israel Mbonyi

Ubusanzwe ababyeyi be bamwise, Mbonyicyambu Israël. Yavutse tariki 20 Gicurasi 1992.

Ubwo yabonaga izuba, umuryango we wabaga muri Teritwari ya Uvira mu Ntara ya Kivu y’Amajyepfo muri Repubulika Iharanira Demukarasi ya Congo.

Umuryango we waje gutahuka mu Rwanda mu 1997, ni ukuvuga ko icyo gihe Mbonyicyambu yari afite imyaka itanu y’amavuko.

Ni umwana wa gatatu muri barindwi bavukana barimo abakobwa batatu n’abahungu bane, uretse murumuna we ubwiriza ijambo ry’Imana n’undi ucuranga, nta wigeze ahitamo inzira ya muzika.

Afite imyaka itanu ni bwo we n’umuryango bavuye muri RDC bajya gutura mu Rwanda, bahise bajya kuba ku Kimisagara ho mu Mujyi wa Kigali, nyuma baza kwimukira i Musanze kuko ari ho se yari yabonye akazi.

Nyuma y’uko kari karangiye, umuryango wa Israel Mbonyi wasubiye gutura mu Mujyi wa Kigali ari na ho abarizwa kugeza ubu.

Israel Mbonyi yatangiriye amashuri abanza ku Kamuhoza akomereza Kabusunzu hanyuma aza kuyasoreza i Musanze muri EER.

Icyiciro rusange yacyize muri Ecole d’Art de Nyundo, asoreza ayisumbuye i Nyanza muri Ecole Des Science St Louis De Montfort aho yize Imibare, Ubugenge n’Ubutabire.

Nyuma yo kurangiza ayisumbuye yagiye kwiga mu Ishami rya Farumasi mu Buhinde nubwo atari yo yashakaga.

Israel Mbonyi yavuze ko mu bwana bwe yakuze yifuzaga kwiga gutwara indege cyangwa kuba umuganga nubwo bitamuhiriye. Ni umusore wakuranye impano zitandukanye zirimo gukina umupira na karate yavanyemo umukandara w’ubururu.

Mbonyicyambu yakuriye mu muryango w’Abakiristo ndetse ubwo yari akiri muto yatangiye kuririmba mu matsinda atandukanye ndetse avuga ko yaririmbye no muri korali zirimo iyitwa Intumwa za Yesu, Groupe de Louange iherereye I Nyanza aho yize amashuri yisumbuye (secondaire) n’irindi tsinda ryitwa Amani.

Iyo muganira akubwira ko mu 2010 aribwo yafashe gitari yiyemeza kuririmbira Imana wenyin gusa ngo yaje kugenda abitwara gahoro gahoro agenda abona amahishurirwa atandukanye ku ndirimbo akajya azandika kugeza n’ubu.

Umuramyi Israel Mbonyi ni umwe mu bahanzi bakiranywe urukundo rudasanzwe kuva ku ndirimbo ye ya mbere

20:40: Israel Mbonyi yaririmbye indirimbo ye “Ku Marembo y’Ijuru”, arishimirwa bihebuje.

Muri iyi ndirimbo hari aho byageze, BK Arena ifatanya n’uyu muhanzi gukoma amashyi mu buryo bw’umujyo umwe, bayakomeye hejuru y’umutwe.

  Mbonyi yadusubije aho byatangiriye!

20:34: Mu 2014 ni bwo Israel Mbonyi yasohoye album ye ya mbere yise ’Number one’, yayimurikiye mu gitaramo yakoreye muri Kigali Serena Hotel mu 2015.

Iyi ndirimbo na n’ubu iracyari mu mitima ya benshi. Yayiririmbye arishimirwa bihambaye ndetse abantu bose bari bizihiwe no gufatanya na we mu mwanya wo kuramya.

Akiyisoza yahawe amashyi menshi y’urufaya yo kumushimira.

  Uwageze muri BK Arena yariye Noheli byuzuye!

20:30: Uko Israel Mbonyi asoza indirimbo ni ko ibyishimo by’abamukurikiye birushaho kwiyongera. Ku ndirimbo ye ya gatatu yafashije benshi kwizihirwa binyuze mu gihangano cye “Nzaririmba.’’

Umwuka wo kuramya no guhimbaza Imana uri muri BK Arena ni bwo buzima abakirisitu n’abemera bakwiye kubamo.

Usibye kuba iyi nyubako yasendereye mu mpande zayo zose, umuziki uri kuyicurangirwamo uzira amakaraza, ibihangano bihembura biri kuharirimbirwa, ni impano buri wese yakwishimira gusozanya umunsi nk’uyu wa Noheli.

Umuramyi Israel Mbonyi ni umwe mu bahanzi bakiranywe urukundo rudasanzwe kuva ku ndirimbo ye ya mbere
BK Arena yuzuye mu bushobozi bwayo bwose

  MBONYI YEGUYE INANGA YE

20:14: Israel Mbonyi ufite n’impano yo gucuranga gitari, nyuma yo gusoza indirimbo ya mbere, yafashe gitari ye.

Mbere yo gutangira kuririmba indirimbo ya kabiri yabwiye abari muri BK Arena ko ashaka kumva ko bayizi.

Ati “Ndashaka kumva ko iyi ndirimbo muyizi.”

Yaririmbye ijambo rimwe gusa, ubundi andi yose bafatanya kuyaririmba.

Indirimbo yakurikijeho ni iyitwa “Urwandiko”. Yayisoje yifuriza abari muri BK Arena “Noheli Nziza”.

Indirimbo ze zirimo 'Nzaririmba, Amarembo y'Ijuru n'izindi nizo yahereyeho
Israel Mbonyi yamaze kugera ku ruhimbi

  BK Arena ni “ICYAMBU” mu mfuruka zose!

20:10: Israel Mbonyi nyuma yo gusoza indirimbo ye ya mbere yashimye abitabiriye igitaramo cye.

Yagize ati “Mbega byiza! Mbega ukuntu ari byiza. Murasa neza cyane.”

Yabiseguyeho ko igitaramo cyatangiye gitinze, avuga ko ubusanzwe bubahiriza amasaha.

Ati “Ndabashimye cyane ko uyu munsi mwaje tugatarama. Ubusanzwe twubahiriza igihe ariko ndashima Imana ko dutangiye. Hari abantu benshi bari hanze batarinjira ariko benshi bamaze kugera aha.’’

Agisoza indirimbo, amajwi menshi yumvikanye muri BK Arena yongera kuyiririmba, na we afatanya na bo agace gato, abona kwanzika.

20:07: Israel Mbonyi ari kuririmba ariko anaherekejwe n’ababyinnyi bo muri Shining Stars bari kumufasha bari imbere y’ahubatswe urubyiniro. Izi nkumi n’abasore bitwaje ya mabendera yanditseho amagambo atandukanye ahesha izina rya Yesu icyubahiro.

  Israel yakiriwe BK Arena yose iri mu bicu

20:04: Mbere yo kugera ahirengeye, Israel Mbonyi yabanjirijwe n’abacuranzi n’abahanzi bamwunganira mu buryo bw’imiririmbire.

Yinjiriye mu ndirimbo ye “Icyambu”. Yahise atangira kuyiririmba ndetse abari muri BK Arena bamwikiriza bwangu, baririmbana na we buri jambo ryose mu ayigize.

Shinning Stars berekanye ubuhanga mu mukino urimo ubutumwa bwakoze benshi ku mutima

  Abakomeye n’aboroheje bitabiriye igitaramo cya Israel Mbonyi

Imyanya nko ku kigero cya 95% ya BK Arena yamaze kuzura mu gihe hategerejwe ko Israel Mbonyi agera imbere y’imbaga imutegereje muri BK Arena.

Kuva ku bishyuye ibihumbi 5 Frw kugera ku batumirwa bakuru, iki gitaramo cyitabiriwe bihambaye.

Mu bacyitabiriye harimo Ambasaderi wa Israel mu Rwanda, Dr Ron Adam; Intore Massamba; Pasiteri Nyinawingeri Angelique, umugore wa Apôtre Dr Gitwaza n’abandi.

  Ivuka rya Yesu ryizihijwe mu buryo butandukanye

19:57: Itsinda ry’abagize Shining Stars ryitwaje ingoma za kizungu ryaserutse ryitwaje amabendera ariho amagambo atandukanye agusha ku kuzirikana Noheli, Umunsi ufatwa nk’uwo Yesu yavukiyeho.

Bari bitwaje amabendera ariho amagambo nka Adonai, Elohim, Abba, Jehovah Jireh, Emmanuel na Shalom.

19:50: Abagize Shining Stars bavuze ku ruhererekane rw’inkuru zo kuva ku kuremwa kw’Isi kugera aho yahawe “Umucunguzi”. Uwo ni we wabaye “Icyambu” [Izina ryitiriwe imwe muri album ya Israel Mbonyi] kigeza abamwizera mu Bwami bw’Imana.

Ati “Mfite ubutumwa bwiza kuri mwe muri iri joro. Urupfu ntirwari kumuherana.’’

"Turashima uwatubereye icyambu, turaramya uwatubereye icyambu. Ku bwe turi abaraganwa na Kirisitu.’’

Aya magambo nyuma yo kuyavuga hakomwaga amashyi menshi y’urufaya.

  Shining Stars yaharuriye inzira Israel Mbonyi!

19:40: Itsinda ribyina indirimbo zo mu rusengero rizwi nka Shining Stars ryo mu Itorero rya Evangelical Restoration Church i Masoro ni ryo ryabanjirije Israel Mbonyi ku rubyiniro.

Abarigize batangiye batanga ubutumwa bugaragaza ko mbere y’uko ibintu byose biremwa hariho umwijima ariko nyuma yo kuza kwa Yesu Kirisitu, ibintu byose byagiye ku murongo.

James na Daniella babanje gukurikira igitaramo mu gihe bategereje ko bahamagarwa ku rubyiniro
Ambasaderi wa Israel mu Rwanda, Dr Ron Adam yagaragaye yizihiwe muri iki gitaramo
Masamba Intore yafashijwe
Umuhanzi Masamba Intore nawe yaje gushyigikira Israel Mbonyi

  Igitaramo ntikiratangira! Mbonyi ategerejwe na benshi

19:37: Iby’abarokore ntibitinda! Nyuma yo gufatanya n’abari muri BK Arena kuririmba, Yvan Ngenzi yabateguje ko Mbonyi agiye kugera imbere yabo bagatarama kugera bucyeye.

Ati “Ni bande biteguye kwakira Israel Mbonyi? Nkunda kuvuga ngo ni indongobe Yesu agenderaho.’’

Mu kumusubiza, abantu bose bagaragazaga ko banyotewe no kubona Israel Mbonyi ari imbere yabo.

N'ubwo igitaramo kitaratangira ngo abahanzi baze ku rubyiniro, abitabiriye batangiye gufashwa kujya mu mwuka
Umuhanzikazi Shengero Aline Sano [Alyn Sano] watangiriye umuziki mu rusengero, ni umwe mu bitabiriye igitaramo cya Israel Mbonyi
Ubwo Yvan Ngenzi yaririmbaga indirimbo zitandukanye, abitabiriye bamufashije kubyina abandi bakoma mu mashyi
Ni ibihe byo kwegerana n'Imana

  Gakondo nkirisitu ni yo twatangiranye

19:25: Yvan Ngenzi mbere yo kwakira Israel Mbonyi yabanje kwinjiza abari muri BK Arena mu mwanya wo kuramya no guhimbaza Imana.

Yababajije ati “Mukunda gakondo nkirisitu? Mukunda kuramya Imana mu njyana ya Kinyarwanda?”

Yahise yanzika aririmba indirimbo ye yise “Ntihemuka’’. Akiyisoza yahawe amashyi y’urufaya.

Mu gihe ibyishimo byari bicyuzuriranye mu mitima y’abari muri BK Arena yahise yanzika n’indirimbo “Nzamusingiza” imenyerewe cyane muri Kiliziya Gatolika.

Uko aririmba ni ko anyuzamo agacinya akadiho, anabyina bimwe byo mu muco Nyarwanda, agasoza agwa mu nka.

19:15: Yvan Ngenzi yageze ahirengeye atangaza ko igitaramo kigiye gutangira. Yabanje kwiyambaza Imana no kuyereka gahunda zose zigiye kubera muri BK Arena.

Yahise atangira aririmba indirimbo ya 111 mu zo Gushimisha Imana mu Gitabo cy’Indirimbo, yitwa "Izina Rihebuje". Aherekejwe n’abacuranzi yafatanyije n’abamaze kugera muri BK Arena kuyiririmba ijambo ku rindi.

- Yvan Ngenzi ni we ugiye kuyobora igitaramo

Umuhanzi uhimbaza Imana ariko mu Njyana Gakondo, Yvan Ngenzi, ni we ugiye kuyobora iki gitaramo.

Ngenzi azwi mu ndirimbo nka "Ntahemuka", "Uri umwami", "Urera" yakoranye na Jules Sentore, "Ishyanga ryera" n’izindi nyinshi zatumye izina rye rimenyekana.

Ni inshuti y’akadasohoka na Israel Mbonyi ndetse bajyanye no mu rugendo ‘Twende Jerusalem’ yakoreye muri Israel muri uyu mwaka.

Umuhanzi uhimbaza Imana ariko mu Njyana Gakondo, Yvan Ngenzi, ni we ugiye kuyobora iki gitaramo

18:30: Evans Mwendwa [Dj Spin] umaze kumenyekana mu bavanga umuziki wo mu rusengero mu Rwanda yageze ku rubyiniro atangira gucuranga ibihangano bitandukanye.

Uyu mugabo yacuranze indirimbo zitandukanye zibyinitse zitegura ibihumbi by’abari muri BK Arena kwinjira mu mwanya mwiza wo kuramya no guhimbaza Imana.

Evans Mwendwa [Dj Spin] niwe urimo kuvanga imiziki mu gihe hategerejwe ko abantu benshi bari hanze ya BK Arena binjira

BK Arena yatangiye gusendera rugikubita

  Inyubako ya BK Arena yagezemo abantu benshi mbere y’uko amasaha nyirizina igitaramo cyagombaga gutangiriraho agera.

Ab'inkwakuzi bageze muri BK Arena mbere y'uko igitaramo gitangira
Byitezwe ko icyumba kiberamo ibitaramo mu nyubako ya BK Arena kiraza kuba cyuzuye
Abakuru n'abato baje gusangira ibyishimo bya Noheli na Israel Mbonyi

  Igitaramo cy’igice cy’ikinyacumi

Israel Mbonyi agiye gukora igitaramo nyuma y’imyaka itanu, yari amaze adategura ibitaramo bye bwite.

Mbonyi yavuze ko impamvu agiye kumurika album ebyiri icyarimwe ari uko yagiye ategura ibitaramo kuva mu 2020, ariko hakabaho ibihe bya Covid-19 byagiye byitambika.

Mu Ukuboza 2020, yagombaga gukora igitaramo cyo kumurika album ye ya gatatu yise "Mbwira", ariko imirimo yo kugitegura ibangamirwa n’icyorezo cya Covid-19.

Mu 2014, Israel Mbonyi yasohoye album ye ya mbere yise ’Number one’, yamurikiye mu gitaramo yakoreye muri Kigali Serena Hotel mu 2015. Iya kabiri yise ’Intashyo’ yamuritswe mu gitaramo yakoreye muri Camp Kigali mu 2017.

- Icyambu Live Concert yahumuye hakiri kare

Kuva saa Munani z’amanywa, imihanda yose yerekeza kuri BK Arena yarimo abakunzi b’ibihangano bihimbaza Imana, biteguye kujya gutaramana na Israel Mbonyi mu kwizihiza Noheli.

Imiryango yafunguwe saa Kumi n’Imwe ariko na mbere y’iyo saha abantu benshi bari bamaze kugera kuri BK Arena.

Biteganyijwe ko mu gitaramo "Icyambu Live Concert", Israel Mbonyi ari bumurike album ebyiri icyarimwe zirimo iyitwa "Mbwira" na "Icyambu".

17:00: Imiryango ya BK Arena yafunguwe. Abantu batangira kwinjira.

Imirongo miremire y'abaguze amatike bategereje kwinjira muri BK Arena
Uyu yabanje gufata agafoto k'urwibutso kuri uyu munsi w'amateka
Polisi y'Igihugu nayo irahari kugira ngo ifashe mu bijyanye n'umutekano waba uwo mu mihanda yerekeza kuri BK Arena ndetse naho nyirizina
Bazanye muri iki gitaramo cy'amateka
Urubyiruko, abakuze n'abasheshe akanguhe bose ntawacikanwe n'iki gitaramo
Abashinzwe kuyobora abitabiriye iki gitaramo babukereye, bafasha buri wese kugira ngo abashe kubona uko yinjira bitewe n'agaciro k'itike yaguze
Parikingi kuri BK Arena zari zatangiye kuzura ahagana Saa Kumi n'Ebyiri
Ahagana Saa Kumi n'Imwe z'Umugoroba, imihanda yerekeza Remera yarimo imodoka nyinshi cyane zerekeje kuri BK Arena

Amafoto: Igirubuntu Darcy na Munyakuri Prince


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .