00:00:00 IGIHE NETWORK KN KINYARWANDA EN ENGLISH FR FRANCAIS

Umuryango w’Abayisilamu mu Rwanda wahaye abatishoboye inkunga ya miliyoni 6.5 Frw

Yanditswe na Thamimu Hakizimana
Kuya 8 Ukwakira 2022 saa 09:45
Yasuwe :

Umuryango w’Abayisilamu mu Rwanda (RMC) wahaye inkunga y’ibikoresho n’amafaranga imiryango itishoboye kugira ngo ibashe kwiteza imbere.

Kuri uyu wa Gatanu tariki ya 7 Ukwakira 2022, nibwo iyi nkunga ifite agaciro ka miliyoni 6.5Frw yahawe imiryango itishoboye yo mu turere 15 two mu ntara zitandukanye no mu Mujyi wa Kigali kugira ngo nayo ibashe kwikura mu bukene.

Ubuyobozi bw’Umuryango w’abayisilamu mu Rwanda, bwemeza ko iyi nkunga igizwe n’amafaranga n’imashini zidoda byose hamwe bifite agaciro ka 6,500,000 Frw yakuwe mu maturo yitwa “Zakatulmali” abayisilamu baba baratanze kugira ngo ahabwe abatishoboye.

Ubusanzwe mu myemerere ya Islamu ituro rya “Zakatulmali” ni itegeko kuritanga ku muntu wishoboye, rikava ku mafaranga aba yarizigamiye ku mwaka ndetse rikaba ari n’inkingi ya gatanu y’ukwemera kwa Islam.

Ubuyobozi bwa RMC bwabwiye IGIHE, ko bwahisemo gutanga iyi nkunga ku mugaragaro kugira ngo abayisilamu batanze ituro bamenye ko ryageze neza ku bo rigenewe.

Ushinzwe Ibwirizabutumwa n’imigenzo y’Idini muri RMC, Sheikh Djamiru Karangwa, yagize ati “Ubundi iri turo twaritangaga mu kwishyurira abana b’impfubyi rikanafasha abatishoboye ariko RMC yifuje ko ritangwa ku mugaragaro kugira ngo n’abayisilamu baritanga bamenye ko rigera ku bafatanyabikorwa riba ryaragenewe kugira ngo bazanarusheho kujya baritanga.”

Umubyeyi witwa Nyirabasindi Sifa, ubarizwa mu cyiciro cya mbere cy’ubudehe, avuga ko imashini yo kudoda yahawe izamufasha kuva muri icyo cyiciro.

Yagize ati “Nari nsanzwe nzi kudoda ariko nkagira ikibazo cy’ibikoresho kuko imashini nakoreshaga nayikodeshaga cyangwa nkayitira ariko kuba nyibonye bigiye kumfasha kwiteza imbere no kuva mu cyiciro cya mbere nabarizwagamo nkajya mu cya Kabiri kuko nta kibazo cy’ibikoresho nzongera kugira.”

Muhawenimana Zakiya, nawe avuga ko imashini yahawe igiye kumufasha kurushaho kwiteza imbere

Ati “Iyi mashini nizeye ko izamfasha kwiteza imbere cyane kuko nzajya ndodera abayisilamukazi n’abandi banyarwanda imyambaro, bimfashe kurushaho gutera imbere kandi ndashimira ababigizemo uruhare bose kugira ngo nanjye mbone imashini yo gukoresha.”

Kuba umuryango w’abayisilamu mu Rwanda utanze ku mugaragaro iri turo rya Zakatulmali, ni bimwe mu byishimiwe n’abayisilamu batari bake kuko benshi muri bo bahoraga bibaza icyo amafaranga y’amaturo batanga akoreshwa ku buryo hari n’abashinjaga abayobozi ko bayakoresha mu nyungu zabo bwite.

Abahabwaga imashini zo kudoda banahabwaga ibihumbi 10Frw yo kubafasha kuzigeza aho batuye
Abafite ubumuga bahawe inkunga ya miliyoni 1Frw na Mufti w'u Rwanda
Byari ibyishimo byinshi ku bahawe inkunga
Muhawenimana Zakiya avuga ko imashini yahawe igiye kumufasha kwiteza imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .