00:00:00 IGIHE NETWORK KN KINYARWANDA EN ENGLISH FR FRANCAIS

Nyagatare: Abayisilamu basabwe kurwanya ubutagondwa bwigeze kuhaboneka

Yanditswe na Hakizimana Jean Paul
Kuya 28 May 2022 saa 03:48
Yasuwe :

Abayisilamu bo mu Karere ka Nyagatare basabwe umusanzu mu kurwanya imyumvire mibi y’ubutagondwa ikunze kubagaragaramo, baburirwa ko uzabigaragaramo azahanwa n’amategeko.

Ubutagondwa ni imwe mu myumvire mibi ikunze kugaragara muri bamwe mu bayisilamu irimo kurwanya abantu batari abayisilamu, kwiturikirizaho ibisasu n’indi myumvire mibi.

Mu 2018 nibwo mu Karere ka Nyagatare hagaragaye urubyiruko rufite imyumvire y’ubutagondwa, icyo gihe uwari Imam w’umusigiti ari n’umunyeshuri yarafashwe arafungwa kuri ubu akaba yarasoje igihano cye.

Undi wabifatiwemo ni umusore wabaga mu Murenge wa Tabagwe aho nawe yaje gutabwa muri yombi agafungwa kuri ubu akaba yarasoje igihano.

Benshi mu babifatirwagamo bavugaga ko babaga babyigishijwe na bamwe mu baturukaga mu gihugu cya Uganda dore ko imirenge itandatu y’Akarere ka Nyagatare ihana imbibi n’iki gihugu.

Kuri uyu wa Gatanu ubwo hatahagwa umusigiti mushya ufite ibiro n’inyubako zishobora kwifashishwa mu kwigisha urubyiruko kwirinda ubutagondwa, abayisilamu bongeye gusabwa kuburwanya bivuye inyuma.

Mufti w’u Rwanda wungirije Sheikh Nshimiyimana Saleh, yavuze ko uyu musigiti mushya bifuza ko wafasha abayisilamu kuwusengeramo, bakungurana ibitekerezo byubaka umuryango n’igihugu.

Yavuze ko batifuza kumva ibijyanye n’ubutagondwa mu rubyiruko rw’abayisilamu nkuko byagiye bigaragara mu myaka yashize.

Sheikh Nshimiyimana yavuze ko mu myaka yashize ibitekerezo bibi by’u butagondwa byaseseye bikinjira mu rubyiruko rw’abayisilamu hirya no hino mu gihugu harimo n’abo mu Karere ka Nyagatare, icyo gihe ngo bafatanyije na Leta y’u Rwanda barabihashya.

Yavuze ko ariko Nyagatare kuba ituriye umupaka wa Uganda na Tanzania bishobora kongera kugaruka batareze abana babo neza.

Ati “ Kubibibutsa rero ni ukubibutsa ko ibihe banyuzemo atari byiza, ntawifuza kongera kubigarukamo, nibafashe inzego z’igihugu mu kwirinda uwo ari we wese washaka guhungabanya igihugu cyacu yitwaje ibitekerezo bibi by’ubutagondwa.

Sheikh Nshimiyimana yavuze ko abenshi mu baba bafite ibyo bitekerezo batabona umwanya wo gukora ibikorwa byiza by’iterambere, asaba abayisilamu kujya batanga amakuru ku bantu bashobora kwinjira mu gihugu bagashaka gucengeza mu rubyiruko bya bitekerezo bibi.

Bamwe mu bayisilamu biyemeje kurwanya ubutagondwa n’indi myumvire mibi ishobora kugaragara mu rubyiruko. Bizumuremyi Aboubakar utuye mu Mudugudu wa Mirama, yavuze ko kuva na mbere barwanyije ubutagondwa ngo ku buryo n’ubu biteguye gukomeza kuburwanya.

Ati “ Ubundi rero ibintu byose biva mu ngo z’abantu, niba umubyeyi adafite ubutagondwa umwana we ntiyabugira cyane ko burya ijya kurisha ihera ku rugo, abana akenshi babikura mu bigare no ku mashuri aho niho tugomba kubirwanyiriza.”

Kabanda Abdourkudus avuga ko ubundi umusilamu muzima wize Quran adashobora kujya mu butagondwa, yavuze ko nubwo wasoma ibitabo byose bya Islam ntawo wasanga gushyigikira ubutagondwa biri, bivuze ko ari icyaha gikomeye cyane.

Kantarama Assia we yagize ati “ Ubutagondwa twiteguye kuburwanya twigisha abana bacu umuco w’idini, tukanabereka ko umuyisilamu mwiza ari ukora ibikorwa byiza atari ukuba intagondwa.”

Umusigiti watashywe wuzuye utwaye miliyoni 120 Frw ukaba ufite ubushobozi bwo kwakira abantu 100, mu Karere ka Nyagatare habarizwa abayisilamu 5600 basengera mu misigiti 25 iri hirya no hino mu mirenge.

Mufti w'u Rwanda wungirije Sheikh Nshimiyimana Saleh yasabye abayisilamu bo mu Karere ka Nyagatare kurwanya ubutagondwa
Uyu musigiti wuzuye utwaye miliyoni 120 Frw
Inzu zizakorerwa nk'ibiro kuri uyu musigiti

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .