00:00:00 IGIHE NETWORK KN KINYARWANDA EN ENGLISH FR FRANCAIS

Impaka ku gufashisha abatishoboye imyenda yambawe

Yanditswe na Mukahirwa Diane
Kuya 29 Ukuboza 2022 saa 08:09
Yasuwe :

Muri Bibiliya yera Matayo umurongo wa 25: 41-45 haranditswe ngo azabwira n’abari ibumoso ati ‘Nimuve aho ndi mwa bivume mwe, mujye mu muriro w’iteka watunganyirijwe umwanzi n’abamarayika be, kuko nari nshonje ntimumfungurire, nari mfite inyota ntimwampa icyo nywa, nari umushyitsi ntimwancumbikira, nari nambaye ubusa ntimwanyambika, nari umurwayi no mu nzu y’imbohe ntimwansura.”

Iri jambo n’andi menshi ni cyo Bibiliya ivuga ku ngingo ijyanye no gufasha abatishoboye. Iki ni kimwe mu gikorwa abakirisitu n’abandi bakora bishimye kuko bizera ko imirimo bakoze ku Isi izabahereza mu Ijuru.

Usibye n’aba baba bakorera ijuru, gufasha abatishoboye ni ubumuntu bukwiye kuranga buri wese kuko nk’uko umunyarwanda yabivuze kubaho ni ukubana, bisobanuye ko icyo urusha mugenzi wawe ukwiye kumwunganira.

Nubwo ari igikorwa cyiza ariko usanga uko gikorwa bigibwaho impaka zitandukanye aho usanga bamwe banenga abafasha bakabyerekana cyangwa se abafashisha abandi ibyo bakoresheje batagikeneye.

Ku wa 25 Ukuboza 2022, Rev Didas Natweta wo mu itorero rya All Saints Greater Bushenyi COU muri Uganda, yigishije abakirisitu ko gutanga imyambaro ishaje atari byo kandi bidashimisha uwiteka.

Yagize ati “Kuva kera nagiye mbona abantu bakusanya imyambaro ishaje bakayishyira abayikeneye nko mu nkambi z’impunzi. Kuri njye ibi si byo niba ushaka gufasha kuki utajya mu isoko ngo ugure umwenda mushya abe ariwo utanga, aho niho tuzabona ko ubikuye ku mutima kandi ubikoranye urukundo.”

“Niba tugiye gutanga tujye dufatira urugero ku Mana yaduhaye umwana wayo w’ikinege Yesu ngo tubabarirwe ibyaha byacu, ibi byerekana urukundo nyarwo. Ndabizi ko ku muntu bigoye gutanga umwana we nk’uko Imana yabikoze ariko reka dutange ibindi mu rukundo.”

Izi zabaye impaka ndende usibye uyu kandi hari abandi hirya no hino ku Isi no mu Rwanda bagenda bagaragaza ko gutanga imyambaro wambaye atari byo abandi bakumva ko ntacyo bitwaye.

Mu Rwanda bifatwa bite?

U Rwanda nk’igihugu kiri mu nzira y’amajyambere rufite umubare w’abatishoboye benshi, byakongeraho n’inkambi z’impunzi ziri hirya no hino bikaba akarusho.

Ibi ni byo bituma haboneka abantu bakenera ubufasha bw’abandi bakaba babasanga mu ngo cyangwa ahandi babasaba ubufasha burimo n’imyambaro. Hari n’amadini agira iyi gahunda yo gukusanya inkunga z’abatishoboye nka Caritas ya Kiliziya Gatolika.

Abanyarwanda iyi ngingo nabo bayifiteho ibitekerezo bitandukanye, bamwe bumva ko umuntu atanga icyo afite abandi bakumva ko abatishoboye udakwiye kubaha ibyo ubonye byose.

Umushumba Mukuru wa Paruwasi ya Remera mu Itorero ry’Abangilikani mu Rwanda, Rev. Canon Dr. Antoine Rutayisire, yavuze ko abakirisitu ibyo bakora byose bikwiye gushingira kuri Bibiliya kandi yo itabibuza.

Ati “Yohani umubatiza yaravuze ngo umuntu naba afite amashati abiri undi yambaye ubusa ajye amuha imwe, none se ubwo nzamuha imwe indi ntarayambaye, niba mfite abiri ntabwo yababwiye ngo niba umuntu yambaye ubusa ujye ujya kumugurira umwenda.”

Yakomeje ati “Yarababwiye ngo niba umuntu akwatse umukenyero ngo ujye umuha n’umwitero, none se yatwara umukenyero utari uwambaye. Nk’uko Bibiliya ibivuga umuntu atanga icyo afite cyokora gutanga icyangiritse ku buryo n’uwo ugihaye ntacyo cyamumarira ibi sibyo. Umuntu aje agusanga umuha icyo ufite.”

Ibi abihuje na Rev Alain Numa wo mu Itorero Shiloh Prayer Mountain, wavuze ko icyangombwa mu gutanga ari umutima ubikoranye kandi ukirinda gutanga ikitazagirira umuntu akamaro.

Ati “Gufasha umukene n’imyambaro wambaye ntacyo bitwaye rwose, uri umukristu cyangwa pasiteri igikuru kiri imbere y’ibyo byose ni umutima wo gutanga.”

“Ntabwo ubitanga kuko wabirambiwe, wabuze aho ubijugunya ni uwo mutima wo gutanga. Umukristu wamaze kwitanga waramaze kwiha Imana, nta na kimwe atatanga.”

Yakomeje avuga ko urukundo ari rwo rukwiye kuranga icyo gikorwa ukoze kandi ko n’ufite ubushobozi ashobora kugura imishya biterwa n’icyo umutima umutegeka.

Ati “Gutanga umwambaro wambaye ni byo ariko afite ubushobozi yanabigura kuko aho ruzingiye ni umutima wo gutanga. Turabikora tukabwira abantu ngo tuzafashe abatishoboye ariko na none ntabwo tubabwira ngo uzane wa mwenda wacitse mu kwaha.”

“Fata iyo myenda ikiri mizima, umwe ukunda nawe wambara ukajya mu bantu, mu birori uwumese, uwuzinge ntabwo ubaye mushya ariko uvuye mu rukundo. Ni uko mbitekereza bitavuze ko ufite ubushobozi atagura ibaro ngo ayitange.”

Usibye abakristu kandi ababarizwa mu idini ya Islam ni bamwe mu bantu bakora ibikorwa bitandukanye byo gufasha abatishoboye, nabo bafite uko bumva iyi ngingo.

Mutesa Shaffy yavuze ko muri Islam mbere yo gutanga ikintu ubanza kureba abo mu muryango wawe.

Ati “Turetse n’imyambaro Qur’an itubwira ku gice cyo gutanga mu gufasha umukene utishoboye, itubwira ngo mbere yo kujya gufasha ubanza ukareba mu muryango wawe ko icyo ushaka gutanga ntawe ugikeneye imbere mu muryango. Iyo usanze bihagije ubwirijwe gufasha abo hanze.”

Yakomeje avuga ko nyuma yo kubona ko umuryango wawe wihagije ujya hanze ariko ugatanga cya kintu nawe ukunda.

Ati “Kubafasha si ukubaha bimwe wowe ubona bitakigufitiye agaciro nko ku myambaro nshobora kuba mfite umwenda utakinkwira kuko abantu turakura, turabyibuha ariko ukaba wari ukiwukunze wawutanga.”

“Islam ibuza gutanga ikintu wajugunye kitagifite agaciro icyo ntabwo cyemewe.”

Usibye abashingira ku madini n’amatorero abantu ku giti cyabo mu myumvire yabo bumva ko gutanga bijyana n’icyo umuntu agusanganye.

Umunyamakuru Bisa Léana yagize ati “Njye numva ko icyo ufite ari cyo utanga, gutanga ntibisaba kujya kuzana ibintu bya mirenge icyangombwa ni umutima wo gutanga ufite ni nako Bibiliya itubwira umuntu atanga uko yifite.”

Umubare munini wumva ko ibyo wakoresheje ukwiye kubitanga gusa, Gasana Emmanuel we yavuze ko niba wiyemeje kugira icyo utanga uba ukwiye gutanga igishya.

Ati “Nubwo umuntu uba uri gufasha nta bushobozi aba afite ariko uba ugomba kumuha ikintu kiri bunyure umutima we, niba wabiteganyije jya kugura imishya nk’uko iyo ugiye gutanga impano mu bawe ubagurira ibishya wipfa gutanga gutyo gusa.”

Mu Ibyakozwe n’intumwa 20:35 haranditswe ngo “Nababereye icyitegererezo muri byose, yuko ari ko namwe mukwiriye gukora imirimo ngo mubone uko mufasha abadakomeye, no kwibuka amagambo Umwami Yesu yavuze ati ‘Gutanga guhesha umugisha kuruta guhabwa.’ ”

Ni aha buri wese gukorera uyu mugisha mu buryo yumva ahamanya n’umutima we.

Abakristu bumva ko gutanga imyambaro yambawe nta kibazo ikibi ari ugutanga iyangiritse
Umushumba Mukuru wa Paruwasi ya Remera mu Itorero ry’Abangilikani mu Rwanda, Rev. Canon Dr. Antoine Rutayisire, abwira abakristu gukurikira Bibiliya kandi yemera gutanga ibyo wakoresheje
Rev Alain Numa avuga ko mu gutanga igihabwa agaciro ari umutima ubikoranye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .